AKP កែប ថ្ងៃទី១៥ ខែមករា ឆ្នាំ២០២៥--

មន្រ្តីជំនាញជលផលនៃមន្ទីរកសិកម្ម រុក្ខាប្រមាញ់ និងនេសាទ ខេត្តកែប បានចុះត្រួតពិនិត្យការដាក់លក់គ្រឿងសមុទ្រនៅក្នុងផ្សារក្តាម ជាពិសេសក្តាមសេះតែម្តង ការចុះពិនិត្យនេះបន្ទាប់ពីមន្រ្តីជំនាញចុះទៅជួបជាមួយប្រជាពលរដ្ឋ ដែលជាអ្នកនេសាទក្រុងកែប ខេត្តកែប ក្រោយពីក្រុមអ្នកនេសាទទាំងនោះ លើកឡើងថាមានឈ្មួញលួចនាំចូលក្តាមពីប្រទេសវៀតណាមហួសហេតុ ធ្វើឱ្យតម្លៃក្តាមដែលពួកគាត់ខំរកមកនោះលក់បានតម្លៃទាប។

ពេលជួបជាមួយមន្ត្រីជំនាញ ក្រុមប្រជាពលរដ្ឋបានលើកឡើងថា រយៈពេលជាង១ឆ្នាំមកនេះមានការនាំចូលក្តាមមកពីបណ្តាប្រទេសជិតខាង ជាហេតុធ្វើឱ្យក្តាមដែលអ្នកនេសាទរកបានធ្លាក់ថ្លៃពី៣ម៉ឺនរៀលមកត្រឹមជាង១ម៉ឺនរៀលក្នុងមួយគីឡូក្រាម (ក្តាមមិនទាន់ញែកទំហំ)។ អ្នកនេសាទបន្តថា ក្តាមសេះដែលនាំចូលពីវៀតណាមមានទំហំធំៗជាងក្តាមក្នុងសមុទ្រកែប ជាហេតុធ្វើឱ្យការប្រកួតប្រជែងមានភាពពិបាកខ្ពស់។ ស្រីពៅ ដែលជាអាជីវករលក់គ្រឿងសមុទ្រនៅផ្សារក្តាម បានឱ្យដឹងថា ក្តាមសេះដែលអ្នកស្រីកំពុងលក់នេះ ប្រមូលទិញផ្ទាល់ពីអ្នកនេសាទនៅផែក្តាមជាប់ផ្សាររាត្រី ខេត្តកែប ដោយបញ្ជាក់ដែរថា ការឱ្យតម្លៃក្តាមទៅតាមទំហំរបស់ក្តាម។

បើក្តាមធំភាគច្រើនអ្នកស្រីទិញពីអ្នកនេសាទក្នុងតម្លៃ២៥.០០០រៀល ទៅ ៣០.០០០រៀល។ បើក្តាមមានទំហំតូចភាគច្រើនអ្នកស្រីទិញពីអ្នកនេសាទចន្លោះពី១៥.០០០រៀល ទៅ២០.០០០រៀល។ ពេលប្រមូលទិញរួចហើយ ទើបអ្នកស្រីយកមកបែងចែងទៅតាមទំហំលេខ១ (៥-៦-៧ក្តាមស្មើ១គ.ក) លេខ២ (៨-១០ក្តាមស្មើ១គ.ក) និងលេខ៣ ទើបលើកមកលក់នៅផ្សារ។ ចំណែកលោក បូ ថា ជាអាជីវករមួយរូបទៀតក៏លើកឡើងស្រដៀងគ្នាដែរថា តម្លៃក្តាមខ្ពស់ ឬ ទាប ទៅតាមទំហំរបស់ក្តាម តែក្នុងរដូវបុណ្យទានការទិញចូលក្តាមពីអ្នកនេសាទក៏ថ្លៃដែរ អាចចន្លោះ៣០.០០០រៀល ទៅ៣៥.០០០រៀល ក្នុងមួយគីឡូក្រាម (ក្តាមមិនទាន់ញែកទំហំ)។ លោក ភឿន ផល្លា នាយរងខណ្ឌរដ្ឋបាលជលផលខេត្តកែប បានប្រាប់ឱ្យដឹងនៅព្រឹកថ្ងៃទី១៥ ខែមករា ឆ្នាំ២០២៥ ថា កន្លងមកមន្រ្តីជំនាញបានចុះជួបជាមួយអ្នកនេសាទស្វែងយល់ពីទុក្ខលំបាក និងសំណូមពរ ក្នុងនោះលោកបានដឹកនាំមន្រ្តីជំនាញ ជាមួយអាជ្ញាធរក្រុងកែប ចុះសិក្សាការលក់ដូររបស់អាជីវករ ក្រោយការសួរនាំក្រុមអាជីវករក្នុងផ្សារក្តាម សុទ្ធតែលក់ក្តាមដែលទិញពីទូកអ្នកនេសាទផ្ទាល់ តែដោយសារទំហំ និងផលក្តាមច្រើន ទើបតម្លៃក្តាមមួយរយៈនេះថ្លៃមិនដូចចិត្តរបស់អ្នកនេសាទ។

លោកបញ្ជាក់ដែរថា កន្លងទៅក៏ធ្លាប់មានការធ្លាក់ថ្លៃ ដោយមានការលួចនាំយកផលក្តាមសេះពីតំបន់ដទៃយកលក់មែន តែក្នុងចំនួនតិចតូចប៉ុណ្ណោះ។ យ៉ាងណាលោកសំណូមពរដល់បណ្តាអាជីវករទាំងអស់ ត្រូវថែរក្សាកេរ្តិ៍ឈ្មោះក្តាមកែប ឱ្យនៅគង់វង្សតាមរយៈលក់ផលក្តាមដែលនេសាទបានដោយអ្នកនេសាទក្នុងខេត្តរបស់យើង៕

ដោយ ប្រាក់ លាង