AKP ភ្នំពេញ ថ្ងៃទី១៦ ខែមករា ឆ្នាំ២០២៥ -- ឯកឧត្ដម នាយឧត្ដមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអនុញ្ញាតឱ្យឯកឧត្តម Ali Akbar Nazari ឯកអគ្គរដ្ឋទូត នៃសាធារណរដ្ឋឥស្លាមអ៊ីរ៉ង់ប្រចាំនៅព្រះរាជាណាចក្រកម្ពុជា ដែលមាននិវេសនដ្ឋាននៅទីក្រុងហាណូយ ប្រទេសវៀតណាម ចូលជួបសម្តែងការគួរសម នៅទីស្ដីការក្រសួងការពារជាតិ កាលពីថ្ងៃទី១៥ ខែមករា ឆ្នាំ២០២៥។

ក្នុងជំនួបនោះ ឯកឧត្តម នាយឧត្តមសេនីយ៍ ទៀ សីហា បានមានប្រសាសន៍ថា ទំនាក់ទំនងរវាងប្រទេសទាំងពីរ កម្ពុជា និងអ៊ីរ៉ង់ មានតាំងពីឆ្នាំ១៩៩២មក ហើយការជួបគ្នានាពេលនេះ គឺជាលើកដំបូង ដែលសង្ឃឹមថាការជួបគ្នានៅពេលនេះនឹងបើកទំព័រថ្មីនាពេលខាងមុខ ហើយជួយពង្រឹង និងពង្រីកនូវកិច្ចសហប្រតិបត្តិការ រវាងប្រទេសទាំងពីរ ប្រជាជន និងកងទ័ពទាំងពីរឱ្យកាន់តែល្អប្រសើរផងដែរ។

ជាកិច្ចឆ្លើយតប ឯកឧត្តម Ali Akbar Nazari ឯកអគ្គរដ្ឋទូតនៃសាធារណរដ្ឋឥស្លាមអ៊ីរ៉ង់ បានមានប្រសាសន៍ថា អ៊ីរ៉ង់ និងកម្ពុជា ជាមិត្តជិត៣៥ឆ្នាំមកហើយ ហើយប្រទេសទាំងពីរធ្លាប់បានជួយគាំទ្រគ្នាទៅវិញទៅមក ជាទ្វេភាគី និងពហុភាគី ដោយមានការយោគយល់ និងកិច្ចសហប្រតិបត្តិការរវាងថ្នាក់ដឹកនាំនៃប្រទេសទាំងពីរ ធ្វើឱ្យមានឱកាសធ្វើកិច្ចសហប្រតិបត្តិការជាមួយគ្នានៅលើវិស័យផ្សេងៗទៀតផងដែរ។ អ៊ីរ៉ង់បានត្រៀមខ្លួនរួចជាស្រេច ក្នុងការធ្វើកិច្ចសហប្រតិបត្តិការលើផ្នែក ឧស្សាហកម្មយោធា ជាមួយនឹងកងទ័ព និងក្រសួងការពារជាតិកម្ពុជា។

ឯកឧត្តមឯកអគ្គរដ្ឋទូតបានលើកឡើងថា យើងបានត្រៀមខ្លួនជាស្រេច ក្នុងការធ្វើកិច្ចសហប្រតិបត្តិការជាមួយនឹងកម្ពុជា មិនថាកងទ័ពជើងគោក ជើងអាកាស ហើយពាក់ព័ន្ធនឹងប្រវត្តិសាស្ត្រយោធា គឺបានសម្រេចគោលដៅល្អៗជាច្រើន និងបានត្រៀមជាស្រេចក្នុងការចែករំលែកនូវបទពិសោធន៍ ចំណេះដឹង និងសមិទ្ធផលដល់ប្រទេសកម្ពុជាផងដែរ និងបានអញ្ជើញ ឯកឧត្តម នាយឧត្តមសេនីយ៍ ទៀ  សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៅធ្វើទស្សនកិច្ចនៅសាធារណរដ្ឋឥស្លាមអ៊ីរ៉ង់ផងដែរ។

ជាមួយគ្នានេះដែរ ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៀ សីហា ក៏បានទទួលយកនូវការអញ្ជើញនេះ ហើយក៏បានបញ្ជាក់ថា នឹងរកពេលវេលាសមស្របណាមួយ ដើម្បីអញ្ជើញទៅបំពេញទស្សនកិច្ចនៅសាធារណរដ្ឋឥស្លាមអ៊ីរ៉ង់៕

ដោយ សំ សាម៉ន