AKP ភ្នំពេញ ថ្ងៃទី០៥ ខែមករា ឆ្នាំ២០២៥ -- អង្គការសន្សំម្លប់ព្រៃ Sansom Mlup Prey (SMP)  និងក្រុមហ៊ុន ណេតសឺរ៉ូ អេជី NetZeroAg (NZA) នៅថ្ងៃទី ១៥ ខែ មករា ឆ្នាំ ២០២៥ ខាងមុខនេះ នឹងរៀបចំសិក្ខាសាលា មួយធ្វើការណែនាំនូវបច្ចេកទេសថ្មី ស្តីការការគ្រប់គ្រងសំណើម និងភាពស្ងួត (Alternative Wetting Drying  (AWD) ) ដល់ក្រុមប្រជាកសិករ ក្នុងខេត្តកំពង់ធំ ដើម្បីកាត់បន្ថយការបំភាយឧស្ម័នផ្ទះ កញ្ចក់ពីវាលស្រែ។

លោក កែវ សុជាតិ នាយកប្រតិបត្ដិនៃអង្គការសន្សំម្លប់ព្រៃ បានឱ្យដឹងនៅថ្ងៃទី០៥ ខែមករា ឆ្នាំ២០២៥នេះថា គោលបំណងរបស់គម្រោងបច្ចេកទេសថ្មី នៃការគ្រប់គ្រងសំណើម និងភាពស្ងួតលើដំណាំស្រូវដល់កសិករក្នុង ខេត្ដកំពង់ធំ នេះ គឺដើម្បីកាត់បន្ថយការបំភាយឧស្ម័នផ្ទះកញ្ចក់ និងឧស្ម័នមេតានដែលចេញពីការអនុវត្តបចេ្ចកទេសតាមទម្លាប់។  លោកលើកឡើងថា ការអនុវត្ដគម្រោងនេះធ្វើឡើងជាមួយនឹងប្រជាកសិករចំនួន ១០០គ្រួសារ លើផ្ទៃដីសាកល្បងជុំវិញ ២០០ ហិកតា ដែលមានសក្តានុពលសម្រាប់ការអភិវឌ្ឍន៍ប្រកបដោយនិរន្តរភាព នៅក្នុង ស្រុកស្ទោង និងស្រុកកំពង់ស្វាយ ខេត្តកំពង់ធំ ក្នុងប្រទេសកម្ពុជា ។

សូមជម្រាបជូនថា សិក្ខាសាលានេះ គ្រោងពិភាក្សា និងការណែរនាំដល់កសិករ នឹងធ្វើឡើងនៅបន្ទប់ប្រជុំ(កាហ្វេពិភាក្សា)ដែលស្ថិតនៅទីរួម ខេត្តកំពង់ធំ នៅថ្ងៃទី ១៥ ខែ មករា ឆ្នាំ ២០២៥ វេលាម៉ោង ១០:០០ព្រឹក។ សម្រាប់ព៍ត៌មានបន្ថែមសូមទាក់ទងមកកាន់ លោក កែវ សុជាតិ លេខទូរស័ព្ទ ០86550027 ឬតាមអ៊ីម៉ែល socheat@smpcambodia.org ៕

ដោយ៖ ណយ នឿន(ប្រភព៖ អង្គការសន្សំម្លប់ព្រៃ)