AKP សៀមរាប ថ្ងៃទី២៧ ខែតុលា ឆ្នាំ២០២៥-- បុណ្យកឋិនគឺជាបុណ្យមួយរបស់ព្រះពុទ្ធសាសនា ដែលមានរយៈពេល២៩ថ្ងៃ គឺចាប់ពីថ្ងៃ១រោច ខែអស្សុជ ដល់ថ្ងៃ១៥កើត ខែកត្តិក។ អាចនិយាយបានថា ពុទ្ធបរិស័ទចាប់ផ្តើមធ្វើបុណ្យកឋិន នៅក្រោយថ្ងៃចេញព្រះវស្សា។ ជាក់ស្តែង អង្គកឋិនសាមគ្គី ដែលផ្ដួចផ្ដើម ដោយអាចារ្យ គណៈកម្មការវត្តព្រមទាំងពុទ្ធបរិស័ទចំណុះ ជើងវត្តពោធិលង្កា ព្រមទាំងពុទ្ធបរិស័ទមកពីក្នុង និងក្រៅខេត្ត ដើម្បីដង្ហែ និងវេរត្រ័យចីវរប្រគេនព្រះភិក្ខុសង្ឃ ដែលគង់ចាំវស្សាអស់ត្រីមាស ៣ខែ ក្នុងពុទ្ធសីមាក្នុងពោធិលង្កា ស្ថិតនៅសង្កាត់ស្លក្រាម ក្រុងសៀមរាប ខេត្តសៀមរាប នារសៀលថ្ងៃទី២៦ ខែតុលា ឆ្នាំ២០២៥នេះ ដោយទទួបានអាសង្សលាភ ចំនួន១៥៦ ត្រៃ និងមានការចូលរួមពីម្ចាស់ត្រៃដូនជី តាជី និងពុទ្ធបរិស័ទមកពីគ្រប់ទិសទីយ៉ាងច្រើនកុះករបានចូលរួមដង្ហែអង្គកឋិន តាមដងផ្លូវក្រុងសៀមរាប និងព័ត្រជុំវិញព្រះវិហារ។

ព្រះគ្រូវិចិត្រការានុរ័ក្ខបាល ពិន ចន្រ្ទា ចៅអធិការវត្តពោធិលង្កា  មានថេរដីកាបញ្ជាក់ថា បច្ច័យដែលប្រមូលបានពីអង្គកឋិនទាននាពេលនេះ គឺសម្រាប់ទ្រទ្រង់ចតុបច្ច័យដល់ភិក្ខុ សាមណេរក្នុងវត្ត ក្រោយចាំព្រះវស្សាអស់ពេលបីខែ សម្រាប់ផ្គត់ផ្គង់ដល់សមណសិស្ស ដែលនឹងមន្តសិក្សារៀនសូត្រ និងស្នាក់នៅទីនេះ និងមួយចំនួនទៀតយកទៅសាងសង់សមិទ្ធផលនានាក្នុងទីអារាម និងជាទីសេនាសេនៈព្រះសង្ឃគង់នៅ។

ព្រះគ្រូចៅអធិការក៏បានសម្តែងនូវព្រះទ័យសោមនស្សសាទរ ចំពោះសទ្ធាជ្រះថ្លារបស់ប្រជាពុទ្ធបរិស័ទជិតឆ្ងាយ ដែលបានស្រុះស្រួលគ្នាដង្ហែអង្គកឋិននេះឡើង ដែលនេះជាសទ្ធាបញ្ជាក់ឱ្យឃើញពីការជឿ គោរពព្រះពុទ្ធសាសនា និងស្មារតីសាមគ្គីជួយគ្នារបស់ប្រជាពុទ្ធបរិស័ទ ដើម្បីទ្រទ្រង់ព្រះពុទ្ធសាសនាឱ្យបានចម្រើន រុងរឿងនៅយូរអង្វែង និងជាការជួយទំនុកបម្រុងដល់ព្រះភិក្ខុសង្ឃ ក្រោយពីគង់ចាំព្រះវស្សាអស់កាលត្រីមាសកន្លងមក។

ព្រះអង្គមានថេរដីកាបន្តថា បុណ្យកឋិនទាននាពេលនេះដែរ ប្រារព្ធឡើងក្នុងគោលបំណងបង្កើនសាមគ្គីភាពរវាងបុគ្គល គ្រួសារ និងសង្គមជាតិ ទ្រទ្រង់ព្រះពុទ្ធសាសនា ឱ្យបានចម្រើនរុងរឿង និងគង់វង្សយូរអង្វែង ផ្ដល់កម្លាំងកាយ ចិត្ត ដល់ព្រះភិក្ខុសង្ឃ ដែលជាសាសនទាយាទបន្តអាយុព្រះពុទ្ធសាសនា និងដើម្បីបានថ្វាយឧបការៈទំនុកបម្រុងឧបត្ថម្ភព្រះភិក្ខុសាមណេរ ដែលជាមហាកុសលដ៏ប្រសើរ៕

ដោយ ឃុត សៅ