AKP ក្រចេះ ថ្ងៃទី២០ ខែមករា ឆ្នាំ២០២៥ -- អគាររបណ្ណាល័យ ដ៏ស្រស់ស្អាតមួយខ្នង១ខ្នងសាងសង់ពីបេតុងប្រក់ក្បឿង ទំហំ៨ម៉គុណ៧ម៉ែត្រ ដែលចំណាយថវិកាសាងសង់សរុប ២មុឺន៦ពាន់ ដូលារអាម៉េរិក ដែលជាការផ្ដួចផ្ដើមដឹកនាំសាងសង់ដោយ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជានាយកសាលាភូមិន្ទរដ្ឋបាល ព្រមទាំងកម្មសិក្សាការីវគ្គវិក្រឹតការមន្រ្តីជាន់ខ្ពស់ ឆ្នាំ២០២៤ ថ្នាក់វិន័យទាំង ៩៨ អង្គ/នាក់ នៃសាលាភូមិន្ទរដ្ឋបាល នៅរាជធានីភ្នំពេញ ។

ថ្លែងក្នុងពិធីដាក់សម្ពោធដាក់ឱ្យប្រើប្រាស់ជាផ្លូវការនាថ្ងៃទី ១៩ ខែមករា ឆ្នាំ ២០២៥ ក្នុងសាលាបឋមសិក្សាត្រពាំងទ្រាំង ស្ថិតនៅភូមិត្រពាំងទ្រាំង ឃុំចង្ក្រង ស្រុកចិត្តបុរី ខេត្តក្រចេះ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជានាយកសាលាភូមិន្ទរដ្ឋបាល មានប្រសាសន៍ថា សាលាភូមិន្ទរដ្ឋបាល ចុះមកជួយសាលាបឋមសិក្សាត្រពាំងទ្រាំងនេះ មិនមែនទើបតែពេលនេះលើកទី១នេះទេ គឺដំបូងគេបង្អស់ បានចុះមកជួយសាងសង់ផ្ទះគ្រូ បន្ទាប់មកបានជួយទិញដីសម្រាប់សង់សាលា ក្រោយមកទៀតបានសង់ជួយសងអគារសាលា ហើយពេលនេះគឺបានជួយសាងសង់អគារបណ្ណាល័យ១ខ្នងបន្ថែមទៀត ក្នុងគោលបំណងជួយផ្គត់ផ្គងដល់សិស្សានុសិស្សនៅតំបន់ដាច់ស្រយាល មួយនេះ ឱ្យមានលទ្ធិភាពគ្រប់គ្រាន់ក្នុងសិក្សារៀនសូត្រ បានគ្រប់គ្រាន់ទៅតាមកម្មវិធីសិក្សារបស់ក្រសួងអប់រំយុវជន និងកីឡា ដែលបានដាក់ចេញដោយសំដៅធ្វើយ៉ាងណាឱ្យសិស្សានុសិស្សរៀនកាន់តែពូកែ និងក្លាយជាអ្នកបន្តវេនដឹកនាំ បន្តវេនទៅជំនាន់ក្រោយ។  ជាមួយគ្នានោះ ឯកឧត្តម យក់ ប៊ុនណា ក៏បានថ្លែងអំណរគុណ យ៉ាងជ្រាលជ្រៅ ដល់កម្មសិក្សាការីវគ្គវិក្រឹតការមន្ត្រីជាន់ខ្ពស់ឆ្នាំ២០២៥ ថ្នាក់វិន័យទាំង ៩៨ អង្គ/នាក់ ដែលបានចូលរួមជាថវិកាជាសម្ភារសិក្សាក្តីក្នុងការកសាងអគារបណ្ណាល័នេះឡើង ដើម្បីទុកឱ្យសិស្សានុសិស្សនៃសាលាបឋមសិក្សាត្រពាំងទ្រាំង បានសិក្សាបានស្វែងយល់រៀនសូត្របន្ថែម ព្រោះនៅក្នុងអគារបណ្ណាល័យនេះ បានបំពាក់នូវគ្រឿងបរិក្ខា និងសម្ភារះបណ្ណាល័យជាច្រើន រួមមាន សៀវភៅសិក្សាតាមកម្មវិធីសិក្សារបស់ក្រសួងអប់រំយុវវជន និងកីឡា ចាប់ពីថ្នាក់ទី១ ដល់ថ្នាក់ទី៦ ហើយក៏មាន តុ កៅ អី ជាច្រើនសម្រាប់ឱ្យសិស្សាអង្គុយអានសៀវភៅបានងាយស្រួល។ ឯកឧត្តម រដ្ឋលេខាធិការ ប្រចាំការ និងជានាយកសាលាភូមិន្ទរដ្ឋបាលបានផ្ដាំផ្ញើដល់លោកគ្រូ អ្នកគ្រូសិស្សានុសិស្ស ទាំងអស់សូមចូលរួមថែទាំសមិទ្ធផលដែលបានកកើតឡើងហើយនោះ ប្រើប្រាស់បានគង់វង្សយូរអង្វែង។

ក្នុងឱកាសនោះដែរ ឯកឧត្តម គណៈអធិបតី បានផ្តល់សរសើរប័ណ្ណ ដល់កម្មសិក្សាការីវិវគ្គវិក្រឹតការមន្ត្រីជាន់ខ្ពស់ ថ្នាក់វិន័យ ទាំង ៩៨ អង្គ/នាក់ និងបានចែកសម្ភារសិក្សា រួមនឹងថវិកាមួយចំនួន ដល់សិស្សានុសិស្ស លោកគ្រូ អ្នកគ្រូ អាណាព្យាបាលសិស្ស ផងដែរ៕

ដោយ៖ រិទ្ធី ប្រភព៖ មន្ទីរព័ត៌មានខេត្តក្រចេះ