AKP ភ្នំពេញ ថ្ងៃទី១៥ ខែមករា ឆ្នាំ២០២៥-- ដោយមានការយកចិត្តទុកដាក់ពីឯកឧត្តម សួន សុម៉ាលីន ប្រធានគណៈកម្មាធិការសាខាកាកបាទក្រហមកម្ពុជាខេត្តព្រៃវែង កាលពីថ្ងៃទី១៤ ខែមករា ឆ្នាំ២០២៥ សាខាកាកបាទក្រហមកម្ពុជាខេត្តបានបើកវគ្គផ្សព្វផ្សាយវិជ្ជាសង្គ្រោះបឋម ក្រោមការដឹកនាំ និងសម្របសម្រួលដោយលោកស្រី បណ្ឌិត អ៊ុក មាសសូលីណា នាយិកាសាខាខេត្ត ដោយមានការចូលរួមពីក្រុមប្រតិបត្តិសាខា អ្នកស្ម័គ្រចិត្តសាខា លោក លោកស្រី អនុប្រធាន ហេរញ្ញឹក សមាជិកគណៈកម្មាធិការ មន្រី្តប្រចាំការ និងបុគ្គលិកកិច្ចសន្យាអនុសាខាក្រុង-ស្រុកទាំង១៣ សរុបអ្នកចូលរួមចំនួន១០៥នាក់ នៅសាលប្រជុំសាខាកាកបាទក្រហមកម្ពុជាខេត្តព្រៃវែង។

ក្នុងឱកាសនោះ លោកស្រីបណ្ឌិតនាយិកាសាខាខេត្ត បាននាំមកនូវប្រសាសន៍ផ្ដាំផ្ញើសាកសួរសុខទុក្ខដល់សិក្ខាកាមក្នុងវគ្គ ពីសំណាក់ឯកឧត្តមអភិសន្តិបណ្ឌិត ស សុខា ប្រធានកិត្តិយសសាខា និងឯកឧត្តម សួន សុម៉ាលីន ប្រធានគណៈកម្មាធិការសាខាខេត្ត និងសូមឱ្យសិក្ខាកាមយកចិត្តទុកដាក់រាល់ការធ្វើបទបង្ហាញនីមួយៗ ដែលគ្រូឧទ្ទេសបានបង្ហាត់បង្ហាញ ក៏ដូចជាចែករំលែកចំណេះដឹង បទពិសោធន៍ និងការអនុវត្តការងារជាក់ស្តែង។

ប្រធានបទបានលើកមកធ្វើបទបង្ហាញរួមមាន៖ វិជ្ជាសង្គ្រោះបឋម តួនាទីអ្នកសង្គ្រោះ គោលការណ៍គ្រឺះនៃការសង្គ្រោះបឋម ការធ្វើចលនាដង្ហើម(CPR) ការដាក់ស្ថានភាពដំណេក ការជួយសង្គ្រោះអ្នកស្លាក់ ការជួយសង្គ្រោះអ្នកលង់ទឹក ការបញ្ជូនជនរងគ្រោះ បច្ចេកទេសនៃការថតរូប និងការកាត់តវីដេអូតាមទូរសព្ទដៃ។

នាឱកាសបិទវគ្គ លោកស្រីបណ្ឌិតនាយិកាសាខាខេត្តបានផ្តាំផ្ញើដល់លោក លោកស្រី អនុប្រធាន ហេរញ្ញឹក សមាជិកគណៈកម្មាធិកាអនុសាខា មន្រី្តប្រចាំការ និងបុគ្គលិកកិច្ចសន្យាអនុសាខាក្រុង-ស្រុកទាំង១៣ សូមយកខ្លឹមសារក្នុងមេរៀននីមួយៗទៅអនុវត្តបន្តការងារក្នុងអនុសាខាឱ្យមានប្រសិទ្ធភាព ពិសេសត្រូវចែករំលែកចំណេះដឹងដែលបានរៀនសូត្រនេះ ដល់ក្រុមការងារអនុសាខារបស់ខ្លួនផងដែរ៕

ដោយ ៖ ពេជ្រ សំអឿន (ប្រភព៖ កាកបាទក្រហមកម្ពុជា)