AKP បន្ទាយមានជ័យ ថ្ងៃទី០៩ ខែមករា ឆ្នាំ២០២៥--លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានជំរុញដល់នគរបាលក្រោមឱវាទបន្តការរៀនសូត្រពង្រឹងសមត្ថភាព ចំណេះ ជំនាញព័ត៌មានវិទ្យា ដើម្បីងាយស្រួលក្នុងការបំពេញការងារ ស្រាវជ្រាវ ក្នុងការបង្ការ បង្រ្កាបបទល្មើសបច្ចេកវិទ្យា តាមប្រពន្ធ័អនឡាញ កងកម្លាំងត្រូវផ្តល់សេវាសន្តិសុខជូនប្រជាពលរដ្ឋឱ្យទាន់ពេលវេលា ទាំងផ្នែកសេវាសាធារណៈ ធ្វើសៀវភៅគ្រួសារ អត្តសញ្ញាណប័ណ្ណ និងការបង្ការ បង្រ្កាបក្មេងទំនើងផ្សេងៗ ក្នុងភូមិសាស្រ្តខេត្ត។ ការជំរុញបែបនេះរបស់លោកឧត្តមសេនីយ៍ទោ សិទ្ធិ ឡោះ បានធ្វើឡើងក្នុងឱកាសដឹកនាំស្នងការរង កងកម្លាំងនគរបាលការិយាល័យជំនាញប្រជុំលើកិច្ចការជំនាញដល់ផ្នែកនីមួយៗ កាលពីរសៀលថ្ងៃទី០៨ ខែមករា ឆ្នាំ២០២៥។

លោកឧត្តមសេនីយ៍ទោបានដាក់ចេញនូវផែនការដល់កងកម្លាំងនគរបាលគ្រប់អង្គភាពចំណុះទាំងអស់ ត្រូវបន្តពង្រឹងការងារ ការពារសន្តិសុខសណ្តាប់ធ្នាប់សង្គម ពង្រឹងទប់ស្កាត់បទល្មើសគ្រប់ប្រភេទ និងក្មេងទំនើង ពង្រឹងទប់ស្កាត់បទល្មើសជួញដូរគ្រឿងញៀន ទប់ស្កាត់ការជួញដូរមនុស្សគ្រប់ទំរង់ ពង្រឹងគ្រប់គ្រងការស្នាក់នៅជនបរទេស យកចិត្តទុកដាក់ជំរុញការចុះបើកវេទិកាសាធារណផ្សព្វផ្សាយគោលនយោបាយភូមិឃុំសង្កាត់មានសុវត្ថិភាព ពង្រឹងការផ្សព្វផ្សាយច្បាប់ចរាចរណ៍ផ្លូវគោកឱ្យបានទូលំទូលាយនៅតាមមូលដ្ឋានសាលារៀន បន្តពង្រឹងឯកភាព សាមគ្គីភាពផ្ទៃក្នុងឱ្យបានល្អប្រសើរថែមទៀត។

ជាមួយគ្នានោះដែរ លោកឧត្តមសេនីយ៍ទោបានជំរុញដល់កម្លាំងគ្រប់អធិការដ្ឋាននគរបាលក្រុងស្រុក បញ្ជាការវរនគរបាលការពារព្រំដែន ត្រូវពង្រឹងការផ្តល់សេវាសាធារណៈ  ជំរុញដល់នគរបាលក្រោមឱវាទត្រូវបន្តយកចិត្តទុកដាក់ការរៀនសូត្រពង្រឹងសមត្ថភាព ចំណេះ ជំនាញព័ត៌មានវិទ្យា ដើម្បីងាយស្រួលក្នុងការបំពេញការងារឱ្យកាន់តែមានប្រសិទ្ធភាព។ ត្រូវពង្រឹងការកសាងអភិវឌ្ឍជំរំបន្ទាយ និងធ្វើរបងប៉ុស្តិ៍ឱ្យបានគ្រប់ប៉ុស្តិ៍ ដើម្បីលើកកម្ពស់សោភ័ណភាព និងបរិស្ថានល្អ សម្រាប់ផ្តល់សេវាសន្តិសុខជូនប្រជាពលរដ្ឋឱ្យបានប្រសើរថែមទៀតនោះ៕

ដោយ ឈុន សារ៉ាត