AKP សៀមរាប ថ្ងៃទី០៩ ខែមករា ឆ្នាំ២០១៩ -- អាជ្ញាធរខេត្តសៀមរាប​បានចាប់ផ្តើម​ធ្វើ​ការ​ជួស​ជុល​ និង​ពង្រីកផ្លូវ​៣០​ម៉ែត្រឱ្យមា​នភាពទូលំលាយជាងមុន ដើម្បី​ធ្វើ​ប្រជាពលរដ្ឋងាយស្រួល​ក្នុង​ការ​ធ្វើដំណើរ​ បន្ទាប់ពីផ្លូវ​នេះ​កន្លងមកមាន​ការ​រងការខូចខាត ហើយការជួសជុល និងពង្រីកផ្លូវ៣០ម៉ែត្របាន​ធ្វើ​ឱ្យប្រជាពលរដ្ឋដែល​រស់នៅតាម​បណ្តោយផ្លូវនេះមាន​ការ​សប្បាយ​ចិត្តយ៉ាងខ្លាំង។

ផ្លូវ​៣០ម៉ែត្រ គឺជាផ្លូវមួយដ៏សំខាន់សម្រាប់ការធ្វើចរាចរណ៍របស់​ប្រជាពលរដ្ឋ និងភ្ញៀវទេសចរ ប៉ុន្តែកន្លងមកនេះ ផ្លូវមួយនេះ​បាន​រង​ការ​ខូច​ខាត​ និងតូចចង្អៀត ពិបាកដល់ការធ្វើ​ដំណើររបស់ប្រជាពលរដ្ឋ។ បច្ចុប្បន្ននេះ​អាជ្ញាធរខេត្តសៀមរាប​បាន​ចាប់​ផ្តើម​ធ្វើ​ការ​ជួស​ជុល​ និង​ពង្រីកផ្លូវ​៣០​ម៉ែត្រឱ្យមា​នភាពទូលំលាយជាងមុន។

លោកស្រី សុវណ្ណារី ជាប្រជាពលរដ្ឋម្នាក់​រស់នៅតាមបណ្តោយផ្លូវ​៣០ម៉ែត្រស្ថិត នៅភូមិត្រពាំងសេះ សង្កាត់ គោចក ក្រុងសៀមរាប​ បានថ្លែងឱ្យដឹងនៅព្រឹកថ្ងៃទី ០៩ខែមករា ឆ្នាំ២០១៩នេះ​ថា លោកស្រី​មាន​ការ​សប្បាយចិត្ត​យ៉ាង​ខ្លាំង​នៅពេល​ដែល​ឃើ​ញ​អាជ្ញាធរ​ជួសជុល​ និងពង្រីក​ផ្លូវ​៣០​ម៉ែត្រនេះ​ឱ្យ​ធំទូលាយ​ជាង​មុន​ព្រោះថា កន្លង​មកប្រជាពលរដ្ឋដែល​ធ្វើ​ដំណើរ​ឆ្លង​កាត់​ផ្លូវ​នេះ គឺមាន​ការ​លំបាក​ខ្លាំងណាស់ទី១ផ្លូវខូច ទី២ទ្រូងផ្លូវធំពេកធ្វើឱ្យផ្លូវ សងខាងតូចចង្អៀតពិបាកក្នុងការធ្វើដំណើរ។

លោក សោម​ សមស័ក្ក នាយកទីចាត់ការហិរញ្ញវត្ថុសាលាខេត្តសៀមរាប បាន​ឱ្យ​ដឹងថា សម្រាប់ផ្លូវ​៣០ម៉ែត្រនេះ​អាជ្ញាធរខេត្តសៀមរាប​ ​ធ្វើ​ការ​ជួសជុល​ឡើងវិញដោយធ្វើ​ប្រព័ន្ធលូបង្ហាទឹកសងខាងផ្លូវ ដើម្បី​រំដោះទឹកកុំឱ្យលិចផ្លូវនារដូវវស្សា បង្រួមខឿនទូ្រង ផ្លូវឱ្យនៅតូច ដើម្បីឱ្យផ្លូវសងខាងធំទូលាយងាយស្រួលដល់ការធ្វើដំណើររបស់ប្រជាពលរដ្ឋ ការចាត់ក្រាលកៅស៊ូថ្មី នៅលើកផ្លូវនេះ។ លោកបាន​បញ្ជាក់ថា បើតាមផែន​ការ​ផ្លូវ​នេះ និងធ្វើ​ឱ្យរួចរាល់នៅក្នុង​រយៈពេល១ខែកន្លះឬយ៉ាង​យូរ២ខែទៀត៕

ដោយ ឃុត សៅ