AKP កំពង់ធំ ថ្ងៃទី១៨ ខែមករា ឆ្នាំ២០២៥--

ឯកឧត្តម ស៊ិន វិសិទ្ធ អនុរដ្ឋលេខាធិការក្រសួងធនធានទឹក និងឧតុនិយម បានណែនាំដល់អាជ្ញាធរមូលដ្ឋាន និងគណៈកម្មការគ្រប់គ្រងទឹកត្រូវបែងចែក និងប្រើប្រាស់ទឹកឱ្យបានត្រឹមត្រូវដោយសន្សំសំចៃ ក្នុងឱកាសដែលឯកឧត្តមអញ្ជើញជាអធិបតីក្នុងវេទិកាសាធារណៈក្រុមការងាររាជរដ្ឋាភិបាលចុះមូលដ្ឋាននៅក្នុងឃុំម្សាក្រង ស្រុកស្ទោង ខេត្តកំពង់ធំ កាលពីរសៀលថ្ងៃទី១៧ ខែមករា ឆ្នាំ២០២៥។

ឯកឧត្តម ស៊ិន វិសិទ្ធ បានបញ្ជាក់ថា ដើម្បីឱ្យកិច្ចការនេះមានប្រសិទ្ធភាពខ្ពស់ សូមអាជ្ញាធរមូលដ្ឋាន និងគណៈកម្មការត្រូវសិក្សា និងស្វែងយល់លម្អិត ជាពិសេសត្រូវធ្វើការស្នើសុំ និងសហការបន្ថែមទៀតជាមួយក្រុមបច្ចេកទេសការងាររបស់ក្រសួងធនធានទឹក និងឧតុនិយមដើម្បីឱ្យកិច្ចការនេះកាន់តែល្អប្រសើរឡើងថែមទៀត និងបានណែនាំដល់អាជ្ញាធរភូមិ/ឃុំ ស្រុកត្រូវបង្កើនការយល់ចិត្តទុកដាក់ថែមទៀតដល់សុខទុក្ខសុខុមាលភាពនិងសុខភាពទូទៅរបស់ប្រជាពលរដ្ឋនៅក្នុងមូលដ្ឋានឱ្យកាន់តែប្រសើរឡើង និងណែនាំដល់លោកនាយក នាយិកា លោកគ្រូ អ្នកគ្រូអាណាព្យាបាលត្រូវបង្កើនការយកចិត្តទុកដាក់ខ្ពស់ដល់សុខភាពចំណីអាហារដែលដាក់លក់នៅតាមសាលារៀនជាពិសេសត្រួតពិនិត្យលើគុណភាពនិងផលប៉ះពាល់ដែលនាំឱ្យខូចសុខភាពសិក្សានុសិស្សនិងបានជំរុញដល់អាជ្ញាធរភូមិ ឃុំត្រូវផ្ដល់សេវាជូនប្រជាពលរដ្ឋឱ្យបានដល់ខ្នងផ្ទះដើម្បីទទួលបាននូវភាពជឿជាក់ពីពលរដ្ឋក៏ដូចជាទទួលបាននូវព័ត៌មានថ្មីៗ កង្វល់ និងតម្រូវការជាក់ស្តែងថែមទៀត។

ក្នុងឱកាសនោះដែរ លោក សាយ គឹមឡម អភិបាលស្រុកស្ទោង បានណែនាំដល់អាជ្ញាធរឃុំម្សាក្រងត្រូវធ្វើការបែងចែកឱ្យបានច្បាស់លាស់រវាងគម្រោងអភិវឌ្ឍន៍ដែលប្រើប្រាស់ថវិកាមូលនិធិឃុំ និងស្នើសុំជួយដល់ក្រុមការងារចុះមូលដ្ឋានជួយអភិវឌ្ឍបន្ថែមនូវអ្វីដែលហួសពីសមត្ថភាពរបស់ឃុំ ហើយត្រូវផ្ដល់សេវានិងបម្រើប្រជាពលរដ្ឋឱ្យអស់ពីលទ្ធភាព និងមិនប្រកាន់និន្នាការនយោបាយ ជាពិសេសបញ្ហាកកស្ទះទឹកជនលិចស្រែស្រូវប្រជាពលរដ្ឋដដែលៗជារៀងរាល់ឆ្នាំ ដែលគ្របដណ្ដប់ជាច្រើនភូមិ និងរងផលប៉ះពាល់ស្រែស្រូវកសិករជាច្រើនហិកតា ហើយប៉ុស្តិ៍នគរបាលរដ្ឋបាលនិងអាជ្ញាធរឃុំម្សាក្រងត្រូវធ្វើការយកចិត្តទុកដាក់ខ្ពស់ដល់សុខទុក្ខខុមាលភាព និងជីវភាពបងប្អូនប្រជាការពារភូមិ ដែលគាត់បានលះបង់គ្រប់បែបយ៉ាងដើម្បីសុខសុវត្ថិភាពនៅក្នុងមូលដ្ឋានជាពិសេសរក្សានូវគោលនយោបាយភូមិ ឃុំមានសុវត្ថិភាពជូនប្រជាពលរដ្ឋ។

លោកអភិបាលស្រុកស្ទោងបានថ្លែងអំណរគុណចំពោះពុក ម៉ែ បង ប្អូនប្រជាពលរដ្ឋនៅក្នុងឃុំម្សាក្រង ដែលបានលះបង់ និងចូលរួមសហការជាមួយអាជ្ញាធរជាពិសេសជាមួយរដ្ឋបាលស្រុកក្នុងការអភិវឌ្ឍមូលដ្ឋានក៏ដូចជាកសាងនូវប្រព័ន្ធធារាសាស្ត្រ និងផ្លូវគមនាគមន៍ខ្វាត់ខ្វែងនៅក្នុងមូលដ្ឋានឃុំ៕

ដោយ ស៊ុម វណ្ណា