AKP ភ្នំពេញ ថ្ងៃទី០៣ ខែមករា ឆ្នាំ២០២៥ -- ប្រព័ន្ធផ្សព្វផ្សាយក្នុងស្រុកបានរាយការណ៍ ដោយដកស្រង់ស្ថិតិពីការិយាល័យការងារបរទេសស្រីលង្កា (SLBFE) ឆ្នាំ២០២៤ ថា ជាឆ្នាំដែលមានចំនួនប្រជាជនស្រីលង្កាច្រើនជាងគេធ្វើចំណាកស្រុកទៅបរទេសសម្រាប់ការងារក្នុងប្រវត្តិសាស្ត្ររបស់ប្រទេស។

ទិន្នន័យបង្ហាញថា ប្រជាជនស្រីលង្កាសរុបចំនួន ៣១២.៨៣៦នាក់បានចាកចេញទៅធ្វើការងារនៅក្រៅប្រទេសក្នុងឆ្នាំនេះ។ របាយការណ៍​បាន​ឲ្យ​ដឹង​​ថា ក្នុង​ចំណោម​ពួកគេ​មាន       ១៨៥.១៦២នាក់​ជា​កម្មករ​បុរស ខណៈ ១២៧.៦៧៤នាក់​ជា​ស្ត្រី​។ ទិន្នន័យ​បង្ហាញ​ថា ប្រទេសគុយវ៉ែត​បាន​ក្លាយ​ជា​ទិសដៅ​កំពូលដោយ​ទាក់ទាញ​កម្មករ​ស្រីលង្កាចំនួន ៧៧.៥៤៦​នាក់។

ទិន្នន័យរបស់ការិយាល័យ SLBFE បានបង្ហាញថា ប្រទេសអេមីរ៉ាត់អារ៉ាប់រួមមានប្រជាជនស្រីលង្កាចំនួន ៥១.៥៥០នាក់ដែលកំពុងស្វែងរកការងារនៅទីនោះ។ បន្ថែមពីនេះ ប្រជាជនស្រីលង្កាចំនួន ៧.០៩៨នាក់បានធ្វើចំណាកស្រុកទៅកាន់ប្រទេសកូរ៉េខាងត្បូង ហើយ៩.៦៦៥នាក់ទៅកាន់ប្រទេសអ៊ីស្រាអែល និង៨.៦៦៥នាក់ទៅកាន់ប្រទេសជប៉ុន ក្នុងរយៈពេលមួយឆ្នាំកន្លងមកនេះ។

ការកើនឡើងនៃការធ្វើចំណាកស្រុកក៏បាននាំឱ្យមានការកើនឡើងគួរឱ្យកត់សម្គាល់នៃការផ្ទេរប្រាក់។ ទិន្នន័យរបស់ធនាគារកណ្តាលបង្ហាញថា នៅចុងខែវិច្ឆិកា ឆ្នាំ២០២៤ ការផ្ទេរប្រាក់ពីប្រទេសស្រីលង្កាដែលធ្វើការនៅបរទេសបានកើនឡើងដល់ ៦,៤៦ប៊ីលានដុល្លារអាម៉េរិក ដែលឆ្លុះបញ្ចាំងពីការកើនឡើងនៃចំនួនពលរដ្ឋបានធ្វើការនៅក្រៅប្រទេស៕

ដោយ៖ មូល មិនា (ប្រភព៖ ស៊ីនហួ)