AKP កំពង់ធំ ថ្ងៃទី០៩ ខែមករា ឆ្នាំ២០២៥-- លោកឧត្តមសេនីយ៍ត្រី ខេន ឈុនគ័រ ស្នងការរងផែនការងារសេនាធិការ និងលោកឧត្តមសេនីយ៍ត្រី ឯក វរ: ស្នងការរងដឹកនាំការិយាល័យបានដឹកនាំកិច្ចប្រជុំបូកសរុបលទ្ធផលការងាររបស់ផែនការងារសេនាធិការកាលពីថ្ងៃទី០៨ ខែមករា ឆ្នាំ២០២៥ នៅសាលប្រជុំស្នងការដ្ឋាននគរបាលខេត្តកំពង់ធំ។

បន្ទាប់ពីលោកវរសេនីយ៍ឯក ហួត សារ៉ាវុធ នាយការិយាល័យសរុបផែនការ បានអានរបាយការណ៍បូកសរុបលទ្ធផលការងារ និងបទអន្តរាគមន៍រួចមក លោកឧត្តមសេនីយ៍ត្រី ខេន ឈុនគ័រ ស្នងការរងផែនការងារសេនាធិការ បានថ្លែងបញ្ជាក់ថា ដោយអនុវត្តតាមគោលការណ៍ដឹកនាំដោយលោកឧត្តមសេនីយ៍ទោ ហេង សុផល ស្នងការនគរបាលខេត្ត លោកនឹងដឹកនាំកិច្ចប្រជុំ គឺដើម្បីត្រួតពិនិត្យលើភារកិច្ច ដែលបានអនុវត្តនាពេលកន្លងមក ក្នុងការដកបទពិសោធន៍សម្រាប់អនុវត្តបន្ត ឈានទៅសម្រេចបានទទួលជោគជ័យបន្ថែមទៀត។

លោកឧត្តមសេនីយ៍ត្រី ខេន ឈុនគ័រ បានដាក់ទិសដៅការងារដល់ថ្នាក់ដឹកនាំការិយាល័យជំនាញ និងអធិការរងក្រុង-ស្រុកទាំង០៩ឱ្យយកទៅអនុវត្ត ដើម្បីសម្រេចបានផ្លែផ្កា ស្នាដៃបន្ថែមទៀត៖ ១- ត្រូវពង្រឹងបទវិន័យលេខ៨៧៣របស់កងកម្លាំងនគរបាលជាតិអំពីសីលធម៌ សំដីសំដៅទន់ភ្លន់ សុភាពរាបសា និងទំនាក់ទំនងល្អរវាងគ្នា និងគ្នា ក្នុងអង្គភាព និងក្រៅអង្គភាព។ ត្រូវរៀបចំខ្លួន ក្នុងនាមជាកងកម្លាំង មានគ្រងឯកសណ្ឋានត្រឹមត្រូវ ក្នុងម៉ោងធ្វើការ សាកសមជាមន្ត្រីនគរបាលជាតិ។ ត្រូវពិនិត្យមើលវត្តមាន និងម៉ោងធ្វើការរបស់កម្លាំងឱ្យបានត្រឹមត្រូវក្នុងការឈប់សម្រាក និងតាមកាលកំណត់។ ត្រូវចេះថែទាំសុខភាព និងអនាម័យឱ្យបានត្រឹមត្រូវ។ ២- ត្រូវពង្រឹងការងារជំនាញ ដោយរួមគ្នាគិត រួមគ្នាធ្វើ រួមគ្នាដោះស្រាយ ប្រកបដោយស្មារតី ទទួលខុសត្រូវខ្ពស់ និងប្រសិទ្ធភាព។ ៣- យកចិត្តទុកដាក់របៀបរបបការងាររដ្ឋបាល ព្រមទាំពង្រឹងសមត្ថភាពជំនាញតាមរយៈការសិក្សា រយៈវែងនិងខ្លី រួមផ្សំស្រាវជ្រាវតាមបណ្ដាញសង្គមឌីជីថល។ ពង្រឹងការទំនាក់ទំនងកិច្ចសហការល្អ ជាមួយមន្ត្រីរាជការ និងមហាជនជុំវិញខេត្ត។ ៤- ធ្វើការគ្រប់គ្រងឯកសារ និងរូបភាព ជាប្រចាំក្នុងអង្គភាព ពិសេសចងក្រងអំពីសមិទ្ធផលស្នាដៃ ដែលថ្នាក់ដឹកនាំកងកម្លាំង ក្នុងអង្គភាព សម្រេចបាននាពេលកន្លងមក និង៥. ត្រូវចេះសាមគ្គីភាព ឯកភាពផ្ទៃក្នុង ឱ្យបានល្អប្រសើរជួយគ្នា ទៅវិញទៅមកក្នុងគ្រាជួបទុក្ខលំបាក៕

ដោយ ស៊ុម វណ្ណា (ប្រភព៖ ស្នងការនគរបាលខេត្តកំពង់ធំ)