AKP ភ្នំពេញ ថ្ងៃទី០៩ ខែមករា ឆ្នាំ២០២៥ -- នាយកប្រតិបត្តិមូលនិធិនីប៉ុន លោក ម៉ូរី យូជី បានលើកឡើងថា ក្រោមជំនួយថវិកាពីមូលនិធិនីប៉ុន អង្គការមណ្ឌលគាំទ្រការអប់រំគីហ្សូណា នឹងបន្តរួមចំណែកដោះស្រាយបញ្ហាប្រឈមក្នុងវិស័យអប់រំនៅតំបន់ជនបទនៅប្រទេសកម្ពុជា ដោយភ្ជាប់គម្លាតនៃការអប់រំសម្រាប់ការអភិវឌ្ឍប្រកបដោយចីរភាព។ ការលើកឡើងរបស់លោក ម៉ូរី យូជី ដូចនេះធ្វើឡើងនាជំនួបពិភាក្សាការងារជាមួយឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នៅទីស្ដីការក្រសួង កាលពីថ្ងៃទី០៨ ខែមករា ឆ្នាំ២០២៥។

នាយកប្រតិបត្តិមូលនិធិនីប៉ុនរូបនេះបានគូសបញ្ជាក់ថា ការដោះស្រាយបញ្ហាប្រឈមក្នុងវិស័យអប់រំនៅតំបន់ជនបទ ដោយភ្ជាប់គម្លាតនៃការអប់រំនៅកម្ពុជាសម្រាប់ការអភិវឌ្ឍប្រកបដោយចីរភាព រួមមាន ១) គម្រោងការគ្រប់គ្រងបណ្ណាល័យ និងលើកកម្ពស់ការអាន ដោយបានអនុវត្តការហាមប្រើទូរស័ព្ទក្នុងសាលារៀន និងការផ្តល់ជូនសៀវភៅស្របតាមសំណូមពររបស់សិស្ស ២) ការរៀបចំ Software គ្រប់ គ្រងបណ្ណាល័យពាក់កណ្ដាលស្វ័យប្រវត្តិ PMB ដែលមានជាភាសាខ្មែរ និងប្រើ QR code ដែលផ្តល់ភាពងាយស្រួល រហ័ស និងកាត់បន្ថយការប្រើក្រដាស  ៣) បញ្ចូលការបណ្ដុះបណ្ដាលការគ្រប់គ្រងបណ្ណាល័យ  និងសុខភាពសិក្សាទៅក្នុងការបណ្ដុះបណ្ដាលគ្រូគ្រប់កម្រិត ៤) ការអនុម័តស្តង់ដាអគារពហុបំណងសម្រាប់កីឡា និងការសិក្សា ៥) គម្រោងការសាងសង់តារាងបាល់សម្រាប់អប់រំកាយ និងកីឡា រួមទាំងសកម្មភាពក្រៅថ្នាក់ផ្សេងៗទៀត ៦) ការផ្តល់ប្រាក់ឧបត្ថម្ភដល់គរុនិស្សិតឆ្នាំទី៤ បរិញ្ញាបត្របូក១ គ្រូឧទ្ទេសដឹកនាំការស្រាវជ្រាវប្រតិបត្តិ ព្រមទាំងផ្តល់ទស្សនកិច្ចសិក្សាតំបន់អង្គរ ខេត្តសៀមរាប និង៧)ការត្រៀមសម្រាប់ការសម្ពោធអគារសិក្សានៅខេត្តកោះកុង និងពិធីបិទគម្រោងសុខភាពសិក្សា និងការឈានចូលដំណាក់កាលទី២ ដែលគាំទ្រដោយសាកលវិទ្យាល័យតូក្យូ ហ្គាគឹហ្គេ នាចុងឆ្នាំ២០២៥នេះ។

ជាការឆ្លើយតប ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណយ៉ាងជ្រាលជ្រៅដល់អង្គការមណ្ឌលគាំទ្រការអប់រំគីហ្សូណា និងមូលនិធិនីប៉ុន ដែលចូលរួមលើកកម្ពស់វិស័យអប់រំនៅកម្ពុជាចាប់តាំងពីឆ្នាំ២០០៨ ជាពិសេសបានបន្តគាំទ្រដល់ការអប់រំនៅតាមតំបន់ដាច់ស្រយាល ដោយបានជួយដល់សិស្សានុសិស្សនៃគ្រួសារដែលខ្វះខាតលទ្ធភាព ឱ្យទទួលបានការអប់រំប្រកបដោយគុណភាព សមភាព និងបរិយាបន្ន៕

ដោយ៖ ចាន់ សុភឿន (ប្រភព៖ ក្រសួងអប់រំ)