AKP ភ្នំពេញ ថ្ងៃទី០៣ ខែមករា ឆ្នាំ២០២៥ -- ក្រសួងការពារជាតិទីក្រុងសេអ៊ូលបាននិយាយថា រដ្ឋមន្ត្រីការពារជាតិស្តីទី លោក គីម ស៊ុនហូ (Kim Seon-ho) បានជួបពិភាក្សាជាមួយឯកអគ្គរដ្ឋទូតសហរដ្ឋអាមេរិកប្រចាំប្រទេសកូរ៉េខាងត្បូង លោក ហ្វីលីព ហ្គោលបឺហ្គ (Philip Goldberg) កាលពីថ្ងៃព្រហស្បតិ៍ ហើយបានបញ្ជាក់សារជាថ្មីអំពីសម្ព័ន្ធភាពទ្វេភាគីដ៏រឹងមាំរបស់ពួកគេ។

ក្រសួងបាននិយាយនៅក្នុងការចេញផ្សាយមួយថា នៅក្នុងកិច្ចប្រជុំដែលធ្វើឡើងនៅក្រសួងការពារជាតិក្នុងទីក្រុងសេអ៊ូល ភាគីទាំងពីរបានកត់សម្គាល់ពីសម្ព័ន្ធភាពកូរ៉េខាងត្បូង-សហរដ្ឋអាមេរិក នៅតែរឹងមាំ ទោះបីជាមានការផ្លាស់ប្តូរនៅក្នុងស្ថានភាពសន្តិសុខ និងនយោបាយក៏ដោយ។

លោក គីម បានថ្លែងអំណរគុណចំពោះឯកអគ្គរដ្ឋទូតសម្រាប់ការខិតខំប្រឹងប្រែងរបស់លោកក្នុងការជំរុញសម្ព័ន្ធភាពយ៉ាងសំខាន់ចាប់តាំងពីការចូលកាន់តំណែងក្នុងខែកក្កដា ឆ្នាំ២០២២ ហើយបានស្នើសុំឱ្យមានការបន្តគាំទ្រក្នុងការធ្វើឱ្យប្រសើរឡើងនូវទំនាក់ទំនងទ្វេភាគី។

ក្រសួងបាននិយាយថា ជាការឆ្លើយតប លោក ហ្គោលបឺហ្គ បានសម្តែងការគាំទ្រមិនផ្លាស់ប្តូររបស់ប្រទេសលោកចំពោះសម្ព័ន្ធភាពដ៏រឹងមាំនេះ៕

ដោយ៖ មូល មិនា (ប្រភព៖ យ៉ុនហាប់)