AKP ភ្នំពេញ ថ្ងៃទី០៣ ខែមករា ឆ្នាំ២០២៥ -- តួលេខផ្លូវការបានចេញផ្សាយថា ភ្ញៀវទេសចរបរទេសសរុបចំនួន ១ ១៤៧ ៥៦៧នាក់បានមកទស្សនាប្រទេសនេប៉ាល់ក្នុងឆ្នាំ២០២៤ ដែលជាចំនួនខ្ពស់បំផុតទីបីចាប់តាំងពីឆ្នាំ២០១៨។

យោងតាមរបាយការណ៍ពីក្រុមប្រឹក្សាទេសចរណ៍នេប៉ាល់ បានឱ្យដឹងថា តួលេខនេះបានបង្ហាញពីការកើនឡើង ១៣% ក្នុងឆ្នាំ២០២៣។ របាយការណ៍បានកត់សម្គាល់ថា ជនជាតិឥណ្ឌា សហរដ្ឋអាមេរិក និងចិន គឺជាប្រភពសំខាន់នៃការមកទស្សនារបស់ជនបរទេសនៅក្នុងប្រទេសនេប៉ាល់។

លោក ម៉ានី រ៉ាច ឡាមីឆេន (Mani Raj Lamichhane) នាយកក្រុមប្រឹក្សាភិបាលបានប្រាប់សារព័ត៌មានស៊ីនហួថា «ទោះបីជាមានការកើនឡើងពីមួយឆ្នាំទៅមួយឆ្នាំក៏ដោយក៏ចំនួននេះមិនបានឈានដល់តួលេខមុនជំងឺកូវីដនោះទេ»។ ប្រទេសនេប៉ាល់ទទួលបានភ្ញៀវបរទេសចំនួន       ១ ១៧៣ ០៧២ និង ១ ១៩១ ១៩៧នាក់ក្នុងឆ្នាំ២០១៨ និង២០១៩ រៀងគ្នា។

លោក ឡាមីឆេន បានលើកឡើងពីបញ្ហាគ្រោះថ្នាក់ចរាចរណ៍ជាញឹកញាប់ និងការធ្លាក់យន្តហោះសម្រាប់កំណើនយឺតនៃការមកដល់របស់ជនបរទេសនៅក្នុងប្រទេសនេប៉ាល់។ ភ្ញៀវទេសចរ គឺជាប្រាក់ចំណូលបរទេសដ៏សំខាន់ និងជាអ្នកបង្កើតការងារសម្រាប់ប្រជាជននេប៉ាល់៕

ដោយ៖ មូល មិនា (ប្រភព៖ ស៊ីនហួ)