AKP កំពត ថ្ងៃទី១៩ ខែមករា ឆ្នាំ២០២៥-

ក្នុងឆ្នាំ២០២៤ អង្គភាពសារព័ត៌មានចំនួន ១ ៦២០ អ្នកនាំពាក្យក្រសួងព័ត៌មានបានលើកឡើងថាអង្គភាព សមាគមសារព័ត៌មានចំនួន២៦ អ្នកសារព័ត៌មានទាំងប្រព័ន្ធផ្សព្វផ្សាយប្រពៃណីនិងទំនើបសរុបចំនួនជាង ៨ពាន់ នាក់ បាន និងកំពុងបំពេញការងាររបស់ខ្លួនបានយ៉ាងពេញលេញ មានសុវត្ថិភាពនៅទូទាំងប្រទេស ដោយឈរលើមូលដ្ឋានក្រមសីលធម៌ និងវិជ្ជាជីវៈសារព័ត៌មាន។

ទាំងនេះ ជាលទ្ធផលនៃការធ្វើបច្ចុប្បន្នភាពក្នុងក្របខណ្ឌនៃការរៀបចំសណ្តាប់ធ្នាប់ក្នុងវិស័យសារព័ត៌មាន ចាប់តាំងពីដើមអាណត្តិទី៧ របស់ក្រសួងព័ត៌មាន ក្រោមការដឹកនាំរបស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន។ នេះជាប្រសាសន៍ឆ្លើយតបរបស់ ឯកឧត្តម ទេព អស្នារិទ្ធ អនុរដ្ឋលេខាធិការនិងអ្នកនាំពាក្យក្រសួងព័ត៌មាន ទៅនឹងសំណួរជុំវិញការអនុវត្តការងារនិងសណ្តាប់ធ្នាប់ របស់អ្នកសារព័ត៌មាន នៅមូលដ្ឋាន ដែលសិក្ខាកាមបានលើកឡើងក្នុងឱកាសវគ្គបណ្តុះបណ្តាល ស្ដីពី «ការពង្រឹងការងារព័ត៌មាននិងសាធារណមតិ» នៅខេត្តកំពត កាលពីថ្ងៃទី១៨ ខែមករា ឆ្នាំ២០២៥។

ឯកឧត្តមអ្នកនាំពាក្យក្រសួងព័ត៌មានបានពន្យល់បន្ថែមថា៖ «ឥឡូវយើងអាចផ្ទៀងផ្ទាត់អត្តសញ្ញាណរបស់អ្នកសារព័ត៌មានម្នាក់ៗបាន ដោយគ្រាន់តែស្កែន QR កូដ ដែលមាននៅ លើបណ្ណសម្គាល់អ្នកសារព័ត៌មាននោះដើម្បីបញ្ជាក់ភាពស្របច្បាប់របស់អ្នកសារព័ត៌មាន»។ ឯកឧត្តមអ្នកនាំពាក្យបានមានប្រសាសន៍ថា៖ «នេះជាប្រព័ន្ធការពារ និងធានាសុវត្ថិភាពទាំងសម្រាប់អ្នកសារព័ត៌មានខ្លួនឯង និងសម្រាប់ប្រភពព័ត៌មានដែលអ្នកសារព័ត៌មាននោះបានទាក់ទងដើម្បីសម្ភាសន៍ ឬចុះយកព័ត៌មាន ហើយវាជាការរួមចំណែកក្នុងការធានាសណ្តាប់ល្អក្នុងវិស័យសារព័ត៌មាន និងលើកកម្ពស់គុណតម្លៃវិជ្ជាជីវៈសារព័ត៌មាននៅកម្ពុជា»។

ឯកឧត្តម ទេព អស្នារិទ្ធ បានគូសបញ្ជាក់ថា ក្នុងក្របខ័ណ្ឌ នៃការពង្រឹងការប្រតិបត្តិក្រមសីលធម៌វិជ្ជាជីវៈ ក្រសួងព័ត៌មានបានកំណត់ ឱ្យមានការផ្តល់ការបណ្តុះបណ្តាលស្តីពីធម្មនុញ្ញវិជ្ជាជីវៈសារព័ត៌មាន ជាមុន ដល់អ្នកសារព័ត៌មាន ជាលក្ខខណ្ឌចាំបាច់មួយ មុននឹងទទួលបានបណ្ណសម្គាល់អ្នកសារព័ត៌មានពីក្រសួង ដើម្បីធានាអនុវត្តន៍ការងារដោយគោរពតាមក្រមសីលធម៌វិជ្ជាជីវៈត្រឹមត្រូវ។ ឯកឧត្តមអ្នកនាំពាក្យក្រសួងព័ត៌មាន បានបញ្ជាក់ឱ្យដឹងថា ភាគីពាក់ព័ន្ធក្នុងវិស័យព័ត៌មានបានមើលឃើញលំហសេរីភាពសារព័ត៌មាននៅកម្ពុជាមានភាពរីកចម្រើនធំធាត់ និងថែមបានទទួលស្គាល់ថា ក្នុងឆ្នាំ២០២៤ សណ្តាប់ធ្នាប់ក្នុងវិស័យព័ត៌មានមានភាពប្រសើរឡើង។

