AKP ព្រះសីហនុ ថ្ងៃទី២០ ខែមករា ឆ្នាំ២០២៥ -- ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ អញ្ជើញដឹកនាំប្រតិភូខេត្តធ្វើទស្សនកិច្ច ពិនិត្យស្ថានភាពនៃការអភិវឌ្ឍន៍របស់តំបន់សេដ្ឋកិច្ចពិសេសក្រុងព្រះសីហនុ កាលពីព្រឹកថ្ងៃទី១៩ ខែមករា ឆ្នាំ២០២៥។

លោក Chen Jiangang ប្រធានក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ បានស្វាគមន៍ប្រតិភូខេត្តព្រះសីហនុ អញ្ជើញសួរសុខទុក្ខក្នុងឱកាសបុណ្យចូលឆ្នាំចិន និងពិនិត្យវឌ្ឍនភាពនៃការអភិវឌ្ឍរបស់តំបន់សេដ្ឋកិច្ចពិសេសក្រុងព្រះសីហនុ និងសូមជូនពរឱ្យថ្នាក់ដឹកនាំខេត្ត មានសុខភាពល្អទទួលបានជោគជ័យគ្រប់ភារកិច្ច ក្រោមការដឹកនាំរបស់រាជរដ្ឋាភិបាលអាណត្តិទី៧  ក៏ដូចជាការដឹកនាំរបស់ឯកឧត្តម ម៉ាង ស៊ីណេត អភិបាលខេត្តព្រះសីហនុ ដែលបានគាំទ្រដល់តំបន់សេដ្ឋកិច្ចពិសេសក្រុងព្រះសីហនុមានការអភិវឌ្ឍជាបន្តរហូតដល់បច្ចុប្បន្ន ក្នុងឆ្នាំ២០២៤ តំបន់សេដ្ឋកិច្ចពិសេសក្រុងព្រះសីហនុ បានធ្វើការនាំចេញនាំចូលសម្រេចបាន ៤ ៧០៨លានដុល្លា កើនឡើង៧,៥ភាគរយ ដែលមានរោងចក្រ សហគ្រាសចំនួន២០២ មានបុគ្គលិក កម្មករចំនួន ៣២ ០០០នាក់។ តំបន់បានចុះកិច្ចព្រមព្រៀងជាមួយក្រុមហ៊ុន VID។

លោកប្រធានក្រុមហ៊ុនតំបន់សេដ្ឋកិច្ចពិសេសបានបន្តថា ក្រោមការដឹកនាំតាមយុទ្ធសាស្ត្របញ្ចកោណ ទឹកប្រាកនាំចេញនាំចូលមាន៥ពាន់លានដុល្លាអាមេរិក ព្រមទាំងបានថ្លែងអំណរគុណចំពោះអភិបាលខេត្ត ដែលបានផ្តល់ការយកចិត្តទុកដាក់ដល់ក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ។ ទន្ទឹមនោះឆ្នាំ២០២៥ ធ្វើឱ្យស្ពានទំនាក់ទំនងរវាងខេត្តព្រះសីហនុ និងខេត្តជាំងស៊ូប្រទេសចិន ហើយថ្នាក់ដឹកនាំខេត្តជាំងស៊ូនឹងមកទស្សនកិច្ចនៅខេត្តព្រះសីហនុ ព្រមទាំងបានអញ្ជើញអភិបាលខេត្តទៅធ្វើទស្សនកិច្ចនៅខេត្តជាំងស៊ូ ប្រទេសចិននាពេលខាងមុខ ព្រោះខេត្តជាំងស៊ូ និងខេត្តព្រះសីហនុ មានកិច្ចសហប្រតិបត្តិការសេដ្ឋកិច្ច ពាណិជ្ជកម្ម វប្បធម៌ និងអប់រំ ហើយនៅឆ្នាំ២០២៥នេះ តំបន់សេដ្ឋកិច្ចពិសេសក្រុងព្រះសីហនុ និងរៀបចំអបអរសាទរសហគ្រាស២០០មកធ្វើការវិនិយោគក្នុងតំនប់សេដ្ឋកិច្ច ក៏បានធ្វើការសំណូមពរមានដូចជា៖ ការគាំទ្រតំបន់សេដ្ឋកិច្ចពិសេស បង្កើតតំបន់ពាណិជ្ជកម្ម សម្របសម្រួលដល់រថយន្តដឹកទំនិញ ទឹកស្អាតទឹកស្អាត បញ្ហាដីធ្លី ពង្រីកតំបន់សេដ្ឋកិច្ចពិសេស បរិស្ថាន។

