AKP កំពង់ធំ ថ្ងៃទី១៦ ខែមករា ឆ្នាំ២០២៥ -- ឯកឧត្តម តែ ណាវុធ អនុប្រធានអចិន្ត្រៃយ៍គណៈកម្មាធិការជាតិទន្លេមេគង្គកម្ពុជា និងជាប្រធានក្រុមការងារចុះមូលដ្ឋានឃុំចំណាក្រោម បានណែនាំដល់អាជ្ញាធរឃុំត្រូវផ្ដល់សេវាជូនប្រជាពលរដ្ឋឱ្យបានឆាប់រហ័ស មានតម្លាភាព និងគណនេយ្យភាព ក្នុងឱកាសដែលឯកឧត្តមអញ្ជើញជាអធិបតីក្នុងវេទិកាសាធារណៈរបស់រាជរដ្ឋាភិបាលនៅឃុំចំណាក្រោម ស្រុកស្ទោង ខេត្តកំពង់ធំ នាព្រឹកថ្ងៃទី១៦ ខែមករា ឆ្នាំ២០២៥។

ជាមួយគ្នានេះដែរ ឯកឧត្តមបានណែនាំដល់ក្រុមគ្រូពេទ្យនៅមន្ទីរពេទ្យបង្អែកប្រតិបត្តិស្ទោង ត្រូវកំណត់គោលការណ៍ច្បាស់លាស់បន្ថែមទៀត ក្នុងការផ្តល់សេវារថយន្តសង្គ្រោះបន្ទាន់ ដើម្បីឆ្លើយតបនឹងការជួយសង្គ្រោះដឹកជញ្ជូន នៅពេលដែលមានការចាំបាច់ និងមានការហៅសង្គ្រោះបន្ទាន់ពីសាធារណៈជនជាពិសេសការជួយសង្គ្រោះបឋម និងបន្ទាន់ដល់ជនរងគ្រោះដោយគ្រោះថ្នាក់ចរាចរណ៍ ឬឧបទ្ទវហេតុផ្សេងៗ ដើម្បីទទួលបាននូវការជឿទុកចិត្តពីសាធារណៈជន និងប្រជាពលរដ្ឋនៅក្នុងមូលដ្ឋានថែមទៀត។

ទន្ទឹមនឹងនេះឯកឧត្តមបានអំពាវនាវដល់ប្រជាកសិករក្នុងស្រុកស្ទោងទាំងមូលឱ្យបង្កើតសហគមន៍កសិកម្មទំនើប ជាពិសេសសហគមន៍ស្រែប្រាំង ដែលប្រើប្រាស់ពូជស្រូវក្នុងស្រុកឬពូជសែនក្រអូប ដើម្បីធានាបាននូវទិន្នផលខ្ពស់ ហើយមានទីផ្សារលក់បានថ្លៃតាមកិច្ចសន្យា ដែលនឹងរួមចំណែកយ៉ាងធំធេងក្នុងការលើកកម្ពស់ជីវភាពនិងសេដ្ឋកិច្ចគ្រួសារកសិករនិងប្រជាពលរដ្ឋក្នុងមូលដ្ឋានឱ្យកាន់តែប្រសើរឡើងតាមគោលនយោបាយរបស់រាជរដ្ឋាភិបាលអាណត្តិទី៧ដែលមានសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី។

ក្នុងឱកាសនោះ លោក សាយ គឹមឡម អភិបាលស្រុកស្ទោង បានណែនាំបន្ថែមទៀតដល់អាជ្ញាធរឃុំចំណាក្រោម និងជំនាញពាក់ព័ន្ធត្រូវពិនិត្យ និងធ្វើបច្ចុប្បន្នភាពគ្រួសារក្រីក្រប្រកបដោយបច្ចេកទេស ប្រត្យក្សភាព និងទំនួសខុសត្រូវខ្ពស់ ហើយត្រូវសិក្សាបន្ថែមទៀតពីប្រព័ន្ធធារាសាស្ត្រ ផ្លូវគមនាគមន៍ជាអាទិភាពនៅក្នុងមូលដ្ឋាន ដើម្បីដាក់ជូនក្រុមការងារ ក្នុងការជួយស្ថាបនា ឬកែលម្អបន្ថែមទៀតពីលើអ្វីដែលឃុំបានធ្វើរួចមកហើយ ដើម្បីឆ្លើយតបទៅនឹងតម្រូវការ និងសំណូមពរ និងជាការយកចិត្តទុកដាក់ដល់ ជីវភាពជាអាទិភាពប្រជាពលរដ្ឋ។

លោកបានអំពាវនាវដោយទទូចឱ្យប្រជាពលរដ្ឋនៅក្នុងឃុំចំណាក្រោម ក៏ដូចជាស្រុកស្ទោងទាំងមូល កុំចាញ់បោកមេខ្យល់ និងពួកឆ្លៀតឱកាស ដែលបានញុះញង់បំផុសបំផុលក្នុងការរុករានទន្ទ្រាន និងកាន់កាប់ដីព្រៃតំបន់បី ក្រៅពីតំបន់ដែលរាជរដ្ឋាភិបាលបានឆ្វៀលជូន ដែលផ្ទុយនឹងគោលការណ៍ គោលនយោបាយរបស់រាជរដ្ឋាភិបាលក្នុងការគ្រប់គ្រងដីរដ្ឋ និងការពារធនធានធម្មជាតិជាពិសេសព្រៃលិចទឹក ដីតំបន់បី ជាជម្រកត្រីកូន និងជីវចម្រុះនៅជុំវិញបឹងទន្លេសាប និងបានបញ្ជាយ៉ាងម៉ឺងម៉ាត់ដល់កងកម្លាំងទាំងបី និងជំនាញពាក់ព័ន្ធ ត្រូវបន្តនិរន្តរភាពបង្ក្រាបក្មេងទំនើងនិងគ្រឿងញៀនឱ្យបានដូចភ្លៀងរលឹម ដើម្បីធានានូវគោលការណ៍ភូមិឃុំមានសុវត្ថិភាព និងផ្តល់សុខសុវត្ថិភាពជូនប្រជាពលរដ្ឋក្នុងមូលដ្ឋាន៕

ដោយ ស៊ុម វណ្ណា