EN 
FR 
AR
CNប្រធានាធិបតីថ្មីរបស់លីបង់អំពាវនាវឱ្យមានគោលនយោបាយការពារជាតិគ្រប់ជ្រុងជ្រោយ និងកិច្ចសន្ទនាជាមួយស៊ីរី
AKP ភ្នំពេញ ថ្ងៃទី១០ ខែមករា ឆ្នាំ២០២៥ -- ប្រធានាធិបតីលីបង់ទើបជាប់ឆ្នោត លោក ចូសេប អេអួន (Joseph Aoun) បានអំពាវនាវកាលពីថ្ងៃព្រហស្បតិ៍សម្រាប់គោលនយោបាយការពារចជាតិគ្រប់ជ្រុងជ្រោយមួយដើម្បីទប់ទល់នឹងការវាយប្រហាររបស់អ៊ីស្រាអែល និងកិច្ចសន្ទនាជាមួយប្រទេសស៊ីរី។
លោក អេអួន ត្រូវបានបោះឆ្នោតជ្រើសរើសដោយសភាលីបង់កាលពីថ្ងៃព្រហស្បតិ៍ ដោយបានបញ្ចប់ភាពទំនេរផ្នែកនយោបាយរយៈពេលពីរឆ្នាំចាប់តាំងពីលោកប្រធានាធិបតី មីឈែល អេអួន (Michel Aoun) បានចាកចេញពីតំណែងកាលពីក្នុងខែតុលា ឆ្នាំ២០២២។
លោក អេអួន បាននិយាយនៅក្នុងសន្ទរកថាដំបូងរបស់លោកទៅកាន់សភាថា «ខ្ញុំសូមអញ្ជើញភាគីទាំងអស់ឱ្យមកពិភាក្សាគ្នាអំពីគោលនយោបាយការពារជាតិគ្រប់ជ្រុងជ្រោយ ដែលអាចឱ្យរដ្ឋបញ្ចប់ការកាន់កាប់របស់អ៊ីស្រាអែល និងប្រឆាំងនឹងការឈ្លានពាន»។
លោកក៏បានសន្យាថានឹងសាងសង់ឡើងវិញនូវតំបន់ដែលត្រូវបានបំផ្លិចបំផ្លាញដោយការវាយប្រហាររបស់អ៊ីស្រាអែល ដែលរួមមានភាគខាងត្បូងរបស់ប្រទេសលីបង់ តំបន់បេកា តំបន់ជាយក្រុងភាគខាងត្បូងនៃទីក្រុងបេរុត និងតំបន់រងផលប៉ះពាល់ផ្សេងទៀតនៅទូទាំងប្រទេស។
លោកបាននិយាយថា «ក្នុងនាមជាអគ្គមេបញ្ជាការកងកម្លាំងប្រដាប់អាវុធ ខ្ញុំសូមបញ្ជាក់សារជាថ្មីអំពីសិទ្ធិផ្តាច់មុខរបស់រដ្ឋក្នុងការកាន់អាវុធ»។
ចំពោះទំនាក់ទំនងជាមួយប្រទេសស៊ីរី លោក អេអួន បាននិយាយថា«យើងមានឱកាសដើម្បីចាប់ផ្តើមកិច្ចសន្ទនាជាមួយរដ្ឋស៊ីរី និងបង្កើតទំនាក់ទំនងប្រកបដោយភាពល្អប្រសើររវាងប្រជាជាតិរបស់យើង»។
លោកបានលើកឡើងនូវប្រធានបទសំខាន់ៗមួយចំនួន ដែលរួមមានការគោរពអធិបតេយ្យភាព និងឯករាជ្យភាពនៃប្រទេសទាំងពីរ ការធានាព្រំដែនក្នុងទិសដៅទាំងពីរ ការមិនជ្រៀតជ្រែកកិច្ចការផ្ទៃក្នុងរបស់គ្នាទៅវិញទៅមក និងបញ្ហាជនបាត់ខ្លួនជាដើម៕
ដោយ៖ យា ចិន្ដាខន្ដី (ប្រភព៖ AA-AKP)
