AKP ភ្នំពេញ ថ្ងៃទី០៨ ខែមករា ឆ្នាំ២០២៥ -- បេសកជននុយក្លេអ៊ែរកូរ៉េខាងត្បូង សហរដ្ឋអាមេរិក និងជប៉ុន បានថ្កោលទោសការបាញ់មីស៊ីលចុងក្រោយរបស់ប្រទេសកូរ៉េខាងជើង នៅក្នុងកិច្ចពិភាក្សាតាមទូរស័ព្ទរបស់ពួកគេ ដោយបានប្តេជ្ញាថានឹងមានការសម្របសម្រួលយ៉ាងជិតស្និទ្ធប្រឆាំងនឹងការបង្កហេតុណាមួយនាពេលអនាគត។

យោងតាមក្រសួងការបរទេសរបស់ទីក្រុងសេអ៊ូល បានឱ្យដឹងថា​ លោក លី ជុនអ៊ីល (Lee Jun-il) អគ្គនាយកនៃគោលនយោបាយឧបទ្វីបកូរ៉េបានពិភាក្សាអំពីការបាញ់មីស៊ីលផ្លោងរយៈចម្ងាយមធ្យមរបស់ប្រទេសកូរ៉េខាងជើង ជាមួយសមភាគីសហរដ្ឋអាមេរិក និងជប៉ុន គឺលោកសេត បៃឡេយ (Seth Bailey) និងលោក អាគីហ៊ីរ៉ូ អូកូជី (Akihiro Okochi) ។

យោធាកូរ៉េខាងត្បូងបាននិយាយថា ប្រទេសកូរ៉េខាងជើងបានបាញ់មីស៊ីលដែលមានល្បឿនលឿនជាងសំឡេងចូលទៅក្នុងសមុទ្រខាងកើតដែលជាការញុះញង់លើកដំបូងរបស់ខ្លួននៅក្នុងឆ្នាំនេះមុនពេលចូលកាន់តំណែងជាប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ត្រាំ (Donald Trump)។

ការ​បាញ់​បង្ហោះ​នេះ​ក៏​ស្រប​ពេល​នឹង​កិច្ច​ពិភាក្សា​ទ្វេភាគី​រវាង​រដ្ឋ​មន្ត្រី​ការ​បរទេសសហរដ្ឋ​អាមេរិក ​លោក អានតូនី ប្លីងខេន (Antony Blinken) និង​រដ្ឋមន្ត្រី​ការ​បរទេសកូរ៉េខាងត្បូង លោក ចូ តេយុល (Cho Tae-yul) ក្នុង​ទីក្រុង​សេអ៊ូល។

ក្រសួងបាននិយាយនៅក្នុងការចេញផ្សាយថា «បេសកជនបានថ្កោលទោសថាប្រទេសកូរ៉េខាងជើងបានបាញ់បង្ហោះមីស៊ីលផ្លោង ខណៈពេលដែលកិច្ចប្រជុំរវាងរដ្ឋមន្ត្រីការបរទេសកូរ៉េខាងត្បូង-សហរដ្ឋអាមេរិកកំពុងប្រព្រឹត្តទៅនៅទីក្រុងសេអ៊ូល»។

ក្រសួងបាននិយាយថា «នេះបានបង្កើតជាការរំលោភយ៉ាងច្បាស់លើដំណោះស្រាយជាច្រើនរបស់ក្រុមប្រឹក្សាសន្តិសុខអង្គការសហប្រជាជាតិនិងបង្កការគំរាមកំហែងយ៉ាងធ្ងន់ធ្ងរដល់សន្តិភាព និងស្ថិរភាពនៅលើឧបទ្វីបកូរ៉េ និងសហគមន៍អន្តរជាតិ»។

ភាគីទាំងបីបានយល់ព្រមបន្តការសម្របសម្រួលដើម្បីឆ្លើយតបយ៉ាងម៉ឺងម៉ាត់ចំពោះការបង្កហេតុរបស់ទីក្រុងព្យុងយ៉ាង ដោយផ្អែកលើសម្ព័ន្ធភាពដ៏រឹងមាំរវាងប្រទេសកូរ៉េខាងត្បូង-សហរដ្ឋអាមេរិក និងកិច្ចសហប្រតិបត្តិការសន្តិសុខត្រីភាគីដែលពាក់ព័ន្ធនឹងប្រទេសជប៉ុន៕

ដោយ៖ មូល មិនា (ប្រភព៖ យ៉ុនហាប់)