AKP ភ្នំពេញ ថ្ងៃទី១៦ ខែមករា ឆ្នាំ២០២៥ -- ឯកឧត្តម វ៉ា ថន អភិបាលនៃគណៈអភិបាលខេត្តក្រចេះមានប្រសាសន៍ថា ការរួមគ្នាពិនិត្យ និងវាយតម្លៃឱ្យបានត្រឹមត្រូវ និងគ្រប់ជ្រុងជ្រោយលើសមិទ្ធផល បទពិសោធន៍ដែលទទួលបាន និងបញ្ហាប្រឈមដែលនៅសេសសល់ គឺជាមូលដ្ឋានដើម្បីកំណត់ទិសដៅក្នុងការជំរុញការអនុវត្តកម្មវិធីកំណែទម្រង់នានា និងយុទ្ធសាស្ត្របញ្ចកោណដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព និងកំណត់យកនូវអាទិភាពគន្លឹះចំនួន៥គឺ មនុស្ស ផ្លូវ ទឹក ភ្លើង និងបច្ចេកវិទ្យា។ ការលើកឡើងរបស់ឯកឧត្តមអភិបាលខេត្តក្រចេះធ្វើឡើងក្នុងពិធីបើកសន្និបាតបូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារឆ្នាំ២០២៥ របស់រដ្ឋបាលខេត្តក្រចេះ នាព្រឹកថ្ងៃទី១៦ ខែមករា ឆ្នាំ២០២៥។

ឯកឧត្តមអភិបាលខេត្តបានគូសបញ្ជាក់ថា ការរៀបចំសន្និបាតគឺជាឱកាសដ៏សមស្របសម្រាប់មន្ត្រីចូលរួមធ្វើការត្រួតពិនិត្យ និងវាយតម្លៃអំពីលទ្ធផលការងារ និងការវិវត្តន៍ថ្មីៗដែលបានខិតខំប្រឹងប្រែងសម្រេចបានដោយផ្អែកតាមក្របខ័ណ្ឌនៃតួនាទីភារកិច្ច ស្របតាមច្បាប់ លិខិតបទដ្ឋានគតិយុត្ត កិច្ចសហការសម្របសម្រួលរវាងស្ថាប័នថ្នាក់ជាតិ និងផ្នែកជំនាញនៅថ្នាក់ក្រោមជាតិ។ 

ក្នុងឱកាសនោះ ឯកឧត្តម វ៉ា ថន ក៏បានលើកឡើងផងដែរពីការអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» ថា នៅតែមានបញ្ហាប្រឈមនៅឡើយ ជាពិសេសបញ្ហាគ្រឿងញៀនខុសច្បាប់ គ្រោះថ្នាក់ចរាចរណ៍ ល្បែងស៊ីសងខុសច្បាប់ ក្មេងទំនើង អំពើហិង្សា ផលិតផលក្លែងក្លាយ ការគ្រប់គ្រងធនធានធម្មជាតិ ការរំលោភបំពានលើដីសាធារណៈរបស់រដ្ឋ និងការដោះស្រាយជម្លោះនានានៅមូលដ្ឋាន ដែលតម្រូវឱ្យរួមគ្នាកំណត់វិធានការដោះស្រាយប្រកបដោយប្រសិទ្ធភាព។ ជាមួយគ្នានេះត្រូវបន្តតាមដានការវិវត្តប្រែប្រួលនៃសភាពការណ៍តំបន់ និងអន្តរជាតិ ព្រមជាមួយនឹងការពង្រឹងសភាពការណ៍ផ្ទៃក្នុង សំដៅដាក់ចេញនូវយុទ្ធសាស្ត្រ និងវិធានការនានាប្រកបដោយប្រសិទ្ធភាពខ្ពស់ ក្នុងការរក្សាសន្តិសុខ សណ្តាប់សាធារណៈ សុវត្ថិភាពសង្គមឱ្យបានល្អប្រសើរ ដើម្បីបង្កបរិយាកាសអំណោយផលដល់ការអភិវឌ្ឍសេដ្ឋកិច្ច សង្គមកម្ពុជាជាបន្តទៀត៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)