AKP កំពង់ស្ពឺ ថ្ងៃទី១០ ខែមករា ឆ្នាំ២០២៥-- លោក យឹម ណន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ បានលើកឡើងថា ប្រជាពលរដ្ឋមិនគួរទុកដីឱ្យទំនេរចោលទេ គួរនាំគ្នាដាំដុះដំណាំគ្រប់ប្រភេទ ជាពិសេសដំណាំបន្លែសរីរាង្គកំពុងមានទីផ្សារល្អ ដើម្បីទាញយកប្រាក់ចំណូលបន្ថែមផ្គត់ផ្គង់គ្រួសារ។

លោកប្រធានមន្ទីរបានបន្តថា ដើម្បីមានភាពងាយស្រួលទាំងអ្នកផលិត និងអ្នកទិញ បច្ចុប្បន្នមន្ទីរកសិកម្មក៏បានរៀបចំបង្កើតសហគមន៍កសិកម្ម ក្នុងការដាំបន្លែសុវត្ថិភាពក្នុងផ្ទះសំណាញ់ធន់នឹងបម្រែបម្រួលអាកាសធាតុ មិនពិបាកថែទាំ ហើយចំណាយពេលវេលាតិច ទទួលបានទិន្នផលខ្ពស់ ពិសេសគ្មានសារធាតុគីមី ដែលធ្វើឱ្យប៉ះពាល់ដល់សុខភាពអ្នកប្រើប្រាស់។ ការដាំបន្លែសរីរាង្គ គឺមានការរីកលូតលាស់ច្រើន ដែលមានតាមរយៈគម្រោង និងកម្មវិធីផ្សេងៗ ក្នុងការជួយគាំទ្រ ក្នុងនោះយើងក៏បានសង់ផ្ទះសំណាញ់ជូនប្រជាកសិករ គាត់ដាំក្នុងផ្ទះសំណាញ់ ដែលផលដំណាំនៅក្នុងផ្ទះសំណាញ់វាល្អ ហើយវាមានសុវត្ថិភាព ដែលជាហេតុជំរុញឱ្យពួកគាត់អាចដាំបានពេញមួយឆ្នាំ ម្យ៉ាងទៀតឃើញថាបន្លែ គឺមានការពេញនិយម និងកំពុងតែរីកផុសផុលហើយក្នុងខេត្តកំពង់ស្ពឺ នឹងមិនមានបញ្ហាអ្វីទេ។

សព្វថ្ងៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ បានបង្កើតសហគមន៍កសិកម្មជាច្រើនកន្លែងប៉ុន្តែសហគមន៍ដែលដំណើរការបានល្អមានសហគមន៍កសិកម្ម៤គឺ៖ ១. សហគមន៍កសិកម្មស្ត្រីក្តីសង្ឃឺមជីវិតថ្លៃថ្នូរប្រាំបីមុម ២. សហគមន៍កសិកម្មសាមគ្គីអមលាំងស្ថិតក្នុងស្រុកថ្ពង ៣. សហគមន៍កសិកម្មគាំទ្រស្ត្រីត្រពាំងជោរ និង៤. សហគមន៍កសិកម្មស្ត្រីសាមគ្គីសង្កែសាទបស្ថិតនៅស្រុកឱរ៉ាល់។ ក្នុងចំណោមសហគមន៍ទាំង៤ សហគមន៍កសិកម្មសាមគ្គីអមលាំងស្ថិតនៅភូមិតាកោង ឃុំអមលាំង ស្រុកថ្ពង បានធ្វើការដាំដុះបន្លែលើទឹក (Hydroponic)។

