AKP ពោធិ៍សាត់ ថ្ងៃទី២០ ខែមករា ឆ្នាំ២០២៥ -- សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាព្រឹកថ្ងៃចន្ទ ទី២០ ខែមករា ឆ្នាំ២០២៥នេះ អញ្ជើញជាអធិបតី ក្នុងពិធីសម្ពោធសមិទ្ធផលនានានៅមណ្ឌលអភិវឌ្ឍន៍អតីតយុទ្ធជន ភូមិប៊ុនរ៉ានីសែនជ័យដំណាក់ទ្រយឹង ស្ថិតនៅឃុំព្រងិល ស្រុកភ្នំក្រវាញ ខេត្តពោធិ៍សាត់។

មណ្ឌលអភិវឌ្ឍន៍អតីតយុទ្ធជនប៊ុនរ៉ានីសែនជ័យដំណាក់ទ្រយឹង ជាដីសម្បទានសង្គមកិច្ច ស្ថិតនៅភូមិប៊ុនរ៉ានីសែនជ័យដំណាក់ទ្រយឹង ដែលជាភូមិបានបំបែកចេញពីភូមិសាយ ឃុំព្រងិល ស្រុកភ្នំក្រវាញ ខេត្តពោធិ៍សាត់ ត្រូវបានផ្តួចផ្តើមរៀបចំ និងបង្កើតឡើងប្រកបដោយចក្ខុវិស័យ វែងឆ្ងាយ និងឈ្លាសវៃរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទ ក្រហមកម្ពុជា។ នៅអំឡុងឆ្នាំ២០២០ រដ្ឋបាលខេត្តពោធិ៍សាត់ ដែលមានឯកឧត្តមបណ្ឌិត ម៉ៅ ធនិន អភិបាលខេត្ត នាពេលនោះ និងឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រីទទួលបន្ទុក បេសកកម្មពិសេស បានរៀបចំត្រួសត្រាយ និងបែងចែកដីលំនៅឋាន និងដីកសិកម្មជូនអតីតយុទ្ធជន ទាំង ៦២៨គ្រួសារ ដោយ ១គ្រួសារទទួលបានដីទំហំ ១០.៥០០ម៉ែត្រការ៉េ។ ដោយសារពេលនោះ នៅតំបន់នេះមានការរំលោភទន្ទ្រានពីជនខិលខូចមួយចំនួន ទើបរដ្ឋបាលខេត្ត សម្រេចចាត់តាំងឧត្តម សេនីយ៍ឯក ប៉ែន ណាវណ្ណ ដែលពេលនោះជា មេបញ្ជាការតំបន់ប្រតិបត្តិការសឹករងខេត្ត ដឹកនាំ គ្រប់គ្រងរហូតតំបន់នេះមានសុវត្ថិភាពដីធ្លី។ ដោយពិនិត្យឃើញពីការលំបាករបស់បងប្អូនអតីត យុទ្ធជន គ្មានផ្ទះក្នុងការស្នាក់នៅ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស ក៏បានស្នើសុំផ្ទះពីកាកបាទក្រហមកម្ពុជា ដែលមាន ហ្លួងម៉ែ នរោត្តមមុនិនាថ សីហនុ ជាព្រះប្រធានកិត្តិយស និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ហើយសម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា ក៏បានសម្រេចផ្តល់ផ្ទះទំហំ ៧ម៉ែត្រ x ៥ម៉ែត្រ មានថែមដំបូលខាងក្រោយ និងបន្ទប់ទឹកសម្រាប់អតីតយុទ្ធជនទាំងអស់ចំនួន ៦២៨ខ្នង ដែលបានបញ្ចប់ការសាងសង់នៅថ្ងៃទី២២ ខែវិច្ឆិកា ឆ្នាំ២០២១ និងបានប្រគល់ជាលើកចុងក្រោយ នាថ្ងៃទី១៨ ខែមីនា ឆ្នាំ២០២២ រួមទាំងការឈូសឆាយ និងភ្ជួរដីដើម្បីដាំដំណាំលើដីដ៏មានជីវជាតិល្អ ខួងអណ្តូងទឹកតាមផ្ទះចំនួន ២៦១អណ្តូង ក្នុងនោះកាកបាទក្រហមកម្ពុជាចំនួន ១៩០អណ្តូង និង លោកជំទាវ ហ៊ុន ម៉ាណា ចំនួន ៧១អណ្តូង, ផ្តល់ពាងទឹកគ្រប់ខ្នងផ្ទះ, រៀបចំដាំបង្គោលរបងតាម ដីឡូតិ៍នីមួយៗ, ដំឡើងអំពូលសូឡា, តបណ្តាញអគ្គិសនីស្ថាបនាផ្លូវ, សាងសង់សាលារៀន, សាងសង់ មណ្ឌលសុខភាព, និងផ្តល់ពូជសត្វ ពូជត្រី និងពូជដំណាំជាច្រើនមុខផងដែរ។

ក្នុងគោលដៅរៀបចំភូមិនេះឱ្យក្លាយទៅជាភូមិគំរូ សម្រេចបាននូវអនុសាសន៍ដឹកនាំ ដ៏ខ្ពង់ខ្ពស់របស់ សម្តេចកិត្តិព្រឹទ្ធបណ្ឌិត មាតាមនុស្សធម៌របស់យើង បច្ចុប្បន្ន។ អភិបាលខេត្តពោធិ៍សាត់ បច្ចុប្បន្នដែលបន្តការ ដឹកនាំពីឯកឧត្តមអភិបាលខេត្តមុនៗ និងឯកឧត្តម កែវ រតនៈ ប្រធានក្រុមការងាររាជរដ្ឋាភិបាល ចុះមូលដ្ឋានខេត្ត បានរៀបចំដាក់បង្គោលភ្លើងសូឡានៅមណ្ឌលសុខភាព, សាលារៀន, និងផ្លូវ សំខាន់ៗចំនួន ២០០ដើម, ដំឡើងប៉ាណូរូបថ្នាក់ដឹកនាំនៅទីតាំងសំខាន់ៗចំនួន ៣៤ផ្ទាំង, កែលម្អ អាងស្តុកទឹកស្អាត, ដាំដើមឈើ និងរៀបចំសួនច្បារ, ផ្តល់សម្ភារៈ ថវិកា និងឧបត្ថម្ភគាំទ្រគ្រឿង បរិភោគដល់បុគ្គលិកមណ្ឌលសុខភាព គ្រូបង្រៀន និងមន្ត្រីភូមិបណ្តោះអាសន្ន, ផ្តល់ស្បៀង សម្ភារៈ និងថវិកាដល់គ្រួសារអតីតយុទ្ធជនទាំងអស់, បំផុស និងណែនាំសកម្មភាពចងសម្ព័ន្ធមេត្រីភាព រវាងមន្ទីរ អង្គភាពរបស់ខេត្ត ជាមួយគ្រួសារអតីតយុទ្ធជនទាំងអស់ ជាពិសេសតែងតែចុះសួរសុខទុក្ខពេលបុណ្យទានម្តងៗ និងឧបត្ថម្ភគាំទ្រជាបន្តបន្ទាប់ ដើម្បីកាន់តែផ្សារភ្ជាប់មនោសញ្ចេតនា ទៅវិញទៅមកជាមួយអតីតយុទ្ធជន។

ទន្ទឹមនេះ រៀបចំបង្កើតភូមិទៅជាភូមិផ្លូវការ, បង្កើតវត្ត និង សាងសង់សាលាឆាន់ កុដិ ដើម្បីជាកន្លែងសម្រាប់គោរពបូជាតាមប្រពៃណីព្រះពុទ្ធសាសនា ដែល បច្ចុប្បន្នមានព្រះសង្ឃគង់នៅចំនួន ៥អង្គ និងអាចារ្យ គណៈកម្មការចំនួន ៧នាក់។ ជាមួយគ្នានេះ កំពុងសហការជាមួយក្រសួងអភិវឌ្ឍន៍ជនបទ និងកងវិស្វកម្មសម្តេចតេជោជួសជុលផ្លូវបានចំនួន ៧ខ្សែ រួមនឹងសំណង់សិល្បកា និងផ្លូវចំនួន ៧ខ្សែទៀតប្រវែង ២៧,៤គីឡូម៉ែត្រត្រូវរៀបចំផែនការ ស្នើសុំសាង់សង់បន្ត។ក្នុងវេលាដ៏មហាប្រសើរនេះ ឯកឧត្តមអភិបាលខេត្តពោធិ៍សាត់ បានថ្លែងអំណរគុណចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតាំងពីបង្កើតមណ្ឌលអភិវឌ្ឍន៍នេះ សម្តេចតែងតែណែនាំ និងលើកទឹកចិត្តជាប់ជាប្រចាំដល់ថ្នាក់ដឹកនាំមុនៗ និងរូបឯកឧត្តមអភិបាលខេត្តផ្ទាល់ក្នុងការរៀបចំ តំបន់អភិវឌ្ឍន៍នេះឱ្យក្លាយទៅជាភូមិគំរូសម្រាប់អតីតយុទ្ធជន ក៏ដូចជាសម្រាប់ឱ្យតាមបណ្តាខេត្ត ដែលមានដីសម្បទានសង្គមកិច្ចធ្វើការដកពិសោធន៍ និងយកជាគំរូតាម ទោះបីបច្ចុប្បន្ន រដ្ឋបាលខេត្ត ពិនិត្យឃើញថាពួកគាត់មួយចំនួនបានស្នាក់នៅជាអចិន្ត្រៃយ៍ ឯមួយចំនួនតូចរស់នៅមិនជាប់លាប់ ដោយសារផ្លូវក្នុងភូមិមិនទាន់បានល្អ និងដោយសារគ្រួសារអតីតយុទ្ធជនភាគច្រើនជាជនចាស់ជរា ខ្វះខាតជីវភាព និងមានជំងឺប្រចាំកាយត្រូវការរស់នៅជិតកូនចៅដើម្បីបានមើលថែ តែកូនចៅ របស់ពួកគាត់នៅឆ្ងាយពីតំបន់នេះ និងមួយចំនួនទៅពិនិត្យ និងព្យាបាលជំងឺ ដោយសារជំងឺខ្លះ មណ្ឌលសុខភាពនៅទីនេះមិនទាន់មានសមត្ថភាព និងលទ្ធភាពក្នុងការពិនិត្យព្យាបាល និងថ្លែងអំណរគុណចំពោះ ឯកឧត្តមកិត្តិសង្គហបណ្ឌិត គន់ គីម អនុប្រធាន និងជាអគ្គលេខាធិការ សមាគមអតីតយុទ្ធជន, ឯកឧត្តមនាយឧត្តមសេនីយ៍ ជា តារា និងអគ្គលេខាធិការរងសមាគម អតីតយុទ្ធជនដែលបានជួយជ្រោមជ្រែង ជាពិសេស ឯកឧត្តមកិត្តិសង្គហបណ្ឌិត គន់ គីម ដែលក្នុង នាមជាសេនាធិការជូន សម្តេចតេជោ ប្រធានសមាគម និង សម្តេចបវរធិបតី នាយករដ្ឋមន្ត្រី ជាអនុប្រធានទី១សមាគម តែងតែចុះមកពិនិត្យ រំលឹកដាស់តឿន ផ្តល់ការណែនាំ តម្រង់ទិស និង ដោះស្រាយការខ្វះខាតរបស់បងប្អូន និងបានបំផុសឱ្យមន្ទីរ អង្គភាពជុំវិញខេត្តទាំងអស់ចងសម្ព័ន្ធ មេត្រីភាពតាមបណ្តាខ្នងផ្ទះរបស់បងប្អូនអតីតយុទ្ធជន ដើម្បីជួយឧបត្ថម្ភគាំទ្រជាបន្តបន្ទាប់នៅ ពេលពួកគាត់ជួបការលំបាក ខ្វះខាត ហើយមិនថាការងារអតីតយុទ្ធជន ឬការងារគ្រប់គ្រង គ្រោះមហន្តរាយ ឯកឧត្តម តែងតែធ្វើការតាមដានជាប់ជាប្រចាំមិនគិតយប់ ឬថ្ងៃនោះឡើយ។ ឯកឧត្តម អភិបាលខេត្តពោធិ៍សាត ខូយ រីដា ក៏បានសម្តែងការកោតសរសើរ និងថ្លែងអំណរគុណចំពោះឯកឧត្តមបណ្ឌិត ម៉ៅ ធនិន អតីតអភិបាល ខេត្តពោធិ៍សាត់ ដែលបានលះបង់កម្លាំងកាយ ចិត្ត ស្មារតី ក្នុងការដឹកនាំ ពុះពារ តាំងពីដំបូងក្នុង ការរៀបចំបង្កើតភូមិប៊ុនរ៉ានីសែនជ័យដំណាក់ទ្រយឹង ដែលជាភូមិរបស់ សម្តេចកិត្តិព្រឹទ្ធបណ្ឌិត បានប្រគល់ឱ្យមើលការខុសត្រូវក្នុងនាម សម្តេចកិត្តិព្រឹទ្ធបណ្ឌិត ព្រមទាំងសូមកោតសរសើរ និងវាយតម្លៃខ្ពស់ចំពោះមន្ទីរ អង្គភាពជុំវិញខេត្ត ជាពិសេស ឧត្តមសេនីយ៍ឯក ប៉ែន ណាវណ្ណ អតីតមេបញ្ជាការតំបន់ប្រតិបត្តិការសឹករងខេត្ត ស្នងការនគរបាលខេត្ត តំបន់ប្រតិបត្តិការសឹករងខេត្ត មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត មន្ទីរអភិវឌ្ឍន៍ជនបទខេត្ត មន្ទីរសុខាភិបាលខេត្ត និងមន្ទីរអប់រំ យុវជន និង កីឡាខេត្ត ដែលបានពុះពារគ្រប់ការលំបាកក្នុងការរៀបចំភូមិរបស់ សម្តេចកិត្តិព្រឹទ្ធបណ្ឌិត ក្នុងរយៈពេល ៤ឆ្នាំនេះ បានយ៉ាងល្អ៕

ដោយ៖ គង់ សិរីរ័ត្ន