AKP កំពង់ឆ្នាំង ថ្ងៃទី២០ ខែមករា ឆ្នាំ២០២៥ -- លោក សរ លាង ប្រធានមន្ទីរធម្មការ និងសាសនាខេត្តកំពង់ឆ្នាំង បានមានប្រសាសន៍ក្នុងពិធីបើកកញ្ចប់វិញ្ញាសាប្រឡងយកវិញ្ញាបនបត្រធម្មវិន័យពុទ្ធិកបឋមសិក្សា (បាលីរង)  នៅមណ្ឌលប្រឡងវត្តអារញ្ញិការាម ស្ថិតក្នុងសង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង កាលពីថ្ងៃទី១៩ ខែមករា ឆ្នាំ២០២៥  ដោយមានការអញ្ជើញចូលរួមពីគណសង្ឃខេត្ត ប្រតិភូនៃក្រសួងធម្មការ និងសាសនា ព្រះធម្មវិន័យធរគណខេត្ត ព្រះលេខាធិការគណខេត្ត ព្រះអនុគណស្រុក ព្រះជំនួយសាលាគណខេត្ត ប្រតិភូក្រសួង មន្រ្តីសង្ឃស្រុក និងសមណសិស្សផងដែរ។

ក្នុងឱកាសនោះ លោក សរ លាង បានមានប្រសាសន៍ថា វិស័យពុទ្ធិកសិក្សាពិតជាមានសារៈសំខាន់ណាស់ និងជាឆ្អឹងខ្នងដ៏រឹងមាំរបស់ព្រះពុទ្ធសាសនា ដូច្នេះហើយទើបរាជរដ្ឋាភិបាលកម្ពុជា ដែលមានសម្ដេចបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ជាប្រមុខដឹកនាំប្រកបដោយគតិបណ្ឌិតដ៏ខ្ពង់ខ្ពស់ តាមរយៈក្រសួងធម្មការ និងសាសនា បានដាក់ចេញនូវគោលនយោបាយជាយុទ្ធសាស្ត្រ ដើម្បីចូលរួមចំណែកក្នុងការអភិវឌ្ឍវិស័យពុទ្ធិកសិក្សាសាសនានេះឡើង។

 
ទន្ទឹមនឹងនេះ លោកបានបន្តថា ការបង្ហាញហិបវិញ្ញាសាជូនដល់បេក្ខជនប្រឡង ពិនិត្យភាពបិទជិត មានបិទស្កុត និងត្រាស្រោមប្រធានវិញ្ញាសា នៅចំពោះមុខបេក្ខជន ដើម្បីធានាបានថា ការប្រឡងប្រព្រឹត្តទៅដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។ ក្មួយៗសមណសិស្សទាំងអស់ត្រូវថែរក្សាសុខភាពឱ្យបានល្អ ជាពិសេសនៅថ្ងៃប្រឡង និងខិតខំធ្វើវិញ្ញាសាប្រឡងឱ្យអស់ពីសមត្ថភាពព្រមទាំងគោរពតាមបទបញ្ជាផ្ទៃក្នុង នៅពេលប្រឡងឱ្យបានល្អ ដើម្បីថែរក្សាសន្តិសុខ សុវត្ថិភាព និងរក្សាសណ្ដាប់ធ្នាប់ របៀបរៀបរយពេលប្រឡង ពិសេសជោគជ័យក្នុងការប្រឡង ស័ក្ដិសមជាទំពាំងស្នងឫស្សី ជាសសរទ្រូងប្រទេសជាតិ។

ក្នុងឱកាសនោះ ព្រះរតនមុនីញាណ កែវ មុនី ព្រះធម្មធរគណខេត្តកំពង់ឆ្នាំង មានសង្ឃដីកាថា ការពង្រឹងគុណភាពវិស័យអប់រំ ពោលគឺលើកកម្ពស់នូវចំណេះដឹងសមត្ថភាព សីលធម៌ មនសិការ ស្នេហាជាតិ និងស្មារតីទទួលខុសត្រូវ។ សម្រាប់បេក្ខជនគ្រប់រូប គ្រប់ព្រះអង្គ ដែលបានខិតខំរៀនសូត្រអស់រយៈពេលពេញមួយឆ្នាំ។ ដើម្បីធ្វើការវាស់ស្ទង់ និងបង្ហាញអំពីសមត្ថភាពចំណេះដឹង និងការប្រឡងប្រកបដោយគុណភាព ព្រោះតែកើតចេញពីឆន្ទៈ និងការព្យាយាមសម្រាប់សិក្សារៀនសូត្រ។ ក្មួយៗសិស្សានុសិស្ស និងសមណសិស្ស បេក្ខជនប្រឡងទាំងអស់ខិតខំយកចិត្តទុកដាក់ពង្រឹងស្មារតី យកអស់កម្លាំងកាយចិត្តបញ្ចេញបញ្ញាវាងវៃ ដើម្បីដណ្ដើមយកជោគជ័យឱ្យទាល់តែបានដើម្បីបន្តការសិក្សា នៅមធ្យមសិក្សាជាបន្តបន្ទាប់ខាងមុខទៀត៕

ដោយ បៃ ស៊ីថុន