AKP កំពង់ចាម ថ្ងៃទី១១ ខែវិច្ឆិកា ឆ្នាំ២០២៥-- រដ្ឋបាលខេត្តកំពង់ចាមបានបើកកិច្ចប្រជុំស្តីពីការរៀបចំឯកសារជាគន្លឹះសម្រាប់ការអភិវឌ្ឍរមណីយដ្ឋានទេសចរណ៍ ប្រាសាទវត្តនគរបាជ័យ និងតំបន់កោះប៉ែន នៅសាលប្រជុំសាលាខេត្តកំពង់ចាម នាព្រឹកថ្ងៃទី១១ ខែវិច្ឆិកា ឆ្នាំ២០២៥ ក្រោមការដឹកនាំរបស់លោក គន់ សុភា អភិបាលរងខេត្តកំពង់ចាម និងលោក ម៉ែន ភារម្យ អគ្គនាយករង នៃអគ្គនាយកដ្ឋានអភិវឌ្ឍទេសចរណ៍ និងសហប្រតិបត្តិការអន្តរជាតិ  ដោយមានការចូលរួមពីស្នងការរងនៃស្នងការនគរបាលខេត្ត មេបញ្ជាការរងកងរាជអាវុធហត្ថខេត្ត ប្រធានមន្ទីរ តំណាងមន្ទីរ-អង្គភាពជុំវិញខេត្តជាច្រើនរូប។

លោក គន់ សុភា អភិបាលរង បានមានប្រសាសន៍ថា ខេត្តកំពង់ចាមក៏ជាខេត្តដែលមានសក្តានុពលលើវិស័យទេសចរណ៍ដែរ។ ក្នុងនៅក្នុងខេត្តកំពង់ចាម មានតំបន់រមណីយដ្ឋានចំនួន១១កន្លែង ក្នុងនោះមានរមណីយដ្ឋានប្រវត្តិសាស្ត្រ៤កន្លែង  រមណីយដ្ឋានធម្មជាតិប្រវត្តិសាស្ត្រមួយកន្លែង រមណីយដ្ឋានធម្មជាតិ៣កន្លែងនិងរមណីយដ្ឋានកែច្នៃ៣កន្លែង។ រមណីយដ្ឋានប្រាសាទអង្គបាជ័យ ជារមណីយដ្ឋានប្រវត្តិសាស្ត្រ និងរមណីយដ្ឋានកោះប៉ែន ជារមណីយដ្ឋានធម្មជាតិដែលជាទីពេញនិយម ទាំងភ្ញៀវជាតិ និងអន្តរជាតិ ទៅទស្សនាកម្សាន្ត។

កិច្ចប្រជុំនេះធ្វើឡើងដើម្បីឱ្យក្រុមការងារទៅសិក្សាបន្ថែម ក្នុងការរៀបចំឯកសារវិធានគន្លឹះ អភិវឌ្ឍន៍ទេសចរណ៍នៅរមណីយដ្ឋានប្រាសាទវត្តនគរបាជ័យ និងតំបន់កោះប៉ែន ដើម្បីបន្តលើកកម្ពស់វិស័យទេសចរណ៍ ជំរុញការអភិវឌ្ឍទេសចរណ៍ វប្បធម៌ និងធម្មជាតិ ជាទេសចរណ៍ចបៃតង ស្រស់ស្អាត និងវៃឆ្លាត និងជួយជំរុញការបង្កើតប្រភេទផលិតផលទេសចរណ៍ថ្មីៗ ឱ្យបានច្រើនតាមរយៈការលើកកម្ពស់ការអនុវត្តការរៀបចំ និងការដាក់ចេញគោលនយោបាយ និងផែនការមេអភិវឌ្ឍន៍ វិស័យទេសចរណ៍។

លោក ម៉ែន ភារម្យ អគ្គនាយករងនៃអគ្គនាយកដ្ឋានអភិវឌ្ឍទេសចរណ៍ និងសហប្រតិបត្តិការអន្តរជាតិ បានបញ្ជាក់ថា ការអភិវឌ្ឍន៍ទេសចរណ៍នៅរមណីយដ្ឋានប្រាសាទវត្តនគរបាជ័យ និងតំបន់កោះប៉ែន មានគោលបំណងធានាដល់ការអភិវឌ្ឍគោលដៅទេសចរណ៍ដែលមានសក្តានុពលខ្ពស់ប្រកបដោយចីរភាព ក្នុងការបង្កើនសេដ្ឋកិច្ចគ្រួសារ សេដ្ឋកិច្ចសហគមន៍ និងសេដ្ឋកិច្ចជាតិ តាមរយៈការបង្កើនភាពទាក់ទាញ់គោលដៅ ទេសចរណ៍ដោយភាពច្នៃប្រឌិតតាមតម្រូវការទីផ្សារ៍ និងចូលរួមគ្រប់គ្រងធនធានប្រកបដោយនិរន្តរភាព៕

ដោយ ឆាយ ម៉ុត