AKP កំពង់ធំ ថ្ងៃទី៣១ ខែមីនា ឆ្នាំ២០២៥--ព្រះគ្រូធម្មកវីវង្សាចារ្យ ឡាន់ សុមនោ ព្រះចៅអធិការវត្តពាមមេត្រី បានដឹកនាំគណកម្មការនិងពុទ្ធបរិស័ទចំណុះជើងវត្តពាមមេត្រីព្រមទាំងញាតិមិត្តជិតឆ្ងាយដែលជាសីលវន្ត សីលវត្តី ឧបាសកឧបាសិកាឧបត្ថម្ភក្នុងការកសាងព្រះវិហារថ្មីបានមូលមតិគ្នាជាឯកច្ឆន្ទប្រារព្ធធ្វើពិធីបុណ្យផ្កាប្រាក់មហាសាមគ្គី ឆ្លងឃឿនមហាពោធិ៍ពុទ្ធាភិសេក និងអភិសេកធាតុនិងលើកកំពូលត្រៃសូរ ដើម្បីប្រមូលបច្ច័យកសាងព្រះវិហារដែលកំពង់សាងសង់ស្ថិតនៅបរិវេណវត្តពាមមេត្រី ឃុំត្បែង ស្រុកកំពង់ស្វាយ ខេត្តកំពង់ធំ កាលពីថ្ងទី៣០ ខែមីនា ឆ្នាំ២០២៥។

ព្រះគ្រូធម្មកវីវង្សាចារ្យ បានមានសង្ឃដីកាថា ពិធីបុណ្យនេះមានរយៈពេល២ថ្ងៃគឺចាប់ពីថ្ងៃទី២៩ និងថ្ងៃទី៣០ ខែមីនា ឆ្នាំ២០២៥ ដើម្បីរំលឹកដល់ព្រះពុទ្ធសាសនាដែលជាសាសនារបស់រដ្ឋ។ វិស័យព្រះពុទ្ធសាសនាដើរតួយ៉ាងសំខាន់ ពិសេសការអភិសេកព្រះពុទ្ធរូបនៅក្រោមដើមពោធិ៍ព្រឹក គឺរំលឹកដល់ពុទ្ធបរិស័ទទាំងអស់ត្រូវតែគោរពព្រះពុទ្ធសាសនាឱ្យបានត្រឹមត្រូវ។ បច្ចុប្បន្នគ្រប់វត្តអារាមទាំងអស់គឺជាកន្លែងសក្ការៈបូជារបស់លោកយាយលោកតា និងពុទ្ធបរិស័ទមកថ្វាយបង្គំ និងជាកន្លែងអប់រំមនុស្សឱ្យសាងអំពើល្អ ស្គាល់ខុសស្គាល់ត្រូវ មានភាពស្មោះត្រង់ពីគ្នាទៅវិញទៅមកក្នុងការលើកស្ទួយវិស័យព្រះពុទ្ធសាសនាឱ្យមានការរីកចម្រើន។

ព្រះគ្រូធម្មកវីវង្សាចារ្យបានមានសង្ឃដីកាបន្តថា ក្រោមការដឹកនាំរបស់សម្ដេចធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជា ពុទ្ធចក្រ និងអាណាចក្រកំពុងតែដើរទន្ទឹមគ្នា។ វត្តអារាមគឺជាកន្លែងដែលបណ្ដុះបណ្ដាលធនធានមនុស្ស ជាបណ្ណាល័យសម្រាប់ឱ្យព្រះសង្ឃសិក្សារៀនសូត្រគ្រប់អក្សរសាស្ត្រ។ ការរៀបចំពិធីបុណ្យផ្កាប្រាក់មហាសាមគ្គីឆ្លងឃឿនមហាពោធិ៍ ពុទ្ធាភិសេកនិងអភិសេកធាតុ និងលើកកំពូលត្រៃសូរ ប្រារព្ធឡើងដើម្បីប្រមូលបច្ច័យយកមកកសាងព្រះវិហារដែលកំពុងតែកសាងជាបណ្តើរដោយសារមានការចំណាយទៅលើការទិញសម្ភារគ្រឿងសំណង់និងថ្លៃជាងវត្តតម្រូវការបច្ច័យមួយចំនួនទៀតដើម្បីកសាងឱ្យរួចជាស្ថាពរនាពេលខាងមុខនេះ។

សូមបញ្ជាក់ថា ព្រះវិហារដែលកំពុងសាងសង់សម្រេចបាន៥០ភាគរយហើយ មានទទឹង១២ម៉ែត្របណ្ដោយ២១ម៉ែត្រ និងកម្ពស់៣៦ម៉ែត្រ៕

ដោយ ស៊ុម វណ្ណា