AKP ភ្នំពេញ ថ្ងៃទី១៦ ខែមករា ឆ្នាំ២០២៥--ក្នុងជំនួបពិភាក្សាការងារជាមួយប្រតិភូក្រុមហ៊ុន Hernan Agriculture Investment Group របស់ខេត្តហឺណាន ប្រទេសចិន កាលពីថ្ងៃទី១៥ ខែមករា ឆ្នាំ២០២៥ ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា រាជរដ្ឋាភិបាលកម្ពុជាស្វាគមន៍ជានិច្ចចំពោះរាល់វិនិយោគិនបរទេស រួមទាំងវិនិយោគិនមកពីប្រទេសចិន ដែលជាមិត្តដែកថែបរបស់កម្ពុជាផងដែរ។ 

ក្នុងជំនួបនោះ ឯកឧត្តមបានលើកឡើងអំពីសក្តានុពលនៃវិស័យកសិកម្មកម្ពុជា ជាពិសេសក្នុងការ កែច្នៃនាំចេញ និងបានផ្តល់ព័ត៌មានអំពីបរិយាកាសវិនិយោគដែលមានភាពងាយស្រួល និងទទួល បានការលើកទឹកចិត្តច្រើនពីរាជរដ្ឋាភិបាល។ ទន្ទឹមនឹងនេះ ឯកឧត្តមរដ្ឋលេខាធិការបានផ្តល់ព័ត៌មានដល់ក្រុមហ៊ុនខាងលើអំពីឯកសារក្របខ័ណ្ឌអភិវឌ្ឍន៍សួនកសិ-ឧស្សាហកម្មនៅកម្ពុជា ដែលរាជរដ្ឋាភិបាលគ្រោងនឹងប្រកាសជាផ្លូវការនៅក្នុងពេលខាងមុខ ដែលនឹងផ្តល់ការលើកទឹកចិត្តកាន់តែច្រើនថែមទៀតដល់ការបង្កើតសួនកសិ-ឧស្សាហកម្ម និងសាងសង់រោងចក្រកែច្នៃផលិត ផលកសិកម្មដើម្បីនាំចេញ។ 

ជាការឆ្លើយតបប្រធានប្រតិភូក្រុមហ៊ុន Hernan Agriculture Investment Group ខេត្ត ហឺណាន ប្រទេសចិន បានស្វាគមន៍ចំពោះព័ត៌មានសំខាន់ៗដែលក្រសួងកសិកម្ម រុក្ខាប្រមាញ់ និងនេសាទកម្ពុជាបានផ្តល់ជូនប្រតិភូក្រុមហ៊ុននាពេលនេះ និងបានប្តេជ្ញាស្វែងយល់ឱ្យកាន់តែស៊ី ជម្រៅថែមទៀត ដើម្បីឈានទៅរកការចាប់ផ្តើមការបោះទុនវិនិយោគក្នុងវិស័យកសិកម្មនៅកម្ពុជា នាពេលខាងមុខ៕

ដោយ៖ ចាន់ សុភឿន (ប្រភព៖ ក្រសួងកសិកម្ម)