AKP ភ្នំពេញ ថ្ងៃទី២០ ខែមករា ឆ្នាំ២០២៥-ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារបានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំ ប្រឹងប្រែង របស់ ឯកឧត្តម លោកជំទាវ លោក លោកស្រី ថ្នាក់ដឹកនាំ មន្ត្រីរាជការ កងកម្លាំង ប្រដាប់អាវុធគ្រប់ប្រភេទ និងអាជ្ញាធរគ្រប់លំដាប់ថ្នាក់ ដែលបានយកចិត្តទុកដាក់ក្នុងការ បំពេញតួនាទី ភារកិច្ចការងាររបស់ខ្លួន ប្រកបដោយស្មារតីទទួលខុសត្រូវខ្ពស់ ហើយបានផ្តល់កិច្ចសហ ការការងារបានយ៉ាងល្អប្រសើរ រហូតទទួលជោគជ័យ និងសម្រេចបានសមិទ្ធផល សំខាន់ៗ ជាច្រើនជូនសង្គមជាតិ និងប្រជាជនក្នុងមូល ដ្ឋានខេត្តព្រះវិហារទាំងមូល។ ការលើកឡើងរបស់ឯកឧត្តមអភិបាលខេត្តបែបនេះក្នុងឱកាសពិធីបើកសន្និបាត បូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារឆ្នាំ២០២៥ របស់រដ្ឋបាលខេត្តព្រះវិហារ ដែលបានប្រព្រឹត្តទៅនៅសាលប្រជុំប្រាសាទព្រះវិហារ អគាររដ្ឋបាលសាលាខេត្តព្រះវិហារ ដោយមានការអញ្ជើញចូលរួមពី  ឯកឧត្តម ប្រាក់ សុវណ្ណ ប្រធានក្រុមប្រឹក្សាខេត្ត ឯកឧត្តម លោកជំទាវ ជាសមាជិកក្រុមប្រឹក្សាខេត្ត អភិបាលរងខេត្ត ប្រធានសាលាដំបូងខេត្ត ព្រះរាជអាជ្ញានៃអយ្យការអមសាលាដំបូងខេត្ត កងកម្លាំងប្រដាប់អាវុធទាំង៣ ថ្នាក់ដឹកនាំមន្ទីរអង្គភាពនានាជុំវិញខេត្ត អាជា្ញធរស្រុក ក្រុង ឃុំ សង្កាត់ មេប៉ុស្តិ៍ មន្ត្រីរាជការសាលាខេត្ត និងអ្នកពាក់ព័ន្ធជាច្រើនរូបទៀត នាព្រឹកថ្ងៃទី២០ ខែមករា ឆ្នាំ២០២៥។

ក្នុងឱកាសនោះ ឯកឧត្តម គីម រិទ្ធី ឯកឧត្តមបានថ្លែងបញ្ជាក់ថា យើងជួបជុំគ្នានៅក្នុងអង្គសន្និ បាតនៅថ្ងៃនេះ គឺដើម្បីរួមគ្នាធ្វើការវាយតម្លៃអំពីសមិទ្ធផល ការងារ ដែលសម្រេចបានក្នុងឆ្នាំ២០២៤ នៅក្នុងក្របខ័ណ្ឌ នៃការអនុវត្តតួនាទីភារកិច្ចស្រប តាមច្បាប់កំណត់ និងកិច្ចសហការសម្របសម្រួលកិច្ចការ នានា ជាពិសេសការកំណត់ទិស ដៅការងារសម្រាប់អនុវត្តន៍ក្នុងឆ្នាំបន្ទាប់ ស្របតាមកម្មវិធីនយោបាយរបស់រាជរដ្ឋាភិបាល ដែលបានដាក់ចេញ។ ទន្ទឹមនឹងនេះដែរ អង្គសន្និបាតនឹងធ្វើការបែងចែកក្រុមពិភាក្សាលើប្រធាន បទសំខាន់ៗចំនួន៤ ដែលផ្តោតសំខាន់លើ ការពង្រឹងសន្តិសុខសណ្តាប់ធ្នាប់សាធារណៈ, ការលើកកម្ពស់ការអភិវឌ្ឍស្ថាប័ន និងធនធានមនុស្ស, ការលើកកម្ពស់ការផ្តល់សេវា, និងការគ្រប់គ្រង ធនធានធម្មជាតិ ដើម្បីពិភាក្សាផ្លាស់ប្តូរយោបល់ ចែករំឡែកបទពិសោធន៍ផ្សេងៗ និងប្រមូល ធាតុចូលពីសមាជិក សមាជិកា នៃអង្គសន្និបាត ដាក់ចេញជាទិសដៅការងារ និងគោល ការណ៍សំខាន់ៗសម្រាប់អនុវត្តក្នុងឆ្នាំ២០២៥ ខាងមុខ។

ជាមួយគ្នានេះដែរ ឯកឧត្តមអភិបាលខេត្តបានសង្ឃឹមជឿជាក់ថា ឯកឧត្តម លោកជំទាវ លោក លោកស្រីសមាជិក សមាជិកា នៃអង្គសន្និបាតទាំងអស់នឹង ខិតខំយកចិត្តទុកដាក់ស្តាប់ ព្រមទាំងចូលរួមក្នុងក្រុមពិភាក្សា ដែលនឹងបែងចែកទៅតាម ប្រធានបទសំខាន់ៗ ដើម្បីផ្លាស់ប្តូរយោបល់ និងចែករំឡែកបទពិសោធន៍ អំពីវឌ្ឍនភាពការងារ បញ្ហាប្រឈម ដំណោះស្រាយ និងសំណូមពរ សម្រាប់ជាទិសដៅការងារអនុវត្តន៍បន្ត នៅក្នុង ឆ្នាំ២០២៥នេះ៕

ដោយ៖ រិទ្ធី ប្រភព៖ មន្ទីរព័ត៌មានខេត្តព្រះវិហារ