ឯកឧត្តម ម៉ាង ស៊ីណេត បានដឹកនាំមន្ត្រីចុះពិនិត្យវឌ្ឍនភាពសាលពិព័រណ៍តំបន់សេដ្ឋកិច្ចពិសេសក្រុងព្រះសីហនុ និងបន្តពិនិត្យរោងចក្រផលិតសំបកកង់រថយន្តរបស់ក្រុមហ៊ុន ជេនេរ៉ល ថាយអឺរ ថេកណឡជី (ខេមបូឌា) ឯ.ក ហើយសមិទ្ធ ផលដែលកើតចេញពីការខិតខំរបស់ថ្នាក់ដឹកនាំប្រទេសទាំងពីរ ខ្សែក្រវ៉ាត់ និងផ្លូវរបស់ប្រធានាធិបតីស៊ីជិនពីង និងយុទ្ធសាស្តចតុកោណរបស់សម្តេចតេជោ អតីតនាយករដ្ឋមន្ត្រីកម្ពុជា បន្តមកសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បន្តយុទ្ធសាស្ត្របញ្ចកោណ ដំណាក់កាលទី១ ហើយភាពស៊ីចង្វាក់គ្នាបន្តនិរន្តភាពមកដល់បច្ចុប្បន្ន។  ម្យ៉ាងទៀតក្រុមប្រឹក្សាតំបន់បានធ្វើការអភិវឌ្ឍពីបាតដៃទទេ រហូតដល់មានរោងចក្រ១០០ បន្តកើនឡើងរហូតដល់ជាង២០០រោងចក្រ សហគ្រាស ហើយវឌ្ឍនភាពនេះ សម្តេចតេជោចាត់ទុកតំបន់សេដ្ឋកិច្ចពិសេសជាកូនបង្កើតរបស់សម្តេច  ហើយយើងជាអាជ្ញាធរដែនដី សូមគាំទ្រនិងទាក់ទាញអ្នកវិនិយោមកកាន់តំបន់សេដ្ឋកិច្ចពិសេសក្រុងព្រះសីហនុកាន់តែច្រើនបន្ថែមទៀត ដើម្បីធ្វើការប្រកួតប្រជែងជាមួយតំបន់សេដ្ឋកិច្ចពិសេសនៅស្វាយរៀង។ ប្រសិនតំបន់ត្រូវការ យើងខ្ញុំនឹងចូលរួមសហការគ្រប់ពេលវេលា យើងធ្វើការជាមួយគ្នា ដើម្បីឱ្យអ្នកវិនិយោគមានការជឿជាក់មកកាន់តំបន់សេដ្ឋកិច្ចពិសេសក្រុងព្រះសីហនុ។

ឯកឧត្តមអភិបាលខេត្តបានកោតសរសើរចំពោះប្រធានតំបន់សេដ្ឋកិច្ចពិសេស ដែលមានរោងចក្រ២០២ នឹងជួយដល់ប្រជាពលរដ្ឋមានការងារចំនួន៣២ ០០០នាក់ ក្នុងដំណាក់កាលកូវីដ-១៩ តំបន់សេដ្ឋកិច្ចនៅតែបន្តការងារជួយដល់ប្រជាពលរដ្ឋ និងសូមអបអរសាទរតំបន់សេដ្ឋកិច្ចពិសេស បានចុះកិច្ចសហការជាមួយក្រុមហ៊ុន VID ក្នុងការទាក់ទាញអ្នកវិនិយោគមកកាន់កម្ពុជា ពិសេសមកកាន់ខេត្តព្រះសីហនុ ក្នុងដំណើរទស្សនកិច្ចនាពេលនេះ បានឃើញផលិតកម្មក្នុងរោងចក្រ អាចនិយាយបានថា ក្រុមហ៊ុនផលិតកង់រថយន្តមានបច្ចេកទេសខ្ពស់ជាងគេនៅកម្ពុជា ហើយវឌ្ឍនភាព និងភាពរុងរឿង និងខ្សែច្រវ៉ាក់ផលិតកម្មនាំចេញ នាំចូលរបស់រោងចក្រ។ ក្នុងនាមរដ្ឋបាលខេត្ត នឹងទៅធ្វើទស្សនកិច្ចនៅខេត្តជាំងស៊ូនៅពេលវេលាសមស្របណាមួយ ដើម្បីជួបអ្នកវិនិយោគមកកាន់តំបន់សេដ្ឋកិច្ចពិសេសក្រុងព្រះសីហនុបន្ថែមទៀត។ អរគុណតំបន់បានធ្វើការបណ្តុះបណ្តាលនូវជំនាញវិជ្ជាជីវៈដល់កូនចៅប្រជាពលរដ្ឋ ពិសេសបានជួយដល់ការបណ្តុះបណ្តាលលើវិស័យអប់រំ ដូចជាការជួយអភិវឌ្ឍសាលារៀន បន្ទប់ទឹកសាធារណៈ សួនច្បារ នៅសាលាបិតត្រាំង សូមក្រុមហ៊ុនភ្ជាប់ជាមួយសាលាផ្សេងទៀតពាក់ព័ន្ធទៅនឹងបរិស្ថាន អនាម័យ។

ចំពោះសំណូមពររបស់តំបន់មានដូចជា៖ ការគាំទ្រតំបន់សេដ្ឋកិច្ចពិសេស បង្កើតតំបន់ពាណិជ្ជកម្ម សម្របសម្រួលដល់រថយន្តដឹកទំនិញ ទឹកស្អាតទឹកស្អាត បញ្ហាដីធ្លី ពង្រីកតំបន់សេដ្ឋកិច្ចពិសេសបរិស្ថាន និងខិតខំទាក់ទាញអ្នកវិនិយោគមកកាន់តំបន់សេដ្ឋកិច្ច បន្តការដាំដុះដើមឈើឪ្យមានភាពបៃតង រដ្ឋបាលខេត្តទទួលយក និងជួយសម្របសម្រួលនូវអ្វីដែលជាក្តីកង្វល់របស់តំបន់សេដ្ឋកិច្ចពិសេស៕

ដោយ ងូ សុមុនី