AKP ភ្នំពេញ ថ្ងៃទី១៦ ខែមីនា ឆ្នាំ២០២២ -- ក្រសួងពាណិជ្ជកម្ម សម្ពោធដាក់ឱ្យប្រើប្រាស់ “សៀវភៅមគ្គុទេសក៍ ស្តីពីការចរចា ពាណិជ្ជកម្មសម្រាប់កម្ពុជា” ដែលសហការរៀបចំដោយគម្រោង ARISE Plus Cambodia និងក្រសួងពាណិជ្ជកម្ម ដើម្បីជំរុញការធ្វើសមារណកម្មពាណិជ្ជកម្ម និងពិពិធកម្ម ទីផ្សារនាំចេញ តាមរយៈការចូលរួមការចរចាក្នុងក្របខ័ណ្ឌទ្វេភាគី តំបន់ និងពិភពលោក ព្រមទាំងកិច្ចចរចាពាណិជ្ជកម្មសេរីនានា។

កាលពីថ្ងៃទី១៥ ខែមីនា ឆ្នាំ២០២២ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ “សៀវភៅមគ្គុទេសក៍ស្តីពីការចរចា ពាណិជ្ជកម្ម សម្រាប់កម្ពុជា” (Trade Negotiation Practitioner Manual for Cambodia) ក្រោមសមាសធាតុទី២ នៃគម្រោង ARISE+ Cambodia ដែលផ្តោតលើការអភិវឌ្ឍ សមត្ថភាពស្ថាប័ន និងធនធានមនុស្ស សម្រាប់ការរៀបចំ និងអនុវត្តន៍ គោលនយោបាយ នានាពាក់ព័ន្ធនឹងវិស័យពាណិជ្ជកម្ម។

ពិធីសម្ពោធនេះ ក៏មានការអញ្ជើញចូលរួមពី ថ្នាក់ដឹកនាំ និងមន្រ្តីចរចា នៃក្រសួងពាណិជ្ជកម្ម ក្រសួងសេដ្ឋកិច្ចនិងហិរញ្ញវត្ថុ ក្រសួងការងារនិងបណ្តុះបណ្តាលវិជ្ជាជីវៈ ក្រសួងកសិកម្ម រុក្ខាប្រមាញ់និងនេសាទ អគ្គនាយកដ្ឋានគយនិងរដ្ឋាករកម្ពុជា ក្រុមការងារគម្រោង ARISE+ Cambodia តំណាងប្រតិភូសហភាពអឺរ៉ុបប្រចាំកម្ពុជា និងតំណាងស្ថានទូតអាល្លឺម៉ង់ប្រចាំនៅកម្ពុជា ព្រមទាំងដៃគូអភិវឌ្ឍន៍មួយចំនួនទៀតផងដែរ។

ឯកឧត្តមរដ្ឋមន្ត្រី បានថ្លែងអំណរគុណដល់ក្រុមការងារគម្រោង ARISE+ Cambodia ដែលបានរៀបចំសៀវភៅមគ្គុទេសក៍ ស្តីពីការចរចាពាណិជ្ជកម្មសម្រាប់កម្ពុជានេះឡើង ក្នុងគោលបំណងផ្តល់ជាមគ្គុទេសក៍ ណែនាំលើការរៀបចំយុទ្ធសាស្រ្ត និងយុទ្ធវិធី ចរចាពាណិជ្ជកម្មប្រកបដោយប្រសិទ្ធភាព ដោយផ្អែកលើគោលនយោបាយពាណិជ្ជ កម្មអន្តរជាតិរបស់កម្ពុជា ជាពិសេស យុទ្ធសាស្រ្តចតុកោណដំណាក់កាលទី៤ និងយុទ្ធសាស្រ្តសមាហរណកម្មពាណិជ្ជកម្មកម្ពុជា សម្រាប់អ្នកចរចាពាណិជ្ជកម្ម និងមន្រ្តីជំនាញគោលនយោបាយពាណិជ្ជកម្ម។

ឯកឧត្តមបន្តថា កម្ពុជាបានយកចិត្តទុកដាក់យ៉ាងខ្លាំងលើកិច្ចខំប្រឹងប្រែងក្នុងការធ្វើ សមារណកម្មពាណិជ្ជកម្ម និងពិពិធកម្ម ទីផ្សារនាំចេញ តាមរយៈការចូលរួមការចរចា ក្នុងក្របខ័ណ្ឌទ្វេភាគី តំបន់ និងពិភពលោក ព្រមទាំងកិច្ចចរចាពាណិជ្ជកម្មសេរីនានា។ ជាក់ស្តែង ថ្មីៗនេះកម្ពុជាបានបញ្ចប់ និងអនុម័តលើកិច្ចព្រមព្រៀងកិច្ចសហប្រតិបត្តិការ សេដ្ឋកិច្ចគ្រប់ជ្រុងជ្រោយតំបន់ (RCEP) កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន (CCFTA) និងកិច្ចព្រមព្រៀងពាណិជ្ជកម្មសេរីទ្វេភាគីកម្ពុជាកូរ៉េ (CKFTA) ហើយកម្ពុជា ក៏បាន និងកំពុងចូលរួមការចរចាបន្ថែមទៀតក្នុងក្របខ័ណ្ឌអង្គការ WTO ព្រមទាំងកំពុងសិក្សា លទ្ធភាពក្នុងការចរចាពាណិជ្ជកម្មសេរីជាមួយដៃគូពាណិជ្ជកម្មសំខាន់ៗផ្សេងទៀតផងដែរ។

ឯកឧត្តមរដ្ឋមន្រ្តីសង្កត់ធ្ងន់ថា ការពង្រឹងសមត្ថភាពលើជំនាញចរចាពាណិជ្ជកម្ម ពិតជា មានសារៈសំខាន់យ៉ាងខ្លាំងសម្រាប់អ្នកចរចា ហេតុនេះសៀវភៅមគ្គុទេសក៍នេះ គឺជាឯកសារ ដ៏សំខាន់មួយ សម្រាប់ជួយពង្រឹងសមត្ថភាពបន្ថែមដល់អ្នកចរចាកម្ពុជា ក្នុងការត្រៀមខ្លួន ចូលរួមកិច្ចចរចាព្រមព្រៀងពាណិជ្ជកម្មនានា ក្នុងពេលបច្ចុប្បន្ន និងអនាគត។

ជាមួយគ្នានោះ ឯកឧត្តមរដ្ឋមន្រ្តី បានប្រកាសសម្ពោធដាក់ឱ្យប្រើប្រាស់ជាផ្លូវការនូវ “សៀវភៅមគ្គុទេសក៍ ស្តីពីការចរចាពាណិជ្ជកម្មសម្រាប់កម្ពុជា” និងបានចែកសៀវភៅ មគ្គុទេសក៍នេះជូនអ្នកចរចា និងតំណាងអន្តរក្រសួង-ស្ថាប័ន ដែលបានចូលរួមក្នុងកម្មវិធី សម្ពោធនេះផងដែរ។

 ឯកឧត្តមរដ្ឋមន្រ្តីបានបង្ហាញការជឿជាក់ថា សៀវភៅមគ្គុទេសក៍នេះ នឹងរួមចំណែក យ៉ាងសំខាន់ក្នុងការអភិវឌ្ឍធនធានមនុស្ស ជាពិសេសជួយពង្រឹងសមត្ថភាព របស់អ្នកចរចា ពាណិជ្ជកម្មកម្ពុជា ក្នុងការការពារផលប្រយោជន៍កម្ពុជាក្នុងវិស័យពាណិជ្ជកម្ម ហើយសៀវភៅ មគ្គុទេសក៍នេះនឹងក្លាយជាឯកសារយោងសម្រាប់និស្សិត និងអ្នកសិក្សាស្រាវជ្រាវក្នុង ផ្នែកនេះផងដែរ៕

ដោយ ម៉ៅ ចរិយា