AKP កំពង់ធំ ថ្ងៃទី០៨ ខែមករា ឆ្នាំ២០២៦-- លោក ឧត្តមសេនីយ៍ត្រី ខេន ឈុនគ័រ ស្នងការរងតំណាងលោកឧត្តមសេនីយ៍ទោ ហេង សុផល ស្នងការនគរបាលខេត្តខេត្តកំពង់ធំ នាព្រឹកថ្ងៃទី០៨ ខែមករា ឆ្នាំ២០២៦ បានដឹកនាំកងកម្លាំងចុះសាកសួរសុខទុក្ខ ព្រមទាំងនាំយកអំណោយឧបត្ថម្ភ ជូនជនចាស់ជរា និងប្រជាពលរដ្ឋ ដែលមានជីវភាពខ្វះខាតចំនួន៥០គ្រួសារស្ថិតនៅវត្តទេពនិម្មិត សង្កាត់កំពង់រទេះ ក្រុងស្ទឹងសែន ខេត្តកំពង់ធំ។

ក្នុងឱកាសនោះ ឧត្តមសេនីយ៍ត្រី ខេន ឈុនគ័រ ស្នងការរង បានពាំនាំនូវប្រសាសន៍ផ្ដាំផ្ញើសាកសួរសុខទុក្ខពីសំណាក់ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ និងលោក ឧត្តមសេនីយ៍ទោ ហេង សុផល ស្នងការនគរបាលខេត្ត ជូនចំពោះបងប្អូនប្រជាពលរដ្ឋ ដែលជាការយកចិត្តទុកដាក់ពីថ្នាក់ដឹកនាំព្រមទាំងគិតគូរអំពីសុខទុក្ខ សុខភាព ការប្រកបមុខរបរចិញ្ចឹមជីវិតជាប្រចាំថ្ងៃរបស់បងប្អូន។

លោក ឧត្តមសេនីយ៍ត្រី ខេន ឈុនគ័រ បានលើកឡើងថាក្រោមការដឹកនាំប្រកបដោយគតិបណ្ឌិត ចក្ខុវិស័យវែងឆ្ងាយពីសំណាក់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ប្រទេសជាតិទទួលបានសន្តិភាពយ៉ាងពេញលេញ ព្រមទាំងមានការរីកចម្រើន មានការអភិវឌ្ឍគ្រប់វិស័យ ទូទាំងប្រទេស។ដោយឡែកខេត្តកំពង់ធំ នាពេលបច្ចុប្បន្ន ដោយមានការយកចិត្តទុកដាក់ពីឯកឧត្តម នួន ផារ័ត្ន អភិបាលខេត្ត បានគិតគូរអំពីសុខសុវត្ថិភាព សុខុមាលភាពជីវភាពរបស់ប្រជាពលរដ្ឋនិងសាងសង់សំណង់ អគារ ហេដ្ឋារចនាសម្ព័ន្ធសម្រេចបាននូវសមិទ្ធផលថ្មីៗជាបន្តបន្ទាប់ គួរជាទីមោទនៈ។

លោក ខេង ឈុនគ័រ បានលើកឡើងអំពីសភាពការណ៍ថ្មីៗ ជម្រាបជូនបងប្អូនប្រជាពលរដ្ឋនាឱកាសនេះលើបញ្ហាជម្លោះព្រំដែន ដែលបង្កដោយកងទ័ពសៀមធ្វើការឈ្លានពានមកលើបូរណភាពទឹកដីរបស់ប្រទេសកម្ពុជាយើង ព្រមទាំងបំផ្លិចបំផ្លាញទ្រព្យសម្បត្តិជាច្រើនឥតគណនា។ ប្រជាពលរដ្ឋភៀសខ្លួន ចាកចេញពីលំនៅឋាន ស្រែចម្ការ ស្វែងរកទីកន្លែងមានសុវត្ថិភាព ស្នាក់នៅបណ្ដោះអាសន្ន តាមបណ្តាខេត្តនានាដើម្បីគេចចេញពីភ្លើងសង្រ្គាម។

លោកស្នងការរងបានអំពាវនាវដល់បងប្អូនប្រជាពលរដ្ឋ ត្រូវជឿជាក់លើរាជរដ្ឋាភិបាលនៃព្រះរាជាណាចក្រកម្ពុជា ក្នុងការដោះស្រាយបញ្ហាជម្លោះព្រំដែន រវាងកម្ពុជា-ថៃ បន្តចូលរួមអនុវត្តគោលនយោបាយនានារបស់រាជរដ្ឋាភិបាល ប្រឆាំងដាច់ខាតរាល់ពត៌មានមិនពិត ដែលបង្កើតដោយក្រុមអគតិប្រឆាំងមួយក្ដាប់តូច ដែលមានចេតនាបង្កចលាចលបំផ្លាញសេចក្តីសុខរបស់ប្រជាពលរដ្ឋនិងសង្គមជាតិ។

សូមបញ្ជាក់ថាអំណោយដែលបានប្រគល់ជូនចាស់ជរា និងប្រជាពលរដ្ឋដែលមានជីវភាពខ្វះខាតចំនួន៥០គ្រួសារ ក្នុង០១គ្រួសារទទួលបាននូវអង្ករចំនួន២៥គីឡូក្រាម មីខ្លាឃ្មុំ០១ កេស ទឹកបរិសុទ្ធ០១កេស ឃីតចំនួន០១កញ្ចប់ និងថវិកា៥ម៉ឺនរៀល ព្រមទាំងប្រគល់ថវិកាចំនួន ៤០ម៉ឺនរៀលជូនលោកចៅសង្កាត់-មេភូមិ-កម្លាំងប្រជាការពារ ដែលជាការឧបត្ថម្ភរបស់លោកឧត្តមសេនីយ៍ទោ ហេង សុផល ស្នងការនគរបាលខេត្ត។

លោក ទេព សោភ័ណ្ឌ អភិបាលរងក្រុងស្ទឹងសែន តំណាងឱ្យប្រជាពលរដ្ឋទាំង៥០គ្រួសារ បានថ្លែងអំណរគុណយ៉ាងជ្រាលជ្រៅបំផុតចំពោះលោក ឧត្តមសេនីយ៍ទោ ហេង សុផល ស្នងការនគរបាលខេត្ត ព្រមទាំងសប្បុរសជនដែលបានឧបត្ថម្ភ សម្ភារ ថវិកាគ្រឿងឧបភោគបរិភោគ នាឱកាសនេះដើម្បីជួយសម្រាលបន្ទុកការចំណាយរបស់បងប្អូនជាប្រចាំថ្ងៃ ជាពិសេសជួយសម្រាលបន្ទុក របស់រាជរដ្ឋាភិបាលមួយមួយកម្រិតផងដែរនិងបានប្រសិទ្ធពរជ័យ ជូនចំពោះថ្នាក់ដឹកនាំ កងកម្លាំងគ្រប់លំដាប់ថ្នាក់សូមសមប្រកបជួបប្រទះ តែពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ និងជោគជ័យគ្រប់ភារកិច្ច ដែលថ្នាក់ដឹកនាំប្រគល់ជូន៕

ដោយ ស៊ុម វណ្ណា