AKP ភ្នំពេញ ថ្ងៃទី០៣ ខែមករា ឆ្នាំ២០២៥ -- ប្រទេស​ថៃ​កំពុង​ចាប់​ផ្តើម​គម្រោង​ហេដ្ឋា​រចនា​សម្ព័ន្ធ​ដែល​មាន​ការ​ផ្លាស់​ប្តូរ ក្នុង​គោល​បំណង​កែ​ទម្រង់​ផ្លូវ​ពាណិជ្ជកម្ម​ពិភពលោក​ឡើង​វិញ និង​ពង្រឹង​ជំហរ​សេដ្ឋកិច្ច​របស់​ប្រទេស។

កាលពីដើមឆ្នាំ១០១៤ អតីតនាយករដ្ឋមន្ត្រីថៃ លោក ស្រេតថា ថាវីស៊ីន (Srettha Thavisin) បានធ្វើឱ្យគម្រោង «ស្ពានអាកាស» មានភាពរស់រវើកឡើងវិញ ដោយស្រមៃមើលទៅលើការតភ្ជាប់ដោយផ្ទាល់រវាងសមុទ្រអាន់ដាម៉ាន់ និងឈូងសមុទ្រថៃ។ គំនិតផ្តួចផ្តើមនេះបានស្នើឱ្យមានការសាងសង់កំពង់ផែទឹកជ្រៅក្នុងខេត្តរ៉ាណង និងខេត្តជុមផន ដែលតភ្ជាប់ដោយប្រព័ន្ធផ្លូវថ្នល់ និងផ្លូវដែកប្រវែង ១០០គីឡូម៉ែត្រ ជាមួយនឹងថវិកាប៉ាន់ស្មានចំនួន ១ទ្រីលានបាត។

គម្រោង​នេះ​ទទួល​បាន​ការ​ចាប់​អារម្មណ៍​យ៉ាង​ខ្លាំង​ពី​អន្តរជាតិ។ វិនិយោគិនចិនបានបង្ហាញចំណាប់អារម្មណ៍ ដោយមានកិច្ចពិភាក្សាគ្នាមួយចំនួនក្នុងអំឡុងពេលនៃដំណើរទស្សនកិច្ចរបស់អតីតនាយករដ្ឋមន្ត្រីថៃ លោក ស្រេតថា ទៅកាន់ទីក្រុងប៉េកាំងកាលពីក្នុងខែតុលា ឆ្នាំ២០២៣។ លើសពីនេះទៅទៀត ធនាគារវិនិយោគហេដ្ឋារចនាសម្ព័ន្ធអាស៊ី (AIIB) បានបង្ហាញពីកិច្ចសហការដ៏មានសក្តានុពល ដែលបង្ហាញពីការឆ្លើយតបដ៏អំណោយផលចំពោះគំនិតផ្តួចផ្តើមនេះ។

បន្ទាប់ពីការឡើងកាន់តំណែងជានាយករដ្ឋមន្រ្តីថៃកាលពីក្នុងខែសីហា ឆ្នាំ២០២៤ លោកស្រី ផែថុងថាន ស៊ីណាវ៉ាត្រា (Paetongtarn Shinawatra) បានអះអាងសារជាថ្មីនូវការប្តេជ្ញាចិត្តរបស់រដ្ឋាភិបាលថៃចំពោះគម្រោង «ស្ពានអាកាស» នេះ។ នៅក្នុងសេចក្តីថ្លែងការណ៍អំពីគោលនយោបាយរបស់លោកស្រីទៅកាន់សភាកាលពីក្នុងខែកញ្ញា ឆ្នាំ២០២៤ លោកស្រីបានសង្កត់ធ្ងន់ទៅលើសក្តានុពលរបស់គម្រោងនេះក្នុងការជំរុញកំណើនសេដ្ឋកិច្ច និងលើកកម្ពស់គោលជំហរយុទ្ធសាស្ត្ររបស់ប្រទេសថៃនៅក្នុងពាណិជ្ជកម្មពិភពលោក។

គម្រោងស្ពានអាកាស​ជា​សក្ខីភាព​មួយចំពោះ​មហិច្ឆតា​របស់​ប្រទេស​ថៃ​ក្នុង​ការ​កំណត់​តួនាទី​របស់​ខ្លួន​ឡើងវិញ​ក្នុងវិស័យ​ពាណិជ្ជកម្ម​ពិភពលោក៕

ដោយ៖ យា ចិន្ដាខន្ដី (ប្រភព៖ NNT)