សម្តេចតេជោ ហ៊ុន សែន ៖ «កុំរង់ចាំពេលមានសង្គ្រាមកើតឡើងទើបស្វែងរកសន្តិភាព និងកុំចាំដល់សង្គ្រាមកើតឡើងទើបស្រែករកសន្តិភាព»
AKP ព្រះសីហនុ ថ្ងៃទី១៦ ខែមេសា ឆ្នាំ២០២២ —សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានរម្លឹកពីការឈឺចាប់កាលពី ៤៧ឆ្នាំមុន (១៦ មេសា ១៩៧៥) គឺជាថ្ងៃដែលសម្តេចបានបាត់បង់គ្រាប់ភ្នែកម្ខាងដោយសារតែសង្គ្រាម។ ដោយសម្តេចបានសង្កត់ធ្ងន់ថា ៖ «កុំរង់ចាំពេលមានសង្គ្រាមកើតឡើងទើបស្វែងរកសន្តិភាព និងកុំចាំដល់សង្គ្រាមកើតឡើងទើបស្រែករកសន្តិភាព»។
សម្តេចតេជោនាយករដ្ឋមន្ត្រី បានថ្លែងជនរួមជាតិក្នុងពិធីសម្ពោធព្រះបដិមា «ព្រះថោង នាងនាគ» នាព្រឹកថ្ងៃទី១៦ ខែមេសា ឆ្នាំ២០២២ នៅខេត្តព្រះសីហនុថា ៖ «កាលពី៤៧ឆ្នាំមុន នៅថ្ងៃនេះ គឺជាថ្ងៃដែលខ្ញុំព្រះករុណាខ្ញុំ បានក្លាយខ្លួនពីជនដែលមិនពិការ ទៅជាជនពិការភ្នែក ដែលនៅពេលនោះគឺខ្ញុំបានសន្លប់ ដោយមិនដឹងថាមានអ្វីកើតឡើងនោះទេ ហើយពេលដឹងខ្លួនឡើង ខ្ញុំបានបាត់បង់កែវភ្នែកម្ខាងបាត់ទៅហើយ»។
សម្តេចតេជោ បានបន្តថា ពិតណាស់ហើយថានេះជាបញ្ហាសង្រ្គាម ដែលសង្គ្រាមនេះបានឆាបឆេះតាំងពីក្រោយរដ្ឋប្រហារ ថ្ងៃទី១៨ ខែមីនា ឆ្នាំ១៩៧០ ទម្លាក់ព្រះបាទសម្ដេចព្រះនរោត្តមសីហនុ។
សម្តេចបានបន្ថែមថា ៖ «ហេតុដូច្នេះហើយ ទើបនៅថ្ងៃដែលខ្ញុំមានលទ្ធភាពដើម្បីដឹកនាំប្រទេស ខ្ញុំព្រះករុណាខ្ញុំប្ដូរផ្ដាច់ដឹកនាំប្រទេសមួយនេះ តាមផ្លូវសន្តិភាព ដោយស្វែងរកសន្តិភាពឲ្យប្រជាពលរដ្ឋឲ្យខានតែបាន។ ដោយខ្ញុំមិនចង់ឲ្យយុវជន និងកុមារមានភ័ព្ធវាសនាដូចជាខ្ញុំ ដែលបានក្លាយខ្លួនទៅជាជនរងគ្រោះនៃសង្គ្រាមនោះទេ»។
សម្តេចតេជោ បានបន្ថែមថា ដោយសារតែសន្តិភាពនេះហើយ បានជាយើងអាចមានឱកាសអាចធ្វើពិធីចូលឆ្នាំ ឬធ្វើពិធីគ្រប់យ៉ាងដែលជាតម្រូវការនៅគ្រប់ជាតិសាសន៍ដែលរស់នៅក្នុងប្រទេសកម្ពុជា ហើយបន្តអភិវឌ្ឍកម្ពុជាឱ្យកាន់តែខ្លាំងថែមទៀត៕
ដោយ ផែន រតនៈ