ទន្ទឹមនេះ អ្នកសារព័ត៌មាន តួអង្គរដ្ឋ និងឯកជនបានវាយតម្លៃស្ថានភាពនៃវិស័យព័ត៌មាននិងសោតទស្សន៍កម្ពុជា ក្នុងឆ្នាំ២០២៤ ថាមានភាពល្អប្រសើរ ដោយវិស័យនេះបាន និងកំពុងបោះជំហានទៅមុខជាវិជ្ជមានស្របនឹងការរីកចម្រើនក្នុងសង្គម។

នៅក្នុងឱកាសសិក្ខាសាលានោះដែរ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន ក៏បានផ្តល់អនុសាសន៍ ដល់មន្ទីរព័ត៌មានក្នុងរាជធានី ខេត្តទាំងអស់ ឱ្យដាក់បញ្ចូលជំនួបរវាងមន្ទីរជាមួយអ្នកសារ ព័ត៌មានពីក្នុងមូលដ្ឋានរបស់ខ្លួន ជាសកម្មភាពមួយក្នុងផែនការការងាររបស់មន្ទីរ ដើម្បីផ្សព្វផ្សាយអំពីធម្មនុញ្ញវិជ្ជាជីវៈសារព័ត៌មាន ព្រមទាំងប្រើប្រាស់ជាច្រកផ្តល់ព័ត៌មានជូនអ្នកសារព័ត៌មានអំពីប្រធានបទ និងព្រឹត្តិការណ៍សំខាន់ៗ ដែលនឹងកើតឡើងក្នុងមូលដ្ឋានរាជធានីខេត្តរបស់ខ្លួន។

បើតាមឯកឧត្តមអ្នកនាំពាក្យ កិច្ចការនេះជាផ្នែកមួយដ៏សំខាន់ក្នុងការពង្រឹងបន្ថែមនូវទំនាក់ទំនងជាមួយអ្នកសារព័ត៌មាន សម្រាប់មន្ទីរព័ត៌មានក្នុងនាមជាសេនាធិការរបស់រដ្ឋបាលរាជធានីខេត្ត។ «វាក៏ជាមធ្យោបាយមួយរួមចំណែកធានាលំហូព័ត៌មានជាប្រចាំ ក្នុងចំណោមប្រតិបត្តិករវិស័យសារព័ត៌មាន ដើម្បីផ្សារភ្ជាប់ទំនាក់ទំនងល្អរវាងអ្នកសារព័ត៌មាន ជាមួយប្រភពព័ត៌មានរាប់បញ្ចូលទាំងរដ្ឋបាលរាជធានីខេត្ត អាជ្ញាធរ និងអង្គភាពជំនាញ»។

នេះជាការលើកឡើងបន្ថែមរបស់ឯកឧត្តម ទេព អស្នារិទ្ធ។ ឯកឧត្តមអ្នកនាំពាក្យក្រសួងព័ត៌មាន ក៏បានឆ្លៀតយកឱកាសសិក្ខាសាលានាពេលនោះ ដើម្បីអំពាវនាវដល់អ្នកសារព័ត៌មានទាំងអស់ ឱ្យចូលរួមលើកកម្ពស់គុណតម្លៃនិងរក្សាភាពថ្លៃថ្នូរក្នុងអាជីពសារព័ត៌មាន ដោយត្រូវអនុវត្តការងារដោយគោរពសិទ្ធិ តួនាទី និងករណីយកិច្ចរបស់ខ្លួនជាអ្នកសារព័ត៌មានឱ្យបានខ្ជាប់ខ្ជួន ហើយដោយអនុលោមតាមច្បាប់និងលិខិតបទដ្ឋានជាធរមានដើម្បីបន្តធានាសណ្តាប់ធ្នាប់ល្អ ប្រកបដោយក្រមសីលធម៌វិជ្ជាជីវៈក្នុងការងារ៕

ដោយ៖ រិទ្ធី