AKP ភ្នំពេញ ថ្ងៃទី០៣ ខែមករា ឆ្នាំ២០២៥ -- កងទ័ពជើងទឹកប្រេស៊ីលបាននិយាយថា ចំនួនអ្នកស្លាប់បានកើនឡើងដល់ ១២នាក់ពីការបាក់ស្ពាននៅភាគខាងជើងប្រទេសប្រេស៊ីល កាលពីថ្ងៃទី២២ ខែធ្នូ បន្ទាប់ពីសាកសព ២នាក់ទៀតត្រូវបានរកឃើញក្នុងទន្លេ Tocantins ។

មនុស្សចំនួន ៥នាក់នៅតែបាត់ខ្លួនចាប់តាំងពីឧបទ្ទវហេតុបានកើតឡើងនៅលើស្ពាន Juscelino Kubitschek de Oliveira តាមបណ្តោយផ្លូវហាយវេដែលតភ្ជាប់រដ្ឋ Tocantins និងរដ្ឋ Maranhao ។

យោង​តាម​សេចក្តី​ថ្លែងការណ៍​ផ្លូវការ​មួយ​ពី​សារព័ត៌មាន​រដ្ឋ Agencia Brasil បាន​ឲ្យ​ដឹង​ថា អ្នក​មុជ​ទឹក​​របស់​កងទ័ព​ជើង​ទឹក​បន្ត​ស្វែង​រក​ជន​រង​គ្រោះ ដោយ​មាន​ជំនួយ​ពី​ប៉ូលិស និង​អ្នក​ពន្លត់​អគ្គិភ័យ។

យ៉ាងហោចណាស់មានយានជំនិះចំនួន ១០គ្រឿង រួមទាំងរថយន្តចំនួន ៣គ្រឿងដែលផ្ទុកថ្នាំសម្លាប់សត្វល្អិត ២៥,០០០លីត្រ និងអាស៊ីតស៊ុលហ្វួរីក ៧៦តោន បានធ្លាក់ចូលទៅក្នុងទន្លេ នៅពេលដែលស្ពានបាក់។

ទីភ្នាក់ងារជាតិទឹកបាននិយាយថា ការធ្វើតេស្តសំណាកទឹករបស់ពួកគេបង្ហាញថា មិនមានសារធាតុគីមីហៀរចូលទៅក្នុងទឹកនោះទេ។ អគ្គនាយកដ្ឋានហេដ្ឋារចនាសម្ព័ន្ធដឹកជញ្ជូនជាតិបានបើកការស៊ើបអង្កេតលើមូលហេតុនៃគ្រោះថ្នាក់នេះ៕

ដោយ៖ មូល មិនា (ប្រភព៖ ភីបផលដេលី)