AKP កំពង់ធំ ថ្ងៃទី១៥ ខែធ្នូ ឆ្នាំ២០២៥-- លោក សាយ គឹមឡម អភិបាលស្រុកស្ទោង លើកទឹកចិត្តដល់កុមារភៀសសឹកត្រូវទៅចូលរៀនជាបណ្ដោះអាសន្ននៅសាលារៀនដែលជិតទីតាំងដែលខ្លួនកំពុងស្នាក់នៅ ក្នុងឱកាសដែលលោក និងសហការី អញ្ជើញជួបសំណេះសំណាលសួរសុខទុក្ខជនភៀសសឹកចំនួន៤២គ្រួសារ ដែលកំពុងស្នាក់នៅជាបណ្ដោះអាសន្ននៅវត្តទួលព្រះធាតុ ឃុំទ្រា ស្រុកស្ទោង ខេត្តកំពង់ធំ នាព្រឹកថ្ងៃទី១៥ ខែធ្នូ ឆ្នាំ២០២៥។

លោក សាយ គឹមឡម បានបញ្ជាក់ថា ស្ថានភាពសង្គ្រាមឈ្លានពានរបស់ចោរសៀមនៅតាមបន្ទាត់ព្រំដែនពុំទាន់ថមថយនៅឡើយទេ ហេតុដូច្នេះជនភៀសសឹកគ្រប់រូបត្រូវថែរក្សាសុខភាពឱ្យបានល្អ ជាពិសេសបើមានបញ្ហាសុខភាពត្រូវជូនដំណឹងទៅព្រះគ្រូចៅអធិការវត្ត ឬអាជ្ញាធរពាក់ព័ន្ធ និងឆាប់ទៅមន្ទីរពេទ្យបង្អែកស្ទោងឱ្យអស់ពីលទ្ធភាពតាមដែលអាចធ្វើទៅបាន។

ទន្ទឹមនឹងនេះ លោកអភិបាលស្រុកក៏បានអំពាវនាវដល់គ្រប់មណ្ឌលសុខភាព និងមន្ទីរពេទ្យបង្អែកស្ទោងត្រូវយកចិត្តទុកដាក់ថែមទៀតក្នុងការថែទាំព្យាបាលជំងឺជូនជនភៀសសឹក និងគ្រួសារកងទ័ពឱ្យអស់ពីលទ្ធភាពដោយមិនគិតថ្លៃសេវាឡើយ ព្រមទាំងបានណែនាំដល់អាជ្ញាធរឃុំនិងអាជ្ញាធរពាក់ព័ន្ធត្រូវខិតខំតាមដានយកចិត្តទុកដាក់ខ្ពស់ដល់វត្តមាន និងសុខទុក្ខជនភៀសសឹកដែលបានមកដល់មូលដ្ឋានរបស់ខ្លួន ធ្វើការរាយការណ៍ជាប្រចាំ។

លោកអភិបាលស្រុកបានអំពាវនាវថែមទៀតដល់សប្បុរសជនជិតឆ្ងាយសូមមេត្តាចូលរួមឧបត្ថម្ភគាំទ្រទាំងសម្ភារ ថវិកា ស្មារតី គ្រឿងឧបភោគបរិភោគ ជាមួយរដ្ឋបាលស្រុកស្ទោង ក្នុងការឧបត្ថម្ភគាំទ្របន្តលើកទឹកចិត្តវីរកងទ័ពជួរមុខដ៏អង់អាចក្លាហាន និងធ្វើកិច្ចការមនុស្សធម៌ជាមួយជនភៀសសឹកដែលបានមកដល់មូលដ្ឋានស្រុកស្ទោង។

សូមបញ្ជាក់ថា ជនភៀសសឹកដែលបានមកស្នាក់នៅវត្តទួលប្រធាតុនេះមានចំនួន៤២គ្រួសារ ក្នុងឱកាសនោះលោកអភិបាលស្រុកបានផ្ដល់ជូននូវអង្ករ និងគ្រឿងឧបភោគបរិភោគមួយចំនួន៕

ដោយ ស៊ុម វណ្ណា