AKP ភ្នំពេញ ថ្ងៃទី០៩ ខែមករា ឆ្នាំ២០២៥ -- យោងតាមនាយកដ្ឋានព័ត៌មានរបស់រដ្ឋាភិបាល បានឱ្យដឹងថា គណៈរដ្ឋមន្ត្រីរបស់ប្រទេសស្រីលង្កាបានអនុម័តសំណើដើម្បីពង្រីកការបន្ធូរបន្ថយបន្ថែមទៀត ដែលពាក់ព័ន្ធនឹងការដកពន្ធសម្រាប់អាកាសយានដ្ឋានអន្តរជាតិចំនួន ៣ទីតាំងនៅក្នុងប្រទេស។

នាយកដ្ឋានបាននិយាយថា រដ្ឋមន្ត្រីក្រសួងដឹកជញ្ជូន ផ្លូវហាយវេ កំពង់ផែ និងអាកាសចរណ៍ស៊ីវិល លោក ប៊ីម៉ាល់ រ៉ាត់ណាយ៉ាកេ (Bimal Rathnayake) បានដាក់សំណើនេះ។

យោងតាមនាយកដ្ឋាន បានឱ្យដឹងថា គម្រោងលើកទឹកចិត្តនេះត្រូវបានណែនាំដោយអាកាសយានដ្ឋានក្នុងការទាក់ទាញសេវាកម្មអាកាសចរណ៍សម្រាប់អាកាសយានដ្ឋានអន្តរជាតិ Jaffna អាកាសយានដ្ឋានអន្តរជាតិ Colombo (Ratmalana) និងអាកាសយានដ្ឋានអន្តរជាតិ Mattala Rajapaksa ។

នាយកដ្ឋានបានបន្ថែមថា គណៈរដ្ឋមន្ត្រីបានអនុម័តលើការពន្យារពេលសម្បទាននៃការលើកលែងថ្លៃសេវា ៥០% ពីពន្ធដែលបានអនុវត្តន៍នាពេលបច្ចុប្បន្នសម្រាប់ក្រុមហ៊ុនអាកាសចរណ៍ដែលប្រតិបត្តិការជើងហោះហើរទៅកាន់អាកាសយានដ្ឋានអន្តរជាតិ Jaffna រហូតដល់ថ្ងៃទី៣០ ខែមករា ឆ្នាំ២០២៦។ ការបន្ថែមសម្បទាននៃការលើកលែងថ្លៃសេវា ៥០% ពីពន្ធដែលបានអនុវត្តន៍នាពេលបច្ចុប្បន្នសម្រាប់ក្រុមហ៊ុនអាកាសចរណ៍ដែលប្រតិបត្តិការជើងហោះហើរទៅកាន់អាកាសយានដ្ឋានអន្តរជាតិ Colombo (Ratmalana) សម្រាប់រយៈពេលមួយឆ្នាំចាប់ពីថ្ងៃទី២៧ខែមីនា ឆ្នាំ២០២៥ និងការពន្យារសម្បទានពេញលេញដែលពាក់ព័ន្ធនឹងពន្ធដែលបានអនុវត្តន៍នាពេលបច្ចុប្បន្នសម្រាប់ក្រុមហ៊ុនអាកាសចរណ៍ដែលប្រតិបត្តិការជើងហោះហើរទៅកាន់អាកាសយានដ្ឋានអន្តរជាតិ Mattala Rajapaksa សម្រាប់រយៈពេលមួយឆ្នាំបន្ថែមទៀតចាប់ពីថ្ងៃទី២៩ ខែធ្នូ ឆ្នាំ២០២៤៕

ដោយ៖ មូល មិនា (ប្រភព៖ ភីបផលដេលី)