លោក យឹម ណន បានបន្ថែមទៀតថា ការដាំដុះបន្លែលើទឹកជាការដាំដុះមួយបែបដែលត្រូវបានសហគមន៍កសិកម្មសាមគ្គីអមលាំង បានទទួលជោគជ័យ ក្នុងការដាំសម្រាប់ផ្គត់ផ្គង់ទីផ្សារ ដែលបច្ចុប្បន្នអាចឈានទៅដល់បញ្ជូនទៅលក់កាន់ទីផ្សារទាំងក្នុងតំបន់ និងមួយផ្នែកទៀតបានចែកចាយលក់ទៅកាន់បណ្តាខេត្តដទៃទៀត។  បច្ចេកទេសដាំបន្លែលើទឹក គឺជាការដាំដោយមិនប្រើដី ជាវិធីសាស្រ្តមួយដែលសហគមន៍ទទួលបានជោគជ័យ និងព្រមជាមួយគ្នាផងដែរ ថែមទាំងបានឈានទៅដល់បណ្តុះបណ្តាលដល់សហគមន៍ដទៃសម្រាប់សិក្សារៀនសូត្រជំនាញដើម្បីអនុវត្តក្នុងសហគមន៍របស់ខ្លួនថែមទៀត។ ក្រៅពីការដាំបន្លែលើទឹកនេះ សហគមន៍បានធ្វើការបណ្តុះបណ្តាលប្រជាសហគមន៍ ដែលកាលពីមុនមិនចេះដាំបន្លែ ចិញ្ចឹមសត្វ តែក្រោយការបង្កើតសហគមន៍ ពួកគាត់បាននាំគ្នាដាំបន្លែ និងចិញ្ចឹមសត្វធ្វើឱ្យជីវភាពមានការផ្លាស់ប្តូរប្រសើរជាងមុន។ កាលពីមុនពួកគាត់ខ្លះបានចូលព្រៃកាប់ឈើ និងបរបាញ់សត្វ ខ្លះធ្វើចំណាកស្រុក ខ្លះស៊ីឈ្នួលធ្វើស្មៅតាមចម្ការអំពៅឱ្យគេ តែបច្ចុប្បន្នបានងាកមកដាំបន្លែ និងចិញ្ចឹមសត្វ ហើយបើក្រឡេកមកមើលជីវភាពពួកគាត់ឃើញថាល្អប្រសើរឡើងបន្តបន្ទាប់។

ក្នុងរយៈពេល១ខែ សហគមន៍អាចដាំបន្លែលើទឹកចំនួន២៣ធ្នើ គឺអាចទទួលបានទិន្នផលប្រមាណ១៥០០គីឡូក្រាម ដោយរកចំណូលបានសរុបជាង១ពាន់ដុល្លារអាមេរិក ឬបើមានការដាំចម្រុះ ថវិកាដែលទទួលបានក៏ច្រើនជាងនេះដែរ ពោលគឺអាស្រ័យទៅលើទិន្នផល និងតម្លៃលើទីផ្សារប៉ុណ្ណោះ។ ក្នុងរយៈពេលដាំបន្លែលើកទឹកជាង៧ឆ្នាំមកនេះ សហគមន៍ជួបឧបសគ្គខ្លះៗ ពិសេសពេលដំបូង អាចដាំបានត្រឹម៣ទៅ៤ធ្នើ ហើយក៏បានចាប់ផ្តើមបង្កើនចំនួនបន្តបន្ទាប់ រហូតមកដល់ពេលបច្ចុប្បន្នបានពង្រីកដល់ជាង២០ធ្នើ ហើយការរកចំណូលក៏បានខ្ពស់ទៅតាមនោះដែរ។ ដើម្បីឆ្លើយតប និងលើកទឹកចិត្តដល់សហគមន៍កសិកម្ម លោកប្រធានមន្ទីរបានថ្លែងការកោតសរសើរដល់គណៈកម្មការសហគមន៍ និងគាំទ្រលើកទឹកចិត្តដល់សមាជិកសហគមន៍ទាំងអស់ សូមខិតខំបន្ថែមទៀតដើម្បីសេដ្ឋកិច្ចគ្រួសារផង លើកកម្ពស់ផលិតកម្មក្នុងស្រុករបស់យើងផង និងប្រើប្រាស់ពេលវេលា ធនធានទាំងសម្ភារ កម្លាំងពលកម្មដែលយើងមាន ជាជាងចំណាកស្រុកទៅធ្វើការនៅក្រៅសហគមន៍។

មន្ទីរកសិកម្មខេត្តគ្រោងរៀបចំឱ្យមានទីផ្សាររួមរបស់សហគមន៍មួយដើម្បីឱ្យមានការប្រមូលផ្តុំកសិផល បង្កភាពងាយស្រួលទៅដល់ដៃគូ អ្នកទទួលទិញ មានទីតាំងមួយពិតប្រាកដ បរិមាណបន្លែជាក់លាក់ជាប្រចាំនៃកសិផលដែលយើងបានផលិត និងងាយស្រួលនាំចេញទៅខាងក្រៅបាន៕

ដោយ លឹម សាន្ត