AKP ភ្នំពេញ ថ្ងៃទី០៨ ខែមករា ឆ្នាំ២០២៥ -- ប្រទេសកូរ៉េខាងជើងបាននិយាយកាលពីថ្ងៃអង្គារថា ខ្លួនបានបាញ់សាកល្បងដោយជោគជ័យនូវមីស៊ីលផ្លោងរយៈចម្ងាយមធ្យមថ្មី (IRBM) ដែលក្បាលគ្រាប់មានល្បឿនលឿនជាងសំឡេង ដោយប្រទេសនេះបាននិយាយថា ប្រព័ន្ធអាវុធនេះនឹងជួយយ៉ាងជឿជាក់ក្នុងការរារាំងសត្រូវរបស់ខ្លួននៅក្នុងតំបន់ប៉ាស៊ីហ្វិក។

យោងតាមទីភ្នាក់ងារសារព័ត៌មានកណ្តាលកូរ៉េ (KCNA) បានឱ្យដឹងថា ប្រទេសកូរ៉េខាងជើងបាននិយាយថា មីស៊ីលនេះបានហោះបានចម្ងាយប្រហែល ១.៥០០គីឡូម៉ែត្រក្នុងល្បឿន ១២ដងនៃល្បឿនសំឡេងកាលពីថ្ងៃមុន អំឡុងពេលមានការសាកល្បងដឹកនាំដោយ លោក គីម ជុងអ៊ុន (Kim Jong-un)។

ទីភ្នាក់ងារ KCNA បាននិយាយថា «ប្រព័ន្ធមីស៊ីលលឿនជាងសំឡេងនឹងអាចទុកចិត្តបាននូវគូប្រជែងណាមួយនៅក្នុងតំបន់ប៉ាស៊ីហ្វិក ដែលអាចប៉ះពាល់ដល់សន្តិសុខនៃរដ្ឋរបស់យើង»។

យោធាកូរ៉េខាងត្បូងបាននិយាយកាលពីថ្ងៃចន្ទថា ខ្លួនបានរកឃើញការបាញ់បង្ហោះមីស៊ីល IRBM ពីទីក្រុងព្យុងយ៉ាង ហើយមីស៊ីលនេះបានហោះប្រហែល ១.១០០គីឡូម៉ែត្រ មុនពេលធ្លាក់ចូលទៅក្នុងសមុទ្រខាងកើត។

ការបាញ់មីស៊ីលចុងក្រោយបង្អស់របស់ប្រទេសកូរ៉េខាងជើង ដែលជាការបង្កហេតុដំបូងក្នុងរយៈពេលប្រហែល ២ខែបានកើតឡើងប្រហែល២សប្តាហ៍ មុនពេលប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ (Donald Trump) ចូលកាន់តំណែងនៅថ្ងៃទី២០ ខែមករា។

ការបាញ់នេះក៏បានកើតឡើងចំពេលដែលភាពចលាចលនយោបាយនៅក្នុងប្រទេសកូរ៉េខាងត្បូង ដែលបង្កឡើងដោយការដាក់ច្បាប់អាជ្ញាសឹករបស់ប្រធានាធិបតី លោក យូន ស៊ុកយុល (Yoon Suk Yeol) កាលពីខែមុន និងការចោទប្រកាន់លោកជាបន្តបន្ទាប់ដោយរដ្ឋសភា៕

ដោយ៖ មូល មិនា (ប្រភព៖ យ៉ុនហាប់)