AKP សៀមរាប ថ្ងៃទី១៩ ខែមករា ឆ្នាំ២០២៥--

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍បើកព្រឹត្តិការណ៍សំណេរអង្គរលើកទី២ នៅលើស្ពានហាលខាងលិចប្រាសាទអង្គរវត្ត នាព្រឹកថ្ងៃទី១៩ ខែមករា ឆ្នាំ២០២៥ ថាព្រឹត្តិការណ៍សំណេរអង្គរនេះបានបង្ហាញពីការយកចិត្តទុកដាក់របស់រដ្ឋាភិបាល ក៏ដូចជាក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ រួមទាំងសហភាពសហព័ន្ធយុវជនកម្ពុជា ជាពិសេសអ្នកចូលចិត្ដនិយមអក្សរសរសេរអក្សរខ្មែរ សំដៅលើកកម្ពស់សមត្ថភាពការសរសេរឱ្យបានត្រឹមត្រូវតាមអក្ខរាវិរុទ្ធ ក្បួនខ្នាតវេយ្យាករណ៍ និងចេះពីរបៀបសរសេរអត្ថបទឱ្យបានច្បាស់។

ឯកឧត្តមបណ្ឌិតសភាចារ្យ បានលើកទឹកចិត្តឱ្យក្រសួង ស្ថាប័នរដ្ឋ រដ្ឋបាលគ្រប់ថ្នាក់ជាតិ ពិសេសគណៈគ្រប់គ្រងសាលា លោកគ្រូ អ្នកគ្រូ គណៈកម្មការគ្រប់គ្រងសាលារៀន និងអ្នកពាក់ព័ន្ធទាំងអស់នៅក្នុងសាលារៀន រៀបចំការប្រឡងប្រណាំងអំណាន និងសំណេរ ឬបង្កើតព្រឹត្តិការណ៍អប់រំនានា ដើម្បីជំរុញដល់ការសិក្សារៀនសូត្ររបស់សិស្សានុសិស្ស និងអ្នកចូលចិត្តអក្សរសាស្ត្រខ្មែរ អាចបញ្ចេញសមត្ថភាពប្រកបដោយភាពក្លាហានមានទំនុកចិត្ត និងទទួលយកការពិតប្រាកដរបស់ខ្លួន ព្រមទាំងខិតខំប្រឹងប្រែងសិក្សារៀនសូត្រពង្រឹងអំណាចបានសរសេរនិពន្ធបន្ថែមទៀត ដើម្បីធ្វើឱ្យអក្សរសាស្ត្រខ្មែរ កាន់តែមានភាពសម្បូររុងរឿង និងមានភាព នឹងកើនទៅដល់កម្រិតកំពូលផងដែរ។

ឯកឧត្តមបណ្ឌិតសភាចារ្យក៏បានកោតសរសើរចំពោះការលះបង់ និងភាពក្លាហានរបស់បេក្ខជន ក៏ដូចជាមាតាបិតា បេក្ខជន ដែលមានអាយុ១៨ឆ្នាំ ដែលបានលើកទឹកចិត្តកូនចៅជូនកូនចៅ មកចូលរួមក្នុងការប្រកួតនៅពេលនេះ និងសុំឱ្យសេចក្ដីស្រឡាញ់អក្សរសាស្ត្រខ្មែរយើងទាំងអស់ រឹងមាំប្រៀបបីដូចប្រាសាទប្រាង្គប្រាសាទ អង្គរដែលកំពុងតែឈរស្កឹមស្កៃនាពេលនេះផងដែរ។

សូមបញ្ជាក់ថា ការប្រកួតសរសេរតាមអានជាសាធារណៈនេះ ត្រូវបានបង្កើតឡើងដោយក្រុមអ្នកស្រឡាញ់អក្សរសាស្រ្តខ្មែរ និងចូលរួមគាំទ្រដោយក្រសួងពាក់ព័ន្ធនានា ដែលកម្មវិធីនេះរៀបចំឡើងដើម្បី លើកស្ទួយភាសាខ្មែរ តាមរយៈការសរសេរតាមអាន បង្កើនចំណេះដឹង និងបង្ហាញពលរដ្ឋពីសារ:សំខាន់នៃភាសាខ្មែរ កម្មវិធីនេះដែរក៏ដើម្បីជួយជំរុញសក្ដានុពលទេសចរណ៍ក្នុងស្រុកផងដែរ។ បើតាមគណៈកម្មការរៀបចំការប្រកួត ក្នុងចំណោមបេក្ខជន១២២០អង្គ/នាក់ មានព្រះសង្ឃ ៨២ អង្គ បេក្ខជនចាស់ជាងគេអាយុ ៨១ឆ្នាំ និងបេក្ខជនក្មេងជាងគេអាយុ ៦ឆ្នាំ។ ព្រឹត្តិការណ៍សំណេរអង្គរលើកទី២នេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងលោក ហ៊ុន ម៉ានី ឧបនាយករដ្ឋមន្ត្រី និងជាប្រធានក្រុមប្រឹក្សាភិបាលមូលនិធិម៉ានី ព្រមទាំងលោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានអញ្ជើញជាគណអធិបតីផងដែរ៕

ដោយ ឃុត សៅ