AKP ភ្នំពេញ ថ្ងៃទី០៩ ខែមករា ឆ្នាំ២០២៥ -- រដ្ឋមន្ត្រីក្រសួងកសិកម្ម លោកស្រី សុង មីយ៉ុង (Song Mi-ryung) កាលពីថ្ងៃពុធបានជំរុញឱ្យមន្ត្រីអនុវត្តន៍វិធានការកំចាត់មេរោគឱ្យបានហ្មត់ចត់ ចំពេលមានការព្រួយបារម្ភអំពីការផ្ទុះឡើងនៃជំងឺគ្រុនផ្តាសាយបក្សីបន្ថែម។

លោកស្រី សុង បានធ្វើការកត់សម្គាល់ក្នុងអំឡុងពេលដំណើរទស្សនកិច្ចរបស់លោកស្រីទៅកាន់កន្លែងសម្លាប់មេរោគនៅតំបន់ Eumseong មានចម្ងាយ ៩១គីឡូម៉ែត្រភាគខាងត្បូងនៃទីក្រុងសេអ៊ូល ខណៈដែលប្រទេសនេះបានរាយការណ៍ថាមានករណីឆ្លងជំងឺគ្រុនផ្តាសាយបក្សីចំនួន ២១ករណីនៅរដូវរដូវរងានេះ។

ក្រសួងកសិកម្មបាននិយាយថា ប្រហែលពី ៣ទៅ៤ករណីដែលត្រូវបានរាយការណ៍ជារៀងរាល់សប្តាហ៍ចាប់តាំងពីខែធ្នូ ដែលអាចបង្ហាញពីការរីករាលដាលយ៉ាងទូលំទូលាយនៃជំងឺ។ករណី​ថ្មី​បំផុត​ត្រូវ​បាន​គេ​រាយការណ៍​នៅ​កសិដ្ឋាន​ចិញ្ចឹម​ទា​ក្នុង​ទីក្រុងជីមជេ (Gimjae) មានចម្ងាយ ១៩៤គីឡូម៉ែត្រ​ភាគ​ខាង​ត្បូង​ទីក្រុង​សេអ៊ូល។

លោកស្រី សុង បាននិយាយថា «ការស៊ើបអង្កេតមេរោគរាតត្បាតដែលបានធ្វើឡើងលើ    កសិដ្ឋានឆ្លងជំងឺគ្រុនផ្តាសាយបក្សីបានបង្ហាញថា ពួកគេជាច្រើនបានរំលោភលើវិធានការដាក់ឱ្យនៅដាច់ដោយឡែកពីគេ រួម​ទាំង​ការ​មិន​ពាក់​ឈុត​ការពារ និង​ស្បែកជើង​កវែង ព្រម​ទាំង​ការ​សម្លាប់​មេរោគ​មិន​គ្រប់​គ្រាន់​សម្រាប់​ភ្ញៀវ និង​យានជំនិះ»។

លោកស្រី សុង ក៏បានជំរុញឱ្យមន្ត្រីរក្សាការប្រុងប្រយ័ត្នពេញមួយខែនេះ ដោយសារមានលទ្ធភាពនៃមេរោគឆ្លងតាមរយៈបក្សាបក្សីដែលធ្វើដំណើរមកកាន់ប្រទេសកូរ៉េខាងត្បូង ក្នុងរដូវ  រងានេះ។

លោកស្រីបានបន្ដថា «យើងស្នើឱ្យមន្ត្រីប្រើប្រាស់ធនធានដែលមានទាំងអស់ ដើម្បីអនុវត្តន៍ប្រតិបត្តិការសម្លាប់មេរោគនៅកសិដ្ឋានចិញ្ចឹមសត្វ និងតំបន់ដែលងាយរងគ្រោះផ្សេងទៀត រួមទាំងជម្រករបស់សត្វស្លាប»៕

ដោយ៖ មូល មិនា (ប្រភព៖ យ៉ុនហាប់)