AKP កំពង់ស្ពឺ ថ្ងៃទី០៨ ខែមករា ឆ្នាំ២០២៥-- ឯកឧត្តម សុខ ប៊ន តំណាងរាស្រ្តមណ្ឌលកំពង់ស្ពឺ និងជាប្រធានក្រុមការងារអ្នកតំណាងរាស្រ្តចុះជួយស្រុកថ្ពង ខេត្តកំពង់ស្ពឺ បានលើកឡើងថា ខួបទី៤៦នៃទិវាជ័យជម្នះ ៧មករា គឺជាថ្ងៃដែលប្រជាជាតិរស់រានមានជីវិតឡើងវិញពីជ្រោះមរណៈនៃរបបប្រល័យពូជសាសន៍ ប៉ុល ពត។ ការលើកឡើងដូច្នេះរបស់ឯកឧត្តម សុខ ប៊ន បានធ្វើឡើងក្នុងមីទ្ទិញអបអរសាទរខួបទី៤៦នៃទិវាជ័យជម្នះ៧ មករា ១៩៧៩ - ៧ មករា ២០២៥ នៅបរិវេណសាលាស្រុងថ្ពង ខេត្តកំពង់ស្ពឺ នាថ្ងៃទី០៨ ខែមករា ឆ្នាំ២០២៥ ដែលមានវត្តមាននិមន្តចូលរួម និងចូលរួមពីព្រះសង្ឃ សមាជិករដ្ឋសភា ក្រុមការងាររាជរដ្ឋាភិបាល កងកម្លាំងប្រដាប់អាវុធទាំងបីប្រភេទ មន្ត្រីរាជការ យុវជន  និងប្រជាពលរដ្ឋស្រុកថ្ពង ខេត្តកំពង់ស្ពឺយ៉ាងច្រើនកុះករ។

ឯកឧត្តមតំណាងរាស្ត្រមណ្ឌលកំពង់ស្ពឺបានថ្លែងបន្តថា ស្មារតីជ័យជម្នះ៧មករាស្ថិតស្ថេរ និងរស់រវើកក្នុងបេះដូង និងដួងចិត្តរបស់ប្រជាពលរដ្ឋកម្ពុជាគ្រប់រូប និងគ្រប់ជំនាន់ ហើយជាស្មារតីនៃសន្តិភាព ការបង្រួបបង្រួមជាតិ និងការអភិវឌ្ឍ ដែលប្រជាពលរដ្ឋកម្ពុជាចងចាំមិនអាចបំភ្លេចបានថា មាតុភូមិកម្ពុជាបានឆ្លងកាត់អតីតកាលដ៍ខ្មៅងងឹតបំផុត ដែលបានក្រាលដោយឈាមនិងទឹកភ្នែករបស់ប្រជាជនក្នុងរបបកម្ពុជាប្រជាធិបតេយ្យរបស់បនប្រល័យពូជសាសន៍ប៉ុលពត។ដូច្នេះស្មារតី៧មករា មានគុណតម្លៃធំធេងជាអមតៈ សម្រាប់ប្រជាពលរដ្ឋកម្ពុជា និងជាសច្ចធម៌ប្រវត្តិសាស្ត្រ ដែលមិនអាចបំភ្លៃ ឬបំផ្លាញបាននោះឡើយ។ សំខាន់ជាងនេះ ៧មករាក្រោមស្មារតីបង្រូបបង្រួមជាតិ សាមគ្គីជាតិ និងនាំសន្តិភាពពេញលេញជូនជាតិមាតុភូមិគឺជាអ្វីដែលសម្តេចតេជោ និងថ្នាក់ដឹកនាំគណបក្សប្រជាជនកម្ពុជាខិតខំសម្រេចបាន ប្រកបដោយវីរភាពលះបង់ ដើម្បីបុព្វហេតុជាតិ និងប្រជាជនកម្ពុជាទាំង១៧លាននាក់។

ឯកឧត្តមតំណាងរាស្រ្តបានរំឭកអំពីគុណបំណាច់នៃថ្ងៃ៧មករា ឆ្នាំ១៩៧៩ ខណៈថ្ងៃនេះត្រូវបានប្រជាពលរដ្ឋខ្មែរទូទាំងប្រទេសចងចាំមិនអាចបំភ្លេចបាន ហើយថែមទាំងប្រសិទ្ធនាមថាជាថ្ងៃកំណើតទី២របស់ពួកគាត់ដែលបានរួចផុតពីរបបដ៏ខ្មៅងងឹតរបស់ខ្មែរក្រហម៕

ដោយ លឹម សាន្ត