AKP កំពង់ធំ ថ្ងៃទី១៦ ខែមករា ឆ្នាំ២០២៥-- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាប្រធានគណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំ កាលពីថ្ងៃទី១៥ ខែមករា ឆ្នាំ២០២៥ បានដឹកនាំសហការីទៅពិនិត្យមើលការឈូសឆាយផ្លូវ ការជីកអណ្ដូងទឹក និងជួបសំណេះសំណាលសាកសូរសុខទុក្ខជាមួយក្រុមគ្រួសារអតីតយុទ្ធជនចំនួន៦៥គ្រួសារដែលទើបមករស់នៅថ្មីនៅលើដីសម្បទានសង្គមកិច្ច ព្រមទាំងបានឧបត្ថម្ភស្បៀងអាហារ គ្រឿងឧបភោគបរិភោគដែលជាអំណោយរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ជូនអតីតយុទ្ធជនចំនួន២០គ្រួសារដែលមានជីវភាពលំបាកខ្វះខាតនៅឃុំក្រយា ស្រុកសន្ទុក ខេត្តកំពង់ធំ។

ឧត្តមសេនីយ៍ទោ សោម ស៊ុន បានបញ្ជាក់ថា ដោយមានការយកចិត្តទុកដាក់ពីសំណាក់សម្ដេចតេជោ ហ៊ុន សែន អតីតនាយករដ្ឋមន្ត្រី ប្រធានព្រឹទ្ធសភា និងជាប្រធានសមាគមអតីតយុទ្ធជនកម្ពុជា តាមរយៈឯកឧត្តមទេសរដ្ឋមន្ត្រីនាយឧត្តមសេនីយ៍ គន់ គីម កន្លងមកនេះសម្ដេចតេជោ និងសម្ដេចកិត្តិព្រឹទ្ធបណ្ឌិត បានផ្ដល់ជូនអតីតយុទ្ធជនចំនួន១៤១គ្រួសារដែលមានជីវភាពលំបាកខ្វះខាត ក្នុង១គ្រួសារទទួលបានផ្ទះ១ខ្នងទំហំ៥ម៉ែត្រគុណនឹង៧ម៉ែត្រ ព្រមទាំងដីសម្បទានសង្គមកិច្ចចំនួន១ហិកតាកន្លះ។ បងប្អូនក្រុមគ្រួសារអតីតយុទ្ធជនទាំងនោះបានមករស់នៅមានរយៈពេលជាង៣ឆ្នាំកន្លងមកហើយ។ ដោយឡែកបច្ចុប្បន្ននេះសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី លោកបានផ្ដល់ផ្ទះចំនួន៦៥ខ្នង និងដីសម្បទានសង្គមកិច្ចក្នុង១គ្រួសារ១ហិកតាជូនដល់ក្រុមគ្រួសារតីតយុទ្ធជនដែលមានជីវភាពលំបាកខ្វះខាតចំនួន៦៥គ្រួសារថ្មីទៀតដែលកំពុងដំណើរការសាងសង់បានជាង៩០ភាគរយហើយ។ បច្ចុប្បន្នបងប្អូនអតីតយុទ្ធជនយើងចំនួន៩៥ភាគរយបានមករស់នៅជាបន្តបន្ទាប់។

ក្នុងឱកាសនោះ ឧត្តមសេនីយ៍ទោ សោម ស៊ុន បាននាំយកស្បៀងអាហារ គ្រឿងឧបភោគបរិភោគដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ឧបត្ថម្ភជូនដល់បងប្អូនក្រុមគ្រួសារអតីតយុទ្ធជនចំនួន២០គ្រួសារ ដោយក្នុងមួយគ្រួសារទទួលបាននូវអង្ករចំនួន២៥គីឡូក្រាមមីជាតិចំនួន១កេស ត្រីខកំប៉ុង១យួរ និងទឹកត្រីទឹកស៊ីអ៊ីវចំនួន១យួរផងដែរ។

អតីតយុទ្ធជនដែលបានមករស់នៅលើដីសម្បទានសង្គមកិច្ច បានថ្លែងអំណរគុណចំពោះសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ដែលបានជួយដោះស្រាយនូវរាល់ការលំបាកខ្វះខាតជូនពួកគាត់គ្រប់បែបយ៉ាងនាពេលកន្លងមក និងសូមគោរពជូនពរសម្ដេចនិងលោកជំទាវ សូមទទួលបាននូវពុទ្ធពរទាំង៤ប្រការ កុំបីឃ្លៀងឃ្លាតឡើយ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)