AKP ភ្នំពេញ ថ្ងៃទី០៦ ខែមករា ឆ្នាំ២០២៥ -- សមាជិកសភាអាល្លឺម៉ង់មកពីសហភាពប្រជាធិបតេយ្យគ្រីស្ទាន (CDU) លោក រ៉ូដឺរីច គីសឺវេតធ័រ(Roderich Kiesewetter) បាននិយាយកាលពីថ្ងៃសៅរ៍សប្តាហ៍មុនថាអធិការបតីអាល្លឺម៉ង់ លោក អូឡាហ្វ ស្កូលហ្ស៍ (Olaf Scholz) អាចធ្វើទស្សនកិច្ចទៅកាន់ប្រទេសរុស្ស៊ីមុនការបោះឆ្នោតរបស់សភាអាល្លឺម៉ង់ ដែលបានគ្រោងធ្វើនៅថ្ងៃទី២៣ ខែកុម្ភៈ ហើយកិច្ចប្រជុំរបស់ប្រធានាធិបតីជាប់ឆ្នោតអាម៉េរិក លោក ដូណាល់ ត្រាំ (Donald Trump) ជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ត្រូវបានគ្រោងទុកសម្រាប់ខែមីនា។

លោក គីសឺវេតធ័រ បាននិយាយនៅលើបណ្តាញសង្គមអ៊ិច (X) ថា «មាន​ការ​ចង្អុល​បង្ហាញ​កាន់​តែ​ច្រើន​ដែល​លោកអធិការបតី ស្កូលហ្ស៍ នឹង​ធ្វើ​ដំណើរ​ទៅ​ទីក្រុង៉ូមូស្គូ ហើយ​ជួប​ជាមួយ​លោក ពូទីន មុន​ថ្ងៃ​ទី២៣ ខែ​កុម្ភៈ»។

លោកបាននិយាយបន្ថែមថា ហើយជំនួបរបស់លោក ពូទីន និងលោកត្រាំ ត្រូវបានគ្រោងទុកសម្រាប់ខែមីនា ឆ្នាំ២០២៥ ដោយលោកមិនបានផ្តល់ប្រភពនៃព័ត៌មាននេះឡើយ។

លោក គីសឺវេតធ័រ ផ្ទាល់ក៏ប្រឆាំងនឹងកិច្ចព្រមព្រៀងណាមួយដែលទាក់ទងនឹងការបញ្ចប់ជម្លោះនៅអ៊ុយក្រែនផងដែរ។

កាលពីក្នុងខែធ្នូ ប្រព័ន្ធផ្សព្វផ្សាយអាល្លឺម៉ង់បានរាយការណ៍ថា CDU បានផ្សព្វផ្សាយពាក្យចចាមអារ៉ាមថា លោក ស្កូលហ្ស៍ នៅប៉ុន្មានថ្ងៃខាងមុខអាចនឹងទៅជាមួយ «បេសកកម្មសន្តិភាព» ទៅកាន់ទីក្រុងម៉ូស្គូ។ សេវាសារព័ត៌មានរបស់រដ្ឋាភិបាលអាល្លឺម៉ង់បានប្រាប់សារព័ត៌មានស្ពុតនីក(Sputnik) ថា ការរាយការណ៍របស់ប្រព័ន្ធផ្សព្វផ្សាយអំពីដំណើរទស្សនកិច្ចដែលអាចទៅរួចរបស់លោក ស្កូលហ្ស៍ ទៅកាន់ទីក្រុងម៉ូស្គូ គឺជារឿងប្រឌិត៕

ដោយ៖ យា ចិន្ដាខន្ដី (ប្រភព៖ ស្ពុតនីក)