AKP ភ្នំពេញ ថ្ងៃទី១៧ ខែមករា ឆ្នាំ២០២៥--

ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃបានលើកឡើងថា ការប្រកួតកីឡាបាល់ទាត់ពានរង្វាន់ក្រសួងមហាផ្ទៃ លើកទី២ ឆ្នាំ២០២៥ ត្រូវបានបង្កើតឡើងសំដៅចូលរួមលើកកម្ពស់វិស័យកីឡាបាល់ទាត់ និងចូលរួមបណ្តុះស្មារតីស្រឡាញ់កីឡា ដើម្បីសុខភាព រិតចំណងសាមគ្គីភាព និងកិច្ចសហប្រតិបត្តិការណ៍ល្អរវាងអង្គភាពនានាចំណុះឱ្យក្រសួងមហាផ្ទៃ។

នៅក្នុងឱកាសអញ្ជើញជាអធិបតី ក្នុងពិធីបើការប្រកួតកីឡាបាល់ទាត់ ពានរង្វាន់ក្រសួងមហាផ្ទៃ កាលពីល្ងាចថ្ងៃទី១៦ ខែមករា ឆ្នាំ២០២៥ នៅពហុកីឡដ្ឋានជាតិអូឡាំពិក ឯកឧត្តមអភិសន្តិបណ្ឌិត ស សុខា បានគូសបញ្ជាក់បន្ថែមទៀតថា ព្រឹត្តិការណ៍ប្រកួតបាល់ទាត់ពានរង្វាន់ក្រសួងមហាផ្ទៃ លើកទី២នេះ ក៏មានភាពវិសេសវិសាលជាងលើកទី១ ទាំងពេលវេលារៀបចំ និងក្រមសីលធម៌របស់ក្រុមចូលរួមទាំងអស់ផងដែរ។

ជាមួយគ្នានេះ ឯកឧត្តមអភិសន្តិបណ្ឌិត ស សុខា ក៏បានកោតសសើរ និងវាយតម្លៃខ្ពស់ចំពោះថ្នាក់ដឹកនាំនានាចំណុះឱ្យក្រសួងមហាផ្ទៃទាំងអស់ ដែលបានខិតខំឆ្លៀតពេលដ៏មមាញឹករបស់ខ្លួនបង្កើតក្រុមបាល់ទាត់ចូលរួមក្នុងព្រឹត្តិការណ៍ លើកទី២នេះ។ ឯកឧត្តមឧបនាយករដ្ឋមន្ត្រីសង្ឃឹមមោះមុតថា នាឆ្នាំក្រោយៗទៀតនឹងទទួលបានការចូលរួមកាន់តែច្រើនពីអង្គភាពនានាចំណុះឱ្យក្រសួងមហាផ្ទៃបន្ថែមទៀត។ គូសបញ្ជាក់បន្ថែមពីលើនេ ឯកឧត្តមអភិសន្តិបណ្ឌិតបានចាត់ទុកថា វិស័យកីឡាបានដើរតួនាទីយ៉ាងសំខាន់ ក្នុងការពង្រឹងទំនាក់ទំនង និងការបង្កើតសាមគ្គីភាព និងការលើកកម្ពស់សុខមាលភាពសង្គម ដោយទាំងនេះ គឺជាចលករដ៏មានសារៈសំខាន់ ក្នុងការជំរុញនិងអភិវឌ្ឍធនធានមនុស្សប្រកបដោយប្រសិទ្ធភាព។ មិនតែប៉ុណ្ណោះការចូលរួមលេងកីឡាក៏បានបង្កើតនូវចំណងមិត្តភាព និងកិច្ចសហប្រតិបត្តិការល្អ និងកាន់តែស្និទ្ធស្នាលរវាងអង្គភាពនានាចំណុះឱ្យក្រសួងមហាផ្ទៃ។ ម្យ៉ាងវិញទៀតកីឡាបានចូលរួមកាត់បន្ថយនូវភាពតានតឹងផ្លូវចិត្ត បញ្ចៀសនូវការប្រព្រឹត្តិអំពើអបាយមុខ និងអំពើខុសច្បាប់នានា នៅក្នុងសង្គម ដូចជាការប្រើប្រាស់គ្រឿងញាន ល្បែងស៊ីសងខុសច្បាប់ និងអំពើហិង្សាក្នុងក្រុមគ្រួសារជាដើម។ ផ្ទុយទៅវិញ កីឡាបាននាំមកនូវកាយសម្បទារឹងមាំ សុខភាពល្អ ទាំងផ្លូវការ និងផ្លូវចិត្ត ដែលប្រជាពលរដ្ឋនៅក្នុងសង្គមចង់បាន។

កត់សម្គាល់បន្ថែមពីលើនេះ រដ្ឋមន្ត្រីក្រសួងមហាផ្ទៃបានឱ្យដឹងទៀតថា បច្ចុប្បន្ន វិស័យកីឡានៅព្រះរាជាណាចក្រកម្ពុជាពិតជាមានការរីកចម្រើនគួរឱ្យកត់សម្គាល់ ដោយមានការខិតខំប្រឹងប្រែងលើកស្ទួយពីសំណាក់ប្រមុខរាជរដ្ឋភិបាល ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ក៏ដូចជាក្រសួងអប់រំ យុវជននិងកីឡា និងស្ថាប័នពាក់ព័ន្ធនានា គណៈកម្មាធិការជាតិអូឡាំពិកកម្ពុជា សហព័ន្ធកីឡាជាតិទាំងអស់ ព្រមទាំងសប្បុរសជននានាបានធ្វើឱ្យកីឡាជាតិរីកចម្រើនខ្លាំងឡើងៗពីមួយឆ្នាំទៅមួយឆ្នាំទាំងថ្នាក់ជាតិ និងអន្តរជាតិ។ ឆ្លៀតក្នុងឱកាសបើកការប្រកួតនេះ ឯកឧត្តមអភិសន្តិបណ្ឌិត ក៏បានផ្តាំផ្ញើរដល់កីឡាករទាំងអស់ ដែលបានចូលរួមក្នុងការប្រកួតនេះ សូមបញ្ចេញទេពកោសល្យ និងសមត្ថភាពរបស់ខ្លួន ក្នុងការប្រកួតដោយឈរលើគោលការណ៍លេងដោយយុត្តិធម៌ ពិសេសប្រកួតក្នុងស្មារតីសាមគ្គីភាព គោរពវិន័យ និងការអនុវត្តតាមបទបញ្ជារបស់គណៈកម្មការរៀបចំការប្រកួត ក៏ដូចជាអាជ្ញាកណ្តាល។

ជាមួយគ្នានេះ ឯកឧត្តម សរ សិទ្ធិ រដ្ឋលេធិកាទទួលការងារអគ្គលេខាធិការរដ្ឋាននៃក្រុមប្រឹក្សាកីឡាក្រសួងមហាផ្ទៃ និងជាប្រធានគណៈកម្មការរៀបចំការប្រកួតបានជម្រាបជូនថា ការប្រកួតបាល់ទាត់ ពានរង្វាន់ក្រសួងមហាផ្ទៃ លើកទី២ ឆ្នាំ២០២៥នេះ មានក្រុមបាល់ទាត់ចូលរួមចំនួន១៣ សរុបកីឡាករ គ្រូបង្វឹក មន្រ្តីបច្ចេកទេស និងគ្រូពេទ្យមាន សរុប ៤៨៦នាក់។ ការប្រកួតចែកចេញជា៤ពូល ក្នុងនោះពូលA B C មាន៣ក្រុមដូចគ្នា ខណៈពូលDមាន៤ក្រុម ដែលសរុបការ២៣ប្រកួត ហើយការប្រកួតទូទៅធ្វើឡើងនៅទីលានវិទ្យាល័យបឹងត្របែក។ ចំពោះកម្មវិធីប្រកួត គឺត្រូវចាប់ផ្តើមពិធីបើក នៅថ្ងៃទី១៦ ខែមករានេះ និងកម្មវិធីបិទ នៅថ្ងៃទី១១ ខែមីនា ឆ្នាំ២០២៥ ដែលនឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់ឯកឧត្តមអភិសន្តិបណ្ឌិត  ស  សុខា  ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ នៅពហុកីឡដ្ឋានជាតិអូឡាំពិក៕

ដោយ ហេង ណាលីន (រូបភាព៖ យឹម សុវឌ្ឍនា)