AKP ភ្នំពេញ ថ្ងៃទី០២ ខែកក្កដា ឆ្នាំ២០២៦–ឯកឧត្តម ហ្សង់ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការបរទេស និងសហប្រតិបត្តិការអន្តរជាតិថ្លែងថា រាល់សកម្មភាពការទូត និងកិច្ចការបរទេសរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងរយៈពេល ៦ខែកន្លងមកនេះមានគោលដៅតែមួយគត់ គឺបម្រើឧត្តមប្រយោជន៍ជាតិ ការការពារអធិបតេយ្យ និងបូរណភាពទឹកដី គឺជារឿងមួយចាំបាច់ និងសកម្មបំផុត។

ក្នុងវេទិកាសារព័ត៌មានលើកទី៨ របស់អង្គភាពអ្នកនាំពាក្យរាជរដ្ឋាភិបាល កាលពីរសៀលថ្ងៃទី០១ ខែកក្កដា ឆ្នាំ២០២៦ នៅទីស្តីការគណៈរដ្ឋមន្ត្រី  ឯកឧត្តម ហ្សង់ហ្វ្រង់ស័រ តាន់ បានគូសបញ្ជាក់ថា បរិបទសាកល និងតំបន់ដ៏ស្មុគស្មាញ រាជរដ្ឋាភិបាលកម្ពុជាដឹកនាំដោយសម្តេចធិបតីយល់កាន់តែច្បាស់ថា នយោបាយការបរទេសរបស់កម្ពុជាចាំបាច់ត្រូវតែបន្តមានឯករាជ្យ អធិបតេយ្យ មានតុល្យភាពគ្រប់គ្រាន់ បើកចំហ និងត្រូវតែផ្ដោតទៅរកការរក្សាសន្តិភាព និងការបន្តអភិវឌ្ឍប្រទេស។ និយាយបែបផ្សេង កម្ពុជាត្រូវតែបន្តពង្រឹងមិត្តភាពចាស់ ពង្រីកមិត្តភាពថ្មី បង្កើនកិច្ចសហប្រតិបត្តិការ ពិសេសសេដ្ឋកិច្ចជាមួយបណ្តាប្រទេសមិត្ត និងដៃគូនៅក្នុងតំបន់ និងនៅក្នុងពិភពលោក។ កម្ពុជាត្រូវតែបន្តជ្រើសរើសកិច្ចសន្ទនាជាជាងការប្រឈមមុខដាក់គ្នា ច្បាប់អន្តរជាតិ និងដំណោះស្រាយដោយសន្តិវិធីជាជាងជម្លោះ និងការប្រើកម្លាំងបាយ កម្លាំងអាវុធ ដែលគ្មាននាំមកនូវអ្វីក្រៅពីមហន្តរាយនោះឡើយ។

ឯកឧត្តមបានបន្តថា គោលការណ៍ នៃគោលនយោបាយការបរទេសរបស់កម្ពុជា សម្តេចធិបតី ហ៊ុន ម៉ាណែត បានអនុវត្តយ៉ាងសកម្ម ពិសេសនៅចំពោះមុខបណ្តាប្រមុខរដ្ឋ និងប្រមុខរដ្ឋាភិបាល ព្រមទាំងឥស្សរជនជាន់ខ្ពស់បរទេសនានា ដែលសម្តេចបានជួបក្នុងឱកាសទស្សនកិច្ចនៅក្រៅប្រទេស។ សម្តេចធិបតី ហ៊ុន ម៉ាណែត បានជួបសន្ទនា ឬបានជួបធ្វើកិច្ចការងារជាមួយមេដឹកនាំកំពូលៗជាច្រើន ដែលជំនួបជាមួយនឹងមេដឹកនាំកំពូលៗទាំងអស់ និងឥស្សរជនបរទេសដទៃផ្សេងទៀតក្នុងរយៈពេល ៦ខែកន្លងទៅនេះ សម្តេចធិបតីធ្វើសុទ្ធតែតែកិច្ចការដែលតម្រង់ទៅរកអាទិភាពធំៗចំនួន៣៖ ទី១.ការពារអធិបតេយ្យ បូរណភាពទឹកដី និងឧត្តមប្រយោជន៍របស់ជាតិ។ ទី២.គឺពង្រឹង និងធ្វើពិពិធកម្មភាពជាដៃគូរបស់កម្ពុជាជាមួយបណ្តាប្រទេសផ្សេងៗ និងអង្គការអន្តរជាតិនានា។ ទី៣.គឺប្រើប្រាស់ការទូត ដើម្បីបន្តអភិវឌ្ឍសង្គមសេដ្ឋកិច្ចកម្ពុជា ការវិនិយោគ និងការបង្កើតការងារនៅកម្ពុជា លើកកម្ពស់សុខុមាលភាពរបស់ប្រជាពលរដ្ឋកម្ពុជា។

ឯកឧត្តមបានលម្អិតជុំវិញចំណុចទី១ នៃវិធានការការពារអធិបតេយ្យភាព បូរណភាពទឹកដី និងប្រយោជន៍ដ៏ឧត្តុង្គឧត្តមរបស់កម្ពុជាដោយបានគូសបញ្ជាក់ថា ជាទូទៅពេលជួបសន្ទនាជាមួយប្រមុខរដ្ឋ ឬប្រមុខរដ្ឋាភិបាល ឬក៏ឥស្សរជនជាន់ខ្ពស់បរទេសនានា សម្តេចធិបតីតែងតែលើកឡើងពីបញ្ហាកម្ពុជា-ថៃ ដោយលើកឡើងឥតល្ហែពីការពិតជាក់ស្តែងនៅតាមបណ្តោយព្រំដែនជាមួយថៃ ហើយការពិតនោះគឺអ្វី? គឺកងទ័ពថៃបានចូលជ្រៅក្នុងព្រំដែនស្របច្បាប់មកក្នុងទឹកដីកម្ពុជា កំពុងកាន់កាប់ទឹកដីខ្មែរត្រង់ចំណុចមួយចំនួនដោយខុសច្បាប់អន្តរជាតិ កំទេចផ្ទះសម្បែងរបស់ប្រជាជនខ្មែរ និងរារាំងប្រជាជនខ្មែររាប់ម៉ឺននាក់មិនឱ្យមានលទ្ធភាពត្រឡប់ទៅកាន់ផ្ទះសម្បែងរបស់ពួកគេវិញ ព្រមទាំងសាងសង់ផ្លូវថ្នល់ និងហេដ្ឋារចនាសម្ព័ន្ធផ្សេងៗនៅទីនោះទៀតផង។

ឯកឧត្តម ហ្សង់ហ្វ្រង់ស័រ តាន់ បន្ថែមថា សារដែលសម្តេចធិបតីតែងតែបញ្ជូនទៅកាន់មេដឹកនាំបរទេសកំពូលៗដែលសម្តេចបានជួបនោះ គឺកម្ពុជាមិនទទួលយកជាដាច់ខាតនូវការកែប្រែខ្សែបន្ទាត់ព្រំដែនដែលខុសច្បាប់អន្តរជាតិ។ ជាមួយគ្នានេះ សម្តេចធិបតីតែងតែលើកឡើងថា កម្ពុជានៅតែប្រកាន់ខ្ជាប់ជំហរដោះស្រាយជម្លោះព្រំដែនកម្ពុជា-ថៃដោយសន្តិវិធី និងដោយផ្អែកលើច្បាប់អន្តរជាតិ សន្ធិសញ្ញាដែលមានស្រាប់ និងកិច្ចព្រមព្រៀងទាំងឡាយដែលកម្ពុជា និងថៃបានចុះហត្ថលេខារួចហើយ។

ស្តីពីបញ្ហាលើដែនសមុទ្រវិញ ឯកឧត្តម ហ្សង់ហ្វ្រង់ស័រ តាន់ ថាកម្ពុជាសម្រេចប្រើប្រាស់យន្តការនៃការផ្សះផ្សាដោយចាប់បង្ខំក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ។ ក្នុងន័យនេះ នៅចំពោះមុខមេដឹកនាំបរទេសកំពូលៗ សម្តេចធិបតីតែងតែពន្យល់ពីមូលហេតុនៃសេចក្តីសម្រេចចិត្តបែបនេះរបស់កម្ពុជា។ មូលហេតុគឺមកពីថៃបានដកខ្លួនជាឯកតោភាគីចេញពី MOU 2001៕

ដោយ៖ ចាន់ សុភឿន