AKP បន្ទាយមានជ័យ ថ្ងៃទី១៦ ខែមករា ឆ្នាំ២០២៥--ស្រូវប្រាំងរបស់កសិករនៅក្នុងឃុំចំនួន៥នៃស្រុកភ្នំស្រុក និងស្រុកព្រះនេត្រព្រះ ខេត្តបន្ទាយមានជ័យ ដែលជួបបញ្ហាខ្វះទឹកត្រូវបានជួយសង្គ្រោះបានប្រមាណចំនួនជាង៧២០០ហិកតាហើយលើផ្ទៃដីស្រែដែលខ្វះទឹកចំនួន៨៣០០ហិកតា បន្ទាប់ពីអាជ្ញាធរខេត្តចុះអន្តរាគមន៍ការបើកទ្វារទឹកពីអាងត្រពាំងថ្ម ដើម្បីធ្វើការសង្រ្គោះស្រូវប្រាំងនេះ គឺមានរយៈពេលជិត១ខែហើយមកនោះ។

នេះជាការលើកឡើងរបស់លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយមខេត្តបន្ទាយមានជ័យ ក្នុងឱកាសដែលលោកបន្តដឹកនាំក្រុមការងារមន្ទីរ សហការជាមួយអាជ្ញាធរមូលដ្ឋាន និងសហគមន៍កសិករប្រើប្រាស់ទឹក និងប្រជាពលរដ្ឋ ដើម្បីចុះពិនិត្យលើការងារអន្តរាគមន៍បើកទ្វារទឹកពីអាងត្រពាំងថ្មសង្គ្រោះស្រូវរបស់ប្រជាកសិករក្នុងភូមិសាស្ត្រស្រុកភ្នំស្រុក និងស្រុកព្រះនេត្រព្រះ កាលពីថ្ងៃទី១៥ ខែមករា ឆ្នាំ២០២៥។

លោកប្រធានមន្ទីរបានឱ្យដឹងទៀតថា ការចុះអន្តរាគមន៍សង្គ្រោះស្រូវប្រាំងជូនកសិករក្នុងមូលដ្ឋានស្រុកទាំងពីរនេះធ្វើឡើងដោយទទួលបាននូវការឯកភាព និងបទបញ្ជាពីឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ឱ្យបើកទ្វារទឹកពីអាងត្រពាំងថ្មសង្គ្រោះស្រូវរបស់ប្រជាពលរដ្ឋចំនួន៥ឃុំ លើផ្ទៃដីសរុបចំនួន៨៣០០ហិកតានេះនៅឃុំស្រះជីក ឃុំពន្លៃ (ស្រុកភ្នំស្រុក) ឃុំទានកាំ ឃុំរហាល និងឃុំព្រះនេត្រព្រះ (ស្រុកព្រះនេត្រព្រះ)។

លោក យឹម ប៊ុនរ៉ុម បានបន្ថែមទៀតថា ឥឡូវនេះចំពោះការសង្គ្រោះស្រូវប្រាំងក្នុងតំបន់នេះក្រុមការងារបានបើកទ្វារធំស្ពានទី១បន្ថែមទៀត  ដើម្បីបង្ហូរទឹកឱ្យបានលឿនជួយលើផ្ទៃដីស្រូវដែលនៅសេសសល់នោះរដ្ឋបាលខេត្ត មន្ទីរ អាជ្ញាធរមូលដ្ឋាន និងសហគមន៍កសិករប្រើប្រាស់ទឹក និងបន្តតាមដាន និងត្រួតពិនិត្យជាបន្តបន្ទាប់ទៀត ដើម្បីសង្គ្រោះរហូតសម្រេចគោលដៅ។

ឆ្លៀតក្នុងឱកាសនោះ លោកប្រធានមន្ទីរបានបន្តធ្វើការអំពាវនាវយ៉ាងទទូចដល់បងប្អូនប្រជាពលរដ្ឋ សូមចូលរួមសហការជាមួយអាជ្ញាធរភូមិ ឃុំ ក្រុង-ស្រុក សហគមន៍កសិករប្រើប្រាស់ទឹក ក្នុងការប្រើប្រាស់ទឹកឱ្យបានត្រឹមត្រូវ និងមានប្រសិទ្ធភាពខ្ពស់ សូមឱ្យអាជ្ញាធរមូលដ្ឋានទាំង៩ស្រុក ក្រុង មេត្តាជួយផ្សព្វផ្សាយ និងណែនាំបន្ថែមទៀតដល់ប្រជាពលរដ្ឋក្នុងការធ្វើស្រែប្រាំងទៅតាមផែនការប្រើប្រាស់ទឹក និងសុំជួយសហការគ្នា ដើម្បីថែរក្សាទឹកទុកសម្រាប់ប្រើប្រាស់កុំឱ្យខ្វះខាតនៅក្នុងរដូវប្រាំងខាងមុខនេះ៕

ដោយ ឈុន សារ៉ាត