AKP កំពង់ធំ ថ្ងៃទី១៨ ខែមករា ឆ្នាំ២០២៦ -- លោក ហាន កុសល អភិបាលរងខេត្តតំណាងឯកឧត្ដម នួន ផារ័ត្ន អភិបាលខេត្តកំពង់ធំ នាព្រឹកថ្ងៃទី១៧ខែមករាឆ្នាំ២០២៦បានអញ្ជេីញជាអធិបតីក្នុងពិធីបេីកវិញ្ញាសាប្រឡងយកវិញ្ញាបនបត្រពុទ្ធិកបឋមសិក្សា (បាលីរង) ឆ្នាំ២០២៦ នៅមណ្ឌលប្រឡងវត្តឥន្ទ្រីយ៍សំវរៈ(វត្តកំពង់ធំ)សង្កាត់ព្រៃតាហ៊ូ​ ក្រុងស្ទឹងសែន​ ខេត្តកំពង់ធំដោយមានការនិមន្តអញ្ជើញចូលរួមពីព្រះទេពសត្ថា សៀង សុខ ព្រះរាជាគណៈថ្នាក់ចត្វា និងជាព្រះសត្ថាបារមី ព្រះមេគណខេត្តកំពង់ធំ ជាព្រះចៅអធិការវត្តឥន្រ្ទីយ៍សំវរៈ(វត្តកំពង់ធំ) ព្រះប្រធានមណ្ឌលប្រឡងខេត្តកំពង់ធំ លោក តាន់ តៃជ្រាន់ ប្រធានមន្ទីរធម្មការ និងសាសនាខេត្ត និងជាប្រធានមណ្ឌលប្រឡងខេត្តកំពង់ធំ  លោកអនុប្រធានមន្ទីរធម្មការ និងសាសនា មន្ត្រីរាជការដែលជាអនុរក្ស និងព្រះសង្ឃ ជាច្រើនអង្គ។ 

កម្មវិធីប្រឡងមានរយៈពេល០២ថ្ងៃនៅថ្ងៃទី១៧និងថ្ងៃទី១៨ខែមករាឆ្នាំ២០២៦។នៅមណ្ឌលកំពង់ធំមានបេក្ខសមណៈសិស្ស-សិស្សបានដាក់ពាក្យប្រឡងទូទាំងខេត្តចំនួន២៥៦អង្គ/នាក់ចែកចេញជា១១បន្ទប់។

លោក ហាន កុសល បានលើកទឹកចិត្តដល់បេក្ខសមណសិស្ស-សិស្សទាំងអស់ត្រូវខិតខំប្រឹងប្រែងឱ្យអស់ពីសមត្ថភាព ធ្វើឱ្យបានរួចរាល់លើគ្រប់វិញ្ញាសាដែលបានដាក់ក្នុងការប្រឡង។គោរពឱ្យបានខ្ជាប់ខ្ជួននូវបទប្បញ្ញត្តិ និងបទបញ្ជាផ្ទៃក្នុងនៃការប្រឡង ដោយមិនត្រូវលួចចម្លងគ្នា មើលគ្នា ពិភាក្សាគ្នា មិនត្រូវគូសសញ្ញាសម្គាល់លើក្រដាស វិញ្ញាសានិងលួចលាក់ប្រើប្រាស់ឧបករណ៍អេឡិចត្រូនិចនោះឡើយ។ ជាក់ស្ដែង បេក្ខសមណសិស្ស-សិស្ស ត្រូវតែតាំងស្មារតីឱ្យរឹងមាំ ហើយព្យាយាមសរសេរឱ្យបានគ្រប់មុខវិជ្ជា ទោះបីជាងាយស្រួលឬលំបាកក៏ដោយ ប្រសិនបើមានបញ្ហាសុខភាពសូមរាយការណ៍មកលោកគ្រូអ្នកគ្រូដែលជាអនុរក្សនៅតាមមណ្ឌលនីមួយៗ ដើម្បីជួយសង្គ្រោះឱ្យបានទាន់ពេលវេលា។ 

ព្រះទេពសត្ថា សៀង សុខ ព្រះរាជាគណៈថ្នាក់ចត្វា មានសង្ឃដីកាថា បេក្ខសមណសិស្ស-សិស្សទាំងអស់ដែលមកប្រឡងក្នុងរយៈពេល២ថ្ងៃនេះ សូមខិតខំបំពេញកិច្ចការងាររបស់ខ្លួនឱបានល្អប្រសើរនៅមុខវិជ្ជាដែលចែកជូនតាមម៉ោងនីមួយៗ។  ត្រូវតែអនុវត្តការប្រឡងនេះប្រកបដោយភាពយុត្តិធម៌ត្រឹមត្រូវ ដើម្បីសម្រេចគោលបំណងដែលបានរៀបចំឱ្យមានលក្ខណៈល្អប្រសើរនិងមានការទទួលខុសត្រូវខ្ពស់៕

ដោយ៖ ស៊ុម វណ្ណា