AKP ភ្នំពេញ ថ្ងៃទី២៩ ខែវិច្ឆិកា ឆ្នាំ២០១៨ -- ក្រសួងរបស់លោក ​Kang បាននិយាយនៅថ្ងៃព្រហស្បតិ៍នេះថា ប្រមុខ អ.ស.ប ​បានប្រាប់​រដ្ឋមន្រ្តីការបរទេសកូរ៉េខាងត្បូង​លោក Kang Kyung-wha ថា អង្គការរបស់លោក​នឹងបន្តគាំទ្រ​ការធ្វើមិនឱ្យមាននុយក្លេអ៊ែរ​នៅលើឧបទ្វីបកូរ៉េ និងការស្ថាបនានូវរបបសន្តិភាពមួយ។

អគ្គលេខាធិការ អ.ស.ប លោក អង់តូនីញ៉ូ ហ្គោទ័ររ៉េស បានជួបប្រជុំជាមួយលោក Kang  នៅទីក្រុងញ៉ូវយ៉ក កាលពីថ្ងៃពុធ​(ម៉ោងក្នុងស្រុក) ខណៈដែលលោករដ្ឋមន្រី្តបានឈប់សម្រាក​នៅទីនោះ  ក្នុងដំណើររបស់លោកទៅកាន់ប្រទេសប៉ាណាម៉ា។

លោក Kang បានបរិយាយដោយសង្ខេបជូនលោក ស្តីអំពីស្ថានការសន្តិសុខ​នៅក្នុង​ប្រទេសកូរ៉េ ហើយបានស្នើឱ្យមានកិច្ចសហប្រតិបត្តិការឱ្យបានស្ថិតថេររបស់ អ.ស.ប នៅក្នុង​កិច្ច​​ខិតខំប្រឹងប្រែង​ដើម្បីធ្វើឱ្យប្រសើរឡើង​នូវការបញ្ចប់ការធ្វើមិនឱ្យមាននុយក្លេអ៊ែររបស់​ប្រទេស​កូរ៉េខាងជើង ព្រមទាំងសន្តិភាពនាពេលបច្ចុប្បន្ននេះ។​

ក្រសួងបាននិយាយថា ប្រមុខ អ.ស.ប បានអះអាងគាំទ្រសម្រាប់ការផ្តួចផ្តើមគំនិត​ដែលជាប់ទាក់ទងរបស់ទីក្រុងសេអ៊ូល និងបានស្នើឱ្យខ្លួនដើម្បីរក្សាឱ្យបានការដើរតួនាទីមួយ ក្នុងការដោះស្រាយ​បញ្ហានានាលើពិភពលោក​ដែលនៅសេសសល់ផ្សេងទៀតនោះ មានដូច​ជា៖ ការបម្រែបម្រួលអាកាសធាតុ​ ភេរវកម្ម និងជនភៀសខ្លួនជាដើម។

លោក Kang បានធ្វើកិច្ចចរចាដាច់ដោយឡែកពីគ្នាផងដែរ ជាមួយអគ្គលេខាធិការរង​ អ.ស.ប លោក Amina Mohamed សម្រាប់កិច្ចពិភាក្សាគ្នាពីវិធានការកែទម្រង់ អ.ស.ប​ ពីទិសដៅ​អភិវឌ្ឍន៍ប្រកបដោយនិរន្តរភាព ព្រមទាំងបញ្ហាផ្សេងៗទៀត។

បន្ទាប់ពីដំណើរទស្សនកិច្ចទៅកាន់ប្រទេសប៉ាណាម៉ា​ លោក​​Kang នឹងចេញដំណើរទៅ​កាន់​ប្រទេសម៉ិកស៊ិក ដើម្បីចូលរួមក្នុងពិធីឡើងកាន់តំណែងប្រធានាធិបតីរបស់លោក Andres Manuel Lopez Obrador នាថ្ងៃសៅរ៍ខាងមុខនេះ៕

( ប្រភព យន់ហាប់: បកប្រែដោយលោក មាស សំអុល )