AKP ភ្នំពេញ ថ្ងៃទី០៩ ខែមករា ឆ្នាំ២០២៥ -- ក្រសួងការពារជាតិអ៊ីស្រាអែលបាននិយាយថា ខ្លួនបានចុះកិច្ចសន្យាចំនួនពីរ ដែលមានតម្លៃ ២៧៤,២លានដុល្លារអាម៉េរិក ជាមួយក្រុមហ៊ុន Elbit Systems សម្រាប់ការផ្គត់ផ្គង់គ្រាប់បែកខ្យល់ធុនធ្ងន់ និងការសាងសង់រោងចក្រផលិតវត្ថុធាតុដើមសម្រាប់ផ្គត់ផ្គង់នៅក្នុងប្រទេសដែលភាគច្រើនត្រូវបាននាំចូលពីបរទេស។

ក្រសួងបាននិយាយនៅក្នុងសេចក្តីថ្លែងកាណ៍មួយកាលពីថ្ងៃអង្គារថា «ក្រសួងការពារជាតិអ៊ីស្រាអែល (IMOD) បានប្រកាសនៅថ្ងៃនេះ (ថ្ងៃអង្គារ) អំពីការចុះហត្ថលេខាលើកិច្ចព្រមព្រៀងសមត្ថភាពការពារជាតិដ៏ធំចំនួនពីរជាមួយនឹងក្រុមហ៊ុន Elbit Systems ដែលមានតម្លៃសរុបប្រមាណជា ១ពាន់លានសេកែល។ យោងតាមកិច្ចសន្យាទីមួយដែលដឹកនាំដោយអគ្គនាយកលទ្ធកម្មការការពាររបស់ក្រសួង IMOD ក្រុមហ៊ុន Elbit Systems នឹងផ្គត់ផ្គង់ដល់ក្រសួង​ IMOD នូវគ្រាប់បែកខ្យល់ធុនធ្ងន់រាប់ពាន់គ្រាប់។ សម្រាប់កិច្ចសន្យាទីពីរ រួមមាននូវការបង្កើតរោងចក្រផលិតវត្ថុធាតុដើមជាតិមួយ ដែលផលិតវត្ថុធាតុដើមដែលមានប្រភពមកពីបរទេសមុនពេលមានសង្គ្រាម»។

អគ្គនាយកនៃអគ្គនាយកដ្ឋានលទ្ធកម្មការការពារនៃក្រសួងការពារជាតិអ៊ីស្រាអែល លោកឧត្តមសេនីយ៍ឯក អេក ហ្សាមៀ (Aeg Zamir) បាននិយាយថា កិច្ចព្រមព្រៀងទាំងពីរនឹងធានាបាននូវឯករាជ្យភាពឧស្សាហកម្មនៅក្នុងវិស័យសំខាន់ៗចំពោះនិរន្តរភាពនៃកងកម្លាំងការពារជាតិអ៊ីស្រាអែល (IDF)។ លោកក៏បាននិយាយបន្ថែមទៀតថា «កិច្ចព្រមព្រៀងនេះនឹងធានាបាននូវសមត្ថភាពអធិបតេយ្យក្នុងការផលិតគ្រាប់បែក និងគ្រាប់រំសេវគ្រប់ប្រភេទ»៕

ដោយ៖ យា ចិន្ដាខន្ដី (ប្រភព៖ ស្ពុតនីក)