AKP ភ្នំពេញ ថ្ងៃទី១៩ ខែមករា ឆ្នាំ២០២៥-

ឯកឧត្តម នេត្រ ភក្រ្តា រដ្ឋមន្ត្រីក្រសួងព័ត៌មាន និងជាប្រធានកិត្តិយសសមាគមអភិរក្សដំរីខ្មែរអៃរាវត្តាបានលើកឡើងថា សមាគមមូលនិធិអភិរក្សដំរីខ្មែរអៃរាវត្តា បានចូលរួមយ៉ាងសំខាន់ធ្វើការផ្លាស់ប្តូរផ្នត់ គំនិតរបស់ប្រជាជនឱ្យយល់ និងផ្តល់ក្តីស្រឡាញ់ដល់សត្វព្រៃ ពិសេសសត្វដំរី សំដៅសំខាន់ក្នុងការរក្សាប្រពៃណី ទំនៀមទម្លាប់របស់ប្រជាជន ពិសេសជនជាតិដើមភាគតិច។

ឯកឧត្តមបានថ្លែងបញ្ជាក់ថា ដូច្នេះការរួមគ្នាគ្រប់ផ្នែកពាក់ព័ន្ធទាំងអស់ និងបងប្អូនប្រជាពលរដ្ឋក្នុងការការពារនិងអភិរក្សសត្វដំរីទាំងដំរីព្រៃ និងដំរីស្រុកនៅកម្ពុជា គឺជាចំណែកមួយយ៉ាងសំខាន់នៃការងារគ្រប់គ្រងធនធានធម្មជាតិ និងការអភិរក្សជីវៈចម្រុះឱ្យគង់វង្សល្អយូរអង្វែងទៅមុខទៀត។ ឯកឧត្តមបញ្ជាក់ទៀតថា ក្នុងរយៈពេលចុងក្រោយនេះ សន្ទុះវិជ្ជមាននៃការស្រឡាញ់ និងអភិរក្សសត្វព្រៃពី ប្រជាជនកម្ពុជាគឺមានចំនួនកាន់តែច្រើនឡើង ។

ការលើកឡើងរបស់ ឯកឧត្តមបែបនេះ ក្នុងឱកាសអញ្ជើញជាអធិបតីនៃកិច្ចប្រជុំជាមួយសមាជិកក្រុមប្រឹក្សាភិបាលសមាគមមូលនិធិអភិរក្សដំរីខ្មែរអៃរាវត្តា នាព្រឹកថ្ងៃទី១៩ ខែមករា ឆ្នាំ២០២៥ នៅទីស្តីការក្រសួងព័ត៌មាន ។ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ត្រូវបានជ្រើសតាំងជាប្រធានកិត្តិយសសមាគមអភិរក្សដំរីខ្មែរអៃរាវត្តា (Airavata) ដើម្បីចូលរួមក្នុងកិច្ចការងារថែរក្សា និងអភិរក្សសត្វដំរីក្នុងប្រទេសកម្ពុជាបានគង់វង្ស។

ឯកឧត្តមបានជម្រាបជូនថា បច្ចុប្បន្ននេះដំរីស្រុកមានប្រមាណជាង ៧០ក្បាលដែលបាននិងកំពុងត្រូវបានចិញ្ចឹមនៅតាមតំបន់នានា ខណៈដំរី ព្រៃមានចន្លោះពី ៤០០ ទៅ ៦០០ក្បាលដែលរស់នៅក្នុងព្រៃធម្មជាតិ ។

ឯកឧត្តម រដ្ឋមន្ត្រី បានគូសបញ្ជាក់ថា អ្វីៗដែលសមាគមអភិរក្សដំរីខ្មែរអៃរាវត្តា បានធ្វើកន្លងមកនេះ គឺជាសកម្មភាពគំរូរមួយដែលបានជួយដល់ការថែរក្សា ការពារនិងអភិរក្សសត្វដំរីព្រៃ និងដំរីស្រុក បានគង់វង្ស ហើយតាមរយៈនេះ ក្រសួងព័ត៌មាន នឹងបន្តផ្តល់ការគាំទ្រផ្នែកផ្សព្វផ្សាយដល់ សមាគមAiravata ដើម្បីចូលរួមបណ្តុះស្មារតីស្រឡាញ់និងអភិរក្សសត្វដំរីនៅកម្ពុជាឱ្យកាន់តែទូលំទូលាយបន្ថែមទៀត ។

ឯកឧត្តម រដ្ឋមន្ត្រី នេត្រ ភក្ត្រា ក្នុងនាមជាប្រធានកិត្តិយសសមាគមអភិរក្សដំរីខ្មែរអៃរាវត្តា បានធ្វើការអំពាវនាវដល់សប្បុរសជន នានាបន្តចូលរួមគាំទ្រថវិកាដើម្បីភ្ជាប់និស្ស័យជាមួយសមាគម ដើម្បីមានលទ្ធភាពពង្រឹងនឹងពង្រីកហើយផ្តល់សេចក្តីសុខដល់សត្វដំរីស្រុក ក៏ដូចជាព្យាយាមបង្កាត់ពូជអោយបានកូនច្រើនជាប្រភេទដំរីស្រុក ដើម្បីផ្តល់ជាការកំសាន្ត និងការអភិរក្សសត្វដំរីស្រុកនៅក្នុងប្រទេសកម្ពុជាបានគង់វង្ស ។

ឯកឧត្តមបានបន្ថែមថា ការចូលរួមពីគ្រប់ភាគីក្នុងការចូលរួមការពារនិងអភិរក្សសត្វដំរីនៅកម្ពុជាគឺជាចំណែកមួយយ៉ាងសំខាន់នៃការងារគ្រប់គ្រងធនធានធម្មជាតិ និងការអភិរក្សជីវៈចម្រុះ បានល្អយូរអង្វែងទៅមុខ ទៀត ។

លោកស្រី ក្លេ ខៃ ចិន្តា ប្រធានក្រុមប្រឹក្សាភិបាល សមាគមមូលនិធិអភិរក្សដំរីខ្មែរ អៃរាវត្តា បានបញ្ជាក់ថា គោលបំណងសំខាន់របស់ សមាគម AIRAVATA បានធ្វើជាច្រើនឆ្នាំមកនេះ គឺដើម្បីចូលរួម ចំណែកលើកស្ទួយវិស័យទេសចរណ៍ ការពារបរិស្ថាន លើកតម្កើងប្រពៃណីវប្បធម៌នៃបង្កាត់ពូជដំរីស្រុក ដើម្បីឱ្យមានកំណើនកូនដំរី បន្តនិរន្តរភាពនៃដំរីខ្មែរ ។

លោកស្រីបន្តថា ដូច្នេះការអំពាវនាវឱ្យមានការចូលរួមគាំទ្រជាថវិកា គឺដើម្បីយកទៅចិញ្ចឹមបីបាច់ថែរក្សា អភិរក្សដំរីស្រុកដែលកំពុងរស់នៅក្នុងភូមិកាទៀង ឃុំល្បាំងពីរ ស្រុកលំផាត់ ខេត្តរតនគិរី ដែលបច្ចុប្បន្ននេះមានចំនួន ៤ ក្បាល ឈ្មោលពីរ ញី មួយ និងកូនដំរីញីមួយ ៕

ដោយ៖ រិទ្ធី រូបថត៖ ខឹម សុវណ្ណារ៉ា