AKP ព្រះសីហនុ ថ្ងៃទី២០ ខែមករា ឆ្នាំ២០២៥ -- ឯកឧត្តម ម៉ាង ស៊ីណេត ប្រធានគណ:កម្មាធិការសាខាកាកបាទក្រហមកម្ពុជាខេត្តព្រះសីហនុ អញ្ជើញចែកអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះប្រជាពលរដ្ឋរងគ្រោះដោយខ្យល់កន្ត្រាក់ចំនួន១ ៣៥៤គ្រួសារ មកពីឃុំចំនួន៦ ក្នុងស្រុកព្រៃនប់ នៃខេត្តព្រះសីហនុ នៅអាហាដ្ឋានឡេងទ្រី ដោយមានការចូលរួមពីអ្នកតំណាងរាស្ត្រមណ្ឌលខេត្តព្រះសីហនុ  និងសប្បុរសជន នារសៀលថ្ងៃអាទិត្យទី១៩ ខែមករា ឆ្នាំ២០២៥។

លោក អ៊ី ធារិន ប្រធានអនុគណ:កម្មការធិការសាខាកាកបាទក្រហមស្រុកព្រៃនប់ បានធ្វើរបាយការណ៍ស្តីពីខ្យល់កន្ត្រាក់រយៈពេលពីរថ្ងៃ គឺចាប់ពីថ្ងៃទី១១ និងថ្ងៃ១២ ខែមករា ឆ្នាំ២០២៥នេះ ធ្វើឱ្យប៉ះពាល់ដល់ផ្ទះប្រជាពលរដ្ឋក្នុងឃុំចំនួន៦ មានចំនួន១៣៥៤ខ្នងផ្ទះ រលំចំនួន ០៣ខ្នង និងរបើកដំបូលចំនួន ១.៣៥១ខ្នង ក្នុងនោះ៖ ១.ឃុំសាមគ្គី របើកដំបូលផ្ទះចំនួន ៤៣២ខ្នងផ្ទះ ២.ឃុំទឹកល្អក់របើកដំបូលចំនួន ៣៥៧ខ្នងផ្ទះ និងរលំ ០២ខ្នងផ្ទះ ៣.ឃុំទឹកថ្លារបើកដំបូល ៥៥៩ខ្នងផ្ទះ និងរលំ ០១ខ្នងផ្ទះ ៤.ឃុំវាលរេញរបើកដំបូល ០១ខ្នងផ្ទះ ៥.ឃុំសំរុង របើកដំបូល ០៤ខ្នងផ្ទះ និង៦.ឃុំបឹងតាព្រហ្ម របើកដំបូល ០១ខ្នងផ្ទះ ធ្វើឱ្យខូចខាតស័ង្កសីចំនួន ៧.២៦៤សន្លឹក។

ឯកឧត្តម ម៉ាង ស៊ីណេត ប្រធានគណៈកម្មាធិការសាខាកាកបាទក្រហមកម្ពុជា ខេត្តព្រះសីហនុ បានធ្វើការសំណេះសំណាល និងបានថ្លែងអំណរគុណសប្បុរសជនដែលបានចូលរួមនាពេលនេះ និងសូមចូលរួមសោកស្តាយគ្រោះធម្មជាតិខ្យល់កន្ទ្រាក់ដែលបានធ្វើឱ្យមានការបាត់បង់ខូចខាតទ្រព្យសម្បត្តិ ហើយអំណោយទាំងអស់នេះវាអាចជួយបានមួយគ្រា ដែលជាគោលការណ៍របស់សម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា ដែលតែងតែយកចិត្តទុកដាក់ និងធ្វើការណែនាំឱ្យសាខាកាកបាទក្រហមជួយពុកម៉ែជួបការលំបាក។ នេះជាទឹកចិត្ត និងស្មារតីនៃមាតាមនុស្សធម៌ ព្រមទាំងបានធ្វើការផ្តាំផ្ញើសួរសុខទុកពីសម្តេចតេជោ ហ៊ុន សែន ប្រធានព្រឹទ្ធសភា ក៏ដូចជាសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ចំពោះគ្រោះធម្មជាតិខ្យល់កន្ត្រាក់ និងសូមចូលរួមសោកស្តាយដល់បងប្អូន ហើយអ្វីដែលយើងជួយបានក្នុងក្របខ័ណ្ឌកាកបាទក្រហម។ ចំពោះស័ង្កសី ក្រុមការងារនឹងរៀបចំចាត់ចែងចែកជូនពុកម៉ែ ពូមីងជាបន្តបន្ទាប់នៅពេលខាងមុខ។

ឯកឧត្តមប្រធានគណៈកម្មាធិការសាខាកាកបាទក្រហមកម្ពុជាខេត្តព្រះសីហនុ បានថ្លែងអំណរគុណចំពោះក្រុមការងារកាកបាទក្រហមខេត្ត ស្រុក និងអ្នកស្ម័គ្រចិត្តចាត់ចែកយកសម្ភារមកចែកជូនបងប្អូននាពេលនេះ។ នេះជាការចូលរួមលះបង់ក្នុងនាមគ្រួសារខ្មែរតែមួយ ស្របតាមគោលការណ៍គ្រឹះរបស់កាកបាទក្រហមកម្ពុជា ដោយមិនទុកចោលប្រជាពលរដ្ឋណាម្នាក់ដោយមិនបានយកចិត្តទុកដាក់នោះទេ គឺយកចិត្តទុកដាក់ប្រជាពលរដ្ឋគ្រប់រូបដែល មានការជួបការលំបាក។

ទន្ទឹមនឹងនេះ ឯកឧត្តមបានអំពាវនាវដល់ប្រជាពលរដ្ឋចូលរួមក្រោមម្លប់សន្តិភាព ដើម្បីកម្ពុជាមានការអភិវឌ្ឍ និងមានការវិនិយោគជាបន្តបន្ទាប់ ពិសេសការវិនិយោគនៅខេត្តព្រះសីហនុ ដែលខេត្តមានសក្តានុពលផ្លូវគោក ផ្លូវទឹក និងផ្លូវអាកាស ហើយជាចក្ខុវិស័យរបស់រាជរដ្ឋាភិបាលជំរុញការវិនិយោគនៅខេត្តព្រះសីហនុ និងសង្ឃឹមថា ខេត្តព្រះសីហនុទទួលភ្ញៀវទេសចរ និងអ្នកវិនិយោគកាន់តែច្រើននៅពេលខាងមុខ ហើយកូនចៅប្រជាពលរដ្ឋនឹងមានការងារកាន់តែច្រើន។ ផែនការយុទ្ធសាស្ត្របញ្ចកោណ ដំណាក់កាលទី១របស់រាជរដ្ឋាភិបាលផ្តោតសំខាន់ដូចជា ធនធានមនុស្ស ផ្លូវ ទឹក ភ្លើង និងបច្ចេកវិទ្យា ពិសេសការបណ្តុះបណ្តាលវិស័យអប់រំ ការរៀបចំប្រព័ន្ធសុខាភិបាល ព្រមទាំងបានធ្វើការផ្តាំផ្ញើដល់ស្ត្រីដែលមានផ្ទៃពោះ សូមអញ្ជើញទៅពិនិត្យសុខភាព ដើម្បីសុខភាពមាត៌ា និងទារក នេះជាការយកចិត្តទុកដាក់របស់រាជរដ្ឋាភិបាលកម្ពុជា។

សូមជម្រាបជូនថា អំណោយរបស់សម្តេចកិត្តិព្រឹទ្ធបណ្ឌិតដែលចែកជូនប្រជាពលរដ្ឋរងគ្រោះខ្យល់កន្ទ្រាក់ចំនួន ១ ៣៥៤គ្រួសារ ក្នុងមួយគ្រួសារទទួលបានអង្ករ ២៥គីឡូក្រាម មី១កេស ត្រីខ១០កំប៉ុង ទឹកត្រី១យួរ កន្ទេល១ ឃីតមួយកញ្ចប់ (សារុង១ ក្រមា១ មុង១ ភួយ១) និងថវិកា៥០ ០០០រៀល។ ដោយឡែកអ្នករលំផ្ទះ០៣គ្រួសារ ឧបត្ថម្ភ១គ្រួសារ តង់១ សម្ភារផ្ទះបាយ១ឈុត និងថវិកា ១លានរៀល៕

ដោយ ងូ សុមុនី