AKP សៀមរាប ថ្ងៃទី១៣ ខែមករា ឆ្នាំ២០២៥--

ក្រុមប្រឹក្សាខេត្តសៀមរាប អាណត្តិទី៤ បានបើកកិច្ចប្រជុំវិសាមញ្ញដើម្បីធ្វើការពិនិត្យ ពិភាក្សា និងអនុម័តទៅលើសេចក្តីព្រាងក្របខ័ណ្ឌអភិវឌ្ឍន៍ខេត្ត និងកម្មវិធីអភិវឌ្ឍន៍មូលដ្ឋាន រយៈពេល៥ឆ្នាំ (២០២៥-២០២៩) នៅសាលប្រជុំសាលាខេត្តសៀមរាប នាថ្ងៃទី១៣ ខែមករា ឆ្នាំ២០២៥ ក្រោមអធិបតីភាពឯកឧត្តម លី សំរិទ្ធ ប្រធានក្រុមប្រឹក្សាខេត្ត និងលោក សុខ ថុល អភិបាលរងខេត្ត ដោយមានការចូលរួមពីសមាជិកសមាជិកាក្រុមប្រឹក្សាខេត្ត អស់លោក លោកស្រីជានាយករងរដ្ឋបាលខេត្ត ថ្នាក់ដឹកនាំមន្ទីរ អង្គភាព ទីចាត់ការ អង្គភាពចំណុះសាលាខេត្តផងដែរ។ កិច្ចប្រជុំក៏បានត្រួតពិនិត្យពិភាក្សាលើសេចក្តីព្រាងដីកា ស្តីពីការបង្កើតក្រុមការងារចុះមូលដ្ឋានរបស់ក្រុមប្រឹក្សាខេត្តអាណត្តិទី៤នេះផងដែរ។

លោក សុខ ថុល អភិបាលរងខេត្ត បានធ្វើសេចក្តីរាយការណ៍អំពីសូចនាករនៃគម្រោងផែនការក្នុងក្របខ័ណ្ឌអភិវឌ្ឍន៍ខេត្ត និងកម្មវិធីអភិវឌ្ឍន៍មូលដ្ឋានរយៈពេល៥ឆ្នាំ (២០២៥-២០២៩) របស់រដ្ឋបាលខេត្ត ដាក់ជូនសមាជិកក្រុមប្រឹក្សាខេត្ត បានពិនិត្យពិភាក្សាទៅលើចំណុចមួយចំនួន ដែលជាសូចនាករនៃមន្ទីរ អង្គភាពបានលើកផែនការក្នុងរយៈពេល៥ឆ្នាំ ដោយបានសូមឱ្យធ្វើការកែតម្រូវនូវខ្លឹមសារអត្ថន័យក្នុងគម្រោងដើមី្បធ្វើការអនុម័ត។

បន្ទាប់សមាជិកសមាជិកានៃកិច្ចប្រជុំក្រុមប្រឹក្សាខេត្តបានធ្វើការអនុម័តរួចមក ឯកឧត្តម លី សំរិទ្ធ ក៏បានធ្វើការណែនាំដល់ក្រុមការងារទាំង៥ ដែលត្រូវបានកំណត់អំពីរបៀបរបបចុះមូលដ្ឋានរបស់ក្រុមប្រឹក្សា ដើមី្បធ្វើការជួបប្រាស្រ័យសួរសុខទុក្ខ និងក្តាប់នូវសំណូមពររបស់ប្រជាពលរដ្ឋ ដើមី្បធ្វើការដោះស្រាយនូវរាល់បញ្ហាប្រឈមនានារបស់ប្រជាពលរដ្ឋ នៅក្នុងដែនសមត្ថកិច្ចរបស់ខ្លួននេះ ត្រូវប្រកាន់ភ្ជាប់ពីតួនាទី ភារកិច្ចរបស់ក្រុមនីមួយៗ សំដៅធ្វើការដោះស្រាយនូវរាល់ទុក្ខកង្វល់របស់ប្រជាពលរដ្ឋនៅតាមមូលដ្ឋាន ព្រមទាំងត្រូវឈរលើស្មារតីអព្យាក្រឹត មិនលម្អៀង មិនប្រកាន់និន្នាការនយោបាយណាមួយឡើយ ដោយឈរលើភាពយុត្តិធម៌។ ក្នុងការចុះមូលដ្ឋាននោះដែរ ក្រុមការងារត្រូវគោរពឱ្យបាននូវក្រមសីលធម៌សមាជិកក្រុមប្រឹក្សារាជធានី ខេត្ត ដែលបញ្ញត្តិដោយសមាគមជាតិក្រុមប្រឹក្សារាជធានី-ខេត្ត៕

ដោយ ហង្ស សៀក