AKP ភ្នំពេញ ថ្ងៃទី២០ ខែមករា ឆ្នាំ២០២៦----

ឯកឧត្តម ប៉ាន សូរស័ក្តិ តំណាងរាស្ត្រមណ្ឌលខេត្តកំពង់ចាម និងជាលេខាធិការគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩)នៃរដ្ឋសភា  បានអញ្ជើញជាអធិបតីពិធីសម្ពោធឆ្លងកុដិព្រះចៅអធិការ និងសមិទ្ធផលនានា ព្រមទាំងពុទ្ធាភិសេក នៅក្នុងបរិវេណវត្តសុរភ្យារាម ហៅវត្តសូភី ស្ថិតនៅភូមិសូភី១ សង្កាត់រតនៈ ក្រុងបាត់ដំបង ខេត្តបាត់ដំបង កាលពីថ្ងៃទី១៩ ខែមករា ឆ្នាំ២០២៦។ 

ក្នុងពិធីសម្ពោធកុដិនេះ  ឯកឧត្តម ប៉ាន សូរស័ក្តិ បានមានមតិសំណេះសំណាល ដោយបានពាំនាំនូវប្រសាសន៍ផ្តាំផ្ញើសួរសុខទុក្ខរបស់សម្ដេចមហារដ្ឋសភាធិកាធិបតី ឃួន សុដារី ប្រធានរដ្ឋសភា ប្រគេន ព្រះចៅអធិការ ព្រះថេរានុត្ថេរៈ គ្រប់ព្រះអង្គ ជា‍ទីសក្ការៈ និងលោកតា លោកយាយ មាមីង បងប្អូន ញាតិមិត្ត អ្នកបាត់ដំបងទាំងអស់ ។  បន្ថែមពីនេះ សម្ដេចប្រធានរដ្ឋសភា តែងតែគិតគូរព្រួយបារម្ភពីទុក្ខលំបាករបស់ក្រុមគ្រួសារវីរកងទ័ព គោរពដឹងគុណចំពោះវីរភាពដ៏អង់អាចក្លាហានរបស់វីរកងទ័ព ដែលបានការពារបូរណភាពជាតិ មាតុភូមិ និងប្រជាជន និងសូមថ្លែងអំណរគុណចំពោះវីរកងទ័ពជួរមុខ ដែលបានលះបង់សាច់ស្រស់ ឈាមស្រស់ និងអាយុជីវិត ដើម្បីការពារបូរណភាពទឹកដី និងសេចក្តីសុខសាន្តរបស់ប្រជាជន។ 

ដោយឡែក រដ្ឋសភាកម្ពុជា ជាពិសេសតំណាងរាស្ត្រទាំងអស់ តែងតែគិតគូរអំពីសុខទុក្ខរបស់វីរកងទ័ព ក្នុងកាលៈទេសៈដ៏លំបាកនេះ ហើយស្មារតីរួមសាមគ្គីគ្នា «ខ្មែរតែមួយ» បានធ្វើឱ្យចលនាជាតិនិយម កើតឡើង និងបានរួមគ្នាជាកម្លាំងសាមគ្គីជាតិដ៏រឹងមាំ។ ជាមួយស្មារតីនេះ ប្រជាជនកម្ពុជាទូទាំងប្រទេស គ្រប់មជ្ឈដ្ឋាន ព្រមទាំងសប្បុរសជននានា ចូលរួមបរិច្ចាគថវិកា សម្ភារៈ និងគ្រឿងឧបភោគបរិភោគ តាមលទ្ធភាពដោយស្ម័គ្រចិត្ត សម្រាប់ជូនដល់វីរកងទ័ពកំពុងឈរជើងនៅសមរភូមិមុខ គ្រួសារវីរកងទ័ព និងជនភៀសសឹកដែលកំពុងរងផលប៉ះពាល់ពីការឈ្លានពានដ៏ឃោរឃៅ និងអមនុស្សធម៌របស់យោធាថៃ។

ឯកឧត្តម ប៉ាន សូរស័ក្តិ បានជម្រាបជូនផងដែរថា ទោះបីជាកម្ពុជាកំពុងឆ្លងកាត់កាលៈទេសៈនៃការឈ្លានពានរបស់ចោសៀមអន្យតិរ្ថិយ ប្រទេសកម្ពុជារបស់យើងនៅតែមានវឌ្ឍនភាពពាណិជ្ជកម្មដោយក្នុងឆ្នាំ២០២៥ សម្រេចបានទំហំពាណិជ្ជកម្មសរុបចំនួន ៦៥.២៤ពាន់លានដុល្លារអាម៉េរិក កើនឡើងក្នុងរង្វង់ ១៨% ធៀបនឹងឆ្នាំ២០២៤។ ក្នុងនោះ ការនាំចេញសម្រេចបានទឹកប្រាក់ចំនួន ៣១.២៨ ពាន់លានដុល្លារអាម៉េរិក កើនឡើងប្រមាណ ១៧% ដែលឆ្លុះបញ្ចាំងពីការរក្សាបាននូវទីផ្សារនាំចេញ សំខាន់ៗ របស់ខ្លួន បើទោះបីជាស្ថិតក្នុងបរិបទសេដ្ឋកិច្ចមិនប្រាកដប្រជាក៏ដោយ។ ដូច្នេះ សូមប្រជាជនយើងទាំងអស់ បន្តជឿជាក់លើការដឹកនាំដ៏ត្រឹមត្រូវរបស់ សម្តេចតេជោ ហ៊ុន សែន ប្រធានព្រឹទ្ធសភា និង សម្តេចធិបតី ហ៊ុន ម៉ាណែត នាយករដ្ឋមន្ត្រី៕

ដោយ៖ ប៊ុនរិទ្